نوچە-فارس نیوز
جۆن بۆڵتۆن،نوێنەری پێشووی ئەمریکا لە نەتەوەیەکگرتووەکان لە وتارێکدا کە لە رۆژنامەی نیۆیۆرک تایمز بڵاو بۆتەوە دەنووسێ:بۆ شکست پێهێنان بە داعش دەبێ وڵاتێکی سوننە پێک بهێنرێ.
جۆن بۆڵتۆن لە سەرەتاوە دەنووسێ:سیاسەتی هەنووکەیی ئەمریکا و باقی ئەو پێشنیارانەی کە خراونەتە بەر باس،روانینێکی ستراتێژیکی بۆ رۆژهەڵاتی ناوەڕاست کە ئەنجامەکەی ببێ بە شکستی داعش،تێدا بەدی ناکرێ.دەشڵێ:هیچ وڵامێک بۆ ئەم پرسیارە کە لە دوای داعش چی روودەدات،لە ئارادا نییە.
بۆڵتۆن لە درێژەی وتارەکەیدا دەنووسێ:بۆ ئەوەی هەوڵە بێ ئەنجامەکانی ئۆباما بگۆڕین بۆ کەمپەینێکی سەربازی بەهێز ودوایە بتوانین داعش لە ناو ببەین،پێویستیمان بە روانگەیەکی روون هەیە ودەبێ لە گەڵ ناتۆ و وڵاتانی دیکەی هاوپەیمان بیخەینە بەرباس،دەبێ هەر لە ئیستاوە روونی بکەینەوە کە ئەڵتەرناتیڤمان بۆ داعش دەبێچی بێ.
بۆڵتۆن دەشڵێ:دەبێ ئەمریکا هەل و مەرجی جیئۆپۆلۆتیکی نوێی عێراق وسوریە بە فەرمی بناسێ و دەبێ لەوە تێبگات کە باشترین جێگرەوە بۆ داعش لە باکووری رۆژهەڵاتی سوریە و رۆژئاوای عێراق،پێکهێنانی دەوڵەتێکی نوێ و سەربەخۆی سوننەیە.
بۆڵتۆن جەخت لەوە دەکاتەوە کە ئەم دەوڵەتە سوننەیە توانای ئابووری ئەوەی هەیە کە بەرهەمهێنەرێکی نەوت بێ و دەشتوانێ ببێتە دیوارێک لە بەرامبەر بەشار ئەسەد و هاوپەیمانەکانی ئێران لە بەغداد.
بۆڵتۆن لە درێژەدا دەلێ:با بە هەڵەدا نەچین،وا تێنەگەین کە ئەم دەوڵەتە سوننەیە بە زوویی دەبێتە دیموکراسیەکی جێفێرسۆنیەوە،بەڵام واقعی ناوچەکە ئەوەیە کە جێگیرکردنی دەوڵەتێکی نیمچەسەرەڕۆ بە سوپایەکی سێکۆلارەوە ئاستەمە.
