نوچەنێت.هەولێر:
وتەبێژی رەسمیی سەرۆكایەتی كۆماری عێراقە رایگەیاند،رۆژی شەممەی داهاتوو كۆبونەوەی سەركردە و سەرۆكی فراكسیۆنە سیاسییەكان لە سەرۆكایەتی كۆمار بەڕێوەدەچێت بەمەبەستی تاوتوێكردنی دۆسیە سیاسیی و ئەمنییەكان بەئامانجی یەكخستنی هەڵوێستەكان.
خالید شوانیی وتەبێژی رەسمیی بەناوی سەرۆكایەتیی كۆماری عێراقەوە لە لێدوانێكدا كە وێنەیەكی بۆ نوچەنێت نێراوە،رایگەیاندوە:رۆژی شەممەی داهاتوو ٢٠١٥/١٢/١٢ كۆبونەوەی سەركردە و سەرۆكی فراكسیۆنە سیاسییەكان لە سەرۆكایەتی كۆمار بەڕێوەدەچێت بەمەبەستی تاوتوێكردنی دۆسیە سیاسیی و ئەمنییەكان بەئامانجی یەكخستنی هەڵوێستەكان، بەتایبەتیی یەك هەڵوێستیی لەبارەی بەگژاچونەوەی داعش و مامەڵەكردن لەگەڵ هاوپەیمانیی نێودەوڵەتیی و دۆسیەی سەرلەنوێ ئاوەدانكردنەوەی ناوچە رزگاركراوەكان و یەكخستنی تێڕوانینەكان لەئاست قانونە گرنگەكان كە تائێستا پەسەند نەكراون.
