نوچەنێت.هەولێر:
حزبە كوردییەكانی باكووری كوردستان لە كۆبونەوەیان لەگەڵ سەرۆكی هەرێم،داوایان لە بارزانی كرد كە جارێكی تر ڕۆڵی خۆی لە دەستپێكردنەوەی پڕۆسەكە ببینێت بۆ ئەوەی پڕۆسەی ئاشتی بگەڕێتەوە سەر ڕێگەی خۆی.
ماڵپەڕی سەرۆکایەتی ههرێم بڵاوی کردوەتەوە”لە چوارچێوەی سەردانە فەرمییەكەی بۆ وڵاتی توركیا ڕۆژی پێنجشەممە 10ـی 11ـی 2015 لە شاری ئەنكارای پایتەختی توركیا عسمەت یەلماز وەزیری بەرگریی توركیا پێشوازی لە مەسعود بارزانی سەرۆكی هەرێمی كوردستان و شاندی یاوەری كرد كە پێكهاتبوو لە د. فواد حوسێن سەرۆكی دیوانی سەرۆكایەتیی هەرێم و سەفین دزەیی گوتەبێژی حكوومەتی هەرێمی كوردستان”.
بەپێی هەواڵی ماڵپەڕەكە”لەدیدارەكەدا وەزیری بەرگریی توركیا پیرۆزبایی ئازادكردنی شنگال و سەركەوتنەكانی هێزی پێشمەرگەی كوردستانی لە سەرۆك بارزانی كرد و پشتگیریی وڵاتەكەیشی بۆ هێزی پێشمەرگەی كوردستان لە شەڕی دژی داعش دووپات كردەوە و لەبارەی پڕۆسەی مەشق و ڕاهێنانی پێشمەرگە لە لایەن پسپۆڕە سەربازییەكانی توركیا لە چوارچێوەی هاوپەیمانێتیی شەڕی دژی داعش شیكردنەوەی پێویستی بۆ بارزانی خستەڕوو. هەر لەم كۆبوونەوەیەدا باس لە بارودۆخی مەیدانیی بەرەكانی شەڕی دژی داعش كرا و ئامادەكارییەكانی پلانی ئازادكردنی موسڵیش خرایە بەر باس و گفتوگۆ”.
لە بەشێكی دیكەی ئەم كۆبوونەوەیە بابەتی هاتنی سوپای توركیا بۆ باشیك و دروستبوونی تەنگژە لەنێوان عێراق و توركیا تاوتوێ كرا.
ماڵپەڕی سەرۆکایەتی ئەوەی خستۆتەڕوو کە”لەدرێژەی دیدار و كۆبوونەوەكانی ڕۆژی پێنجشەممە 10ـی 12ـی 2015 بارزانی لە شوێنی حەوانەوەی خۆی لە شاری ئانكارا پێشوازی لە شاندی باڵای سەركردایەتیی پارتیی دیموكراسیی گەلان كرد كە پێكهاتبوو لە خاتوو فیگەن یوكسەكداخ ھاوسەرۆك و ئەحمەد تورك و لەیلا زانا و ئۆسمان بایدەمیر و ژمارەیەك سەركردەی باڵای هەدەپە”.
ماڵپەڕی سەرۆکایەتی ئەوەش ئاشکرا دەکات کە”لە كۆبوونەوەیەكدا شاندی باڵای هەدەپە بەخێرهاتنی بارزانیان كرد و بۆچوونی خۆیان لەبارەی بارودۆخی سیاسیی توركیا و كێشەكانی بەردەم پڕۆسەی ئاشتی بۆ بارزانی خستەڕوو و داوایان لە بارزانی كرد كە جارێكی تر ڕۆڵی خۆی لە دەستپێكردنەوەی پڕۆسەكە ببینێت بۆ ئەوەی پڕۆسەی ئاشتی بگەڕێتەوە سەر ڕێگەی خۆی”.
هەر بەپێ هەواڵەكە”هەر لەم كۆبوونەوەیەدا بارزانی لە گوتەیەكدا باسی لە هۆكارەكانی وەستانی پڕۆسەی ئاشتی و ئاستەنگەكانی كرد و تێڕوانینی خۆی لەسەر ئەوە خستەڕوو كە چۆن بتوانرێ پڕۆسەی ئاشتی بخرێتە سەر ڕێڕەوی خۆی. هەروەها هیوایشی خواست كە ئەو كێشە سیاسییانەی لە ئارادایە لە شارە كوردنشینەكان نەبێتە هۆی گرفتی قووڵتر و هەموو لایەك دەست بە پێكەوەژیان بگرن و پێشانی جیهانیان بدەین كە چۆن دەتوانین فەرهەنگی پێكەوەژیان و ئاشتیخوازی لەنێوان خۆمان و خەڵكی تر بپارێزین و پەرەی پێ بدەین”.
ماڵپەڕەكە رونیشیكردوەتەوە”پاش ئەو كۆبوونەوەیە و ئێوارەی هەمان ڕۆژ بارزانی لە شوێنی حەوانەوەی خۆی لە شاری ئانكارا پێشوازی لە سەركردەی هەموو حزبە كوردییەكانی باكوور كرد و لە وتەیەكدا ئامانجی سەردانی خۆی بۆ توركیا خستەڕوو كە بریتی بوو لە تاوتوێكردنی شەڕی داعش و چۆنیەتی هاوكاریی توركیا و هاوپەیمانان و هەروەها چارەسەركردنی كێشە و تەنگژەكانی نێوان عێراق و توركیا و پڕۆسەی ئاشتی و پەیوەندییە ئابوورییەكانی نێوان هەرێمی كوردستان و توركیا”.
لە بەشێكی دیكەی قسەكانیدا بارزانی تێبینی و ئامۆژگارییەكانی خۆی لە مەڕ پڕۆسەی سیاسیی توركیا و ڕۆڵی كورد بۆ ئامادەبووان باس كرد و داوایشی كرد كە هەموو لایەك هەوڵ بدەن فەرهەنگی پێكەوەژیان و ئاشتیخوازی لەنێوان پێكهاتەكان فراوانتر بكرێت”.
لەدوای ئەم كۆبوونەوەیە سەرۆك بارزانی لە پڕێسكۆنفڕانسێك ئەجێندای سەردانەكەی بۆ دەزگاكانی ڕاگەیاندنی كوردی خستەڕوو و وەڵامی پرسیاری ڕاگەیاندنكارەكانیشی دایەوە.
ئێوارەی ڕۆژی پێنجشەممە 10ـی 12ـی 2015 بارزانی دوای كۆبوونەوەی لەگەڵ سەرۆك كۆمار و سەرۆك وەزیران و وەزیری دەرەوە و بەرگریی و ژمارەیەك لە بەرپرسە باڵاكانی توركیا و چەندین دیدار و كۆبوونەوەی تر لەگەڵ لایەنە كوردییەكانی توركیا كۆتایی بە سەردانەكە فەرمییەكەی بۆ وڵاتی توركیا هێناو لە ڕێگەی فڕۆكەخانەی نێودەوڵەتیی هەولێر گەڕایەوە هەرێمی كوردستان.
دەقی پڕێسكۆنفڕانسەكە:
دەقی پڕێسكۆنفڕانسەكە:
