ئەمڕۆ هەموومان نەرویجین
پێناسەو رووبەڕووبونەوەی نوێی جیهان بۆ تیرۆر دوای هێرشە تیرۆرستییەكەی نەرویج
تەها بەرواری*
بیرهێنانەوە
هەینی ٢٢/٧/٢٠١١ی نەرویج، دەبێتە هەینی سور، پایتەختی دابەشكردنی خەڵاتی نۆبڵی ئاشتی رۆژێكی نوێ و خوێناوی لەمێژووی خۆی تۆمار دەكات. ئۆسلۆ و نۆروێژ دەبنە كۆشتارگایەكی بێوێنە لەدوای جەنگی جیهانی دووەم. تیرۆریستێكی توندڕەوی كریستیان ئەوەی كەس بیری لێ نەدەكردووە كردی، ئەو وتەی فەیلەسوفێكی لیبڕاڵی وەك میلزی كردە رێنیشاندەری خۆی، كە دەڵێت (كەسێكی بەبیروبڕوا بەرامبەر بە سەدهەزار كەسی بەرژەوەندیخوازە!)، وەك خۆی وتویەتی ئامانجی ئەم تیرۆریستە ئەوروپایەكی بێ ئیسلامە.
رۆژی هەینی بۆمبێكی بەهێز لەناوەڕاستی ئۆسلۆی پایتەختی نۆروێژ و لەناوەندی بارەگاكانی حكومەتی نۆروێژ دادەنرێت، هێزی تەقینەوەكەی ئەوەندە بەهێزبووە ناوەندی ئۆسلۆ دەهەژێنێت و ٧ كوژراو و كۆمەڵێك بریندار و خەسارەتێكی گەورەی ماددی لێدەكەوێتەوە، دوورگەی یۆتایی كەمپی هاوینەی لاوانی پارتی كار (سۆسیال دیموكراتەكان)ە، ئەو رۆژە زیاتر لە ٧٠٠ گەنج لەوێ دەبن، كە شوێنێكی پێگەیاندنی لاوانی ئەو پارتەیەو بەشێك لەكاتی هاوینی خۆیان لەوێ بەسەر دەبەن و خولی جۆراوجۆر دەبینن، هەمان رۆژ دوای كاتژمێرێك لەتەقینەوەكەی ئۆسلۆ ئەنجامدەری تەقینەوەكە، بەجلوبەرگی پۆلیس و بەپڕچەكی دەچێتە ئەو دورگەیە، ٧٩ خولەك بە رق و كینەیەكی بێ وێنە گوللەبارانی گەنجەكان دەكات و ٦٨ كەس تیرۆر دەكات، بۆ كوشتنی ئەوان فیشەكێك بەكار دەهێنێت لەجۆرێكە كە لەكاتی پێكانی ئامانجەكەیدا گەورەترین زیان دەگەیەنێت و ناسراوە بە (فیشەكی دۆمدۆم).
بكەری تاوان، “ئەندەش بێهرینگ برێڤیكس”ە، تەمەنی ٣٢ ساڵەو كوڕە دیپلۆماتێكی نۆروێژیە، ١٦ ساڵە دوای جیابوونەوەی دایك و باوكی، پەیوەندی لەگەڵ باوكی نەماوە، ئەو ئەندامی یانەیەكی تیرئەندازییە و مۆڵەتی هەڵگرتنی چەكی هەبووە، ئەندامی چەندین حزبی نەژادپەرستی نۆروێژی بووەو تۆڕبەندیەكی فراوانی هەبووە لەگەڵ نەژادپەرستەكانی ئەوروپا.
لوتكەی رق و نەژادپەرستی
رق و كینە كاتێك ناخی مرۆڤەكان داگیر دەكات، نابینای دەكات و رێگاكانی بیركردنەوەی دادەخات، مرۆ لەمرۆڤبوون دادەماڵێت و زۆر كات دەیباتە پێستی دڕەندەیەك، كە تاكو ئێستا لەڕیزی دڕندەترین گیانداریش هەژمار نەكرابێت، كینە و رق كاتێك بەسەر مرۆڤدا زاڵ بوو، نامەنتقی لا دەكاتە موتڵەق و پیرۆزییەك كە لەپێناویدا بكوژێت و ببڕێت بێ ئەوە پەشیمان بێت، بڕوانە قسەكانی ئەم گەنجە یاخی بووە لەئینسانیەتی خۆی و ئەم كەسە دەست سوورە بەخوێنی گەنجانی بێتاوان، ئەوانەی بەئومێدی بەسەربردنی كاتێكی جوان و ئایندەیەكی گەش بەزەردەخەنەوە لەژیانیان روانیوەو بەشەوقەوە بەشداری چالاكییەكانی كاتە ئازادەكانی خۆیان كردووە، بەپێی ئەو قسانەی تۆمەتباركراو بەپارێزەرەكەی وتووە، ئامانجی ئەم كارە تیرۆریستیە تەفروتوناكردنی تواناكانی پارتی كار و لێدانی تواناكانی راكێشانی گەنجانە بەرەو ئەو پارتە، یەكێكی تر لەهۆكارەكانی بەئامانجكردنی ئەو پارتە، باوەڕیەتی بەكۆمەڵگایەكی فرە فەرهەنگی، واتە كرانەوەی دەرگای نۆروێژ بەرەو میللەتانی ترو بەتایبەتی سیاسەتی پەناخوازی و كرانەوە بەڕووی ئیسلامدا.
لێرەوە لەئەنجامی هەڵسەنگاندنی ئەو قسانەدا ئەوەی روون دەردەكەوێت، نەژادپەرستی و چەقبەستوویی بڕواو گەشتنە بەلوتكەی رق، پیرۆزكردنی بڕوایەكە لای تاوانكار، كە هەموو سنورەكانی پێ دەبەزێنێت، بڕوایەك كە لەناخی ئەودا پیرۆزە، بەڵام لەبەرانبەر كرانەوەداو ئازادیدا لەرزۆكە، بەشێوەیەك كە تەنها كرانەوە لەهزری ئەودا دەبێتە هەڕەشەی نەهێشتن و تەفروتوناكردنی بڕواكەی، ئەوەی سەیرتر دەردەكەوێت ئەوەیە مرۆ خۆی وابەستەی بڕوایەك بكات، كە توندوتیژی گرەنتی مانەوەی بێت، بڕوایەك كە لەم فەزا ئازادەی نەرویژدا توانای نەشونماو گەشەی نەبێت و خوێن و هەڕەشەو كوشتن دڵنیایی سەركەوتنی دابین بكات، ئەمەیە كە تاكوئێستا رەنگە بۆ خەڵك چاوەڕواننەكراو بێت، كە بێ هەبوونی سەركوتكردن و بێ هەبوونی رێگری و لەوپەڕی ئاسانكاری و ئازادی كاردا، بڕوایەك لای كەسانێك سەر هەڵبدات، كە ئایدۆلۆژیەكەیان هەڕەشەی لەسەرەو توانای گەشەسەندنی نیە، ئەگەری لەناوچوونی نزیكە، رەنگە بۆ كەسێكی چاودێر وەڵام هەبێت، كە ئەوەی وادەكات ئەو ئایدیایە روو لەنەمان بێت لەفەزایەكی ئازاددا، بەسەرچوون یان نامەنتقی خودی ئایدیاكەیە، بەڵام ئەو پرسیارەی كە ناكرێت وەك خۆی بگەینە وەڵام ئەوەیە ئایا ئەوانەی وا بیر دەكەنەوە، كە كەشی ئازاد جێی ئەوانی تێدا نابێتەوەو كرانەوە مەترسییە لەسەریان، چی دەیانگەیەنێتە وەها بڕوایەك؟.
لایەنێكی تری جێ سەرنجی ئەم تاوانكارە یان گومانلێكراوە بە ئەنجامدانی وەها تاوانێك، كە جێی هەڵوەستە لەسەركردنە ئەوەیە، كە بەر لە ڕۆیشتنی بۆ دادگا، دوو داوای هەبووە، یەكەم ئەوەیە كە بەجلوبەرگی سەربازییەوە دادگایی بكرێت، دووەم ئەوەیە بەشێوەیەكی ئاشكرا تۆمەتەكان بدرێنە پاڵی، بەڵام هەر دوو داواكەی رەتكرانەوەو هیچ شانسێكیان بە داواكارییەكانی نەدا.
ئەوەی لەداواكارییەكانی ئەو كەسە بەدیدەكرێت، دیسان هەستكردنیەتی بەوەی بیروبڕواكەی خەتەرێكی وەهای لەسەرە، تەنها هێز گرەنتی مانەوەی دەكات، بۆیە داوا دەكات وەك سەربازێكی پارێزەر لەبڕوایەك، یان وەك فەرماندەیەكی داكۆكیكارو گیانفیدا بۆ بڕوایەك نمایش بكرێت، ئەوەش وەك پەیامێك بۆ هاوبڕواكانی كە دەبێت توندبن لەپاراستنی بڕواكەیان.
ئەوەی وادەكات كە ئەم گەنجە دوور بخاتەوە لەو گریمانەی كە هۆكاری تاوانەكەی نەخۆشییەكی دەروونی بووە، نەك كارێكی تیرۆرستی، داوای دووەمی بووە لەدادگا، كە دەڵێت دەیەوێت بەشێوەیەكی ئاشكراو بەبەرچاوی میدیاكانەوە دادگایی بكرێت، چونكە بەهەموو خوێندنەوەكان مەبەست لەم داوایە گەیاندنی پەیامێكە بەخەڵك. بەدەسەڵات، كە خەڵكانێك هەن چیدی كرانەوەو هاتنی دین و بێگانەی جیا لەخۆیان قبوڵ نییە، خەڵكانێك هەن، ئامادەن بكوژن و بكوژرێن، لەپێناو ڕێگری لەو فەزا ئازادەی كە ململانێی ئازادانە بۆ بڕواكان دەخولقێنێت، بۆیە خوێندنەوەی من بۆ ئەو گەنجە بكوژە ئەوەندەی كەسێكی ترسناكی پەیامدەرە، هێندە كەسێكی دەروون نەخۆش نییە، دەكرێت ئەمە بە گرێی دەروونی ناوببرێت، كە سەركەوتن و دەركەوتنی بڕوایەكی جیا لەبڕوای خۆی، بۆی دروستكردبێت، بەڵام خەڵكی دەروون نەخۆش پەیامدەر نییە.
بەخشینەوەی ناسنامەی تیرۆر هەڵە لەمێژینەكەی رۆژئاوا.
دوای ئەم رووداوە خوێناویەی نەرویج. سیاسی و رۆژنامەكانی رۆژئاوا، بەر لەدەستكەوتنی سەرەداوەكان، كەوتنە تۆمەت هۆنینەوەو پێشبینی نادروست، لەو بارەیەوە لەرۆژنامەی سڤێنسكا داگ بلادێت كە رۆژنامەیەكی سویدیە “بیتێ هەمەرگرێن” كە پسپۆرە لەكاروباری رۆژهەڵات و ئیسلام، شیكارییەكی زۆر جوانی كردووەو نوسیویەتی “سەرەتا بەرلەوەی ناوی ئەو تیرۆریستە بزانرێت، یەكسەر گومان لەسەر ئیسلامیە تۆندڕەوەكانەو بەتیرۆریست ناویان دەبەن، كەچی دوای ئاشكرابوونی ناسنامەكەی و ناوەكەی، كە هاوڵاتیەكی ئاسایی نۆروێژییە، لەجیاتی وشەی تیررۆریست یەكسەر نازناوی سەرشێت و تۆمەتی تری دەخەنە پاڵ، ئەمە لەكاتێكدایە كە زۆربەی كاری تیرۆریستی لەئەوروپا، لەلایەن ئەتنیكە جوداخوازەكانی ئەوروپاو دوای ئەوان توندڕەوی چەپ و ڕاستن، لەكۆی ١٧٧٠ كاری تیرۆریستی، لەئەوروپا ٦ كردەوە، لەلایەن تۆندڕەوی ئیسلامی ئەنجامدراوە، لەنێوان ساڵەكانی 2006 – 2009”.
ئەوەی ئەو رۆژنامەوانە پەیپێبردووە دەربڕین و شیكارێكی هەروا سادە نییە، بەڵكو ئەوە ئەو هەڵە كوشندەیە سیاسی و میدیاكارەكانی رۆژئاوا بەسەریا تێدەپەڕن و چەند بارەی دەكەنەوە، كە بەخشینەوەی ناو و بەموڵككردنی تیرۆرە بۆ گروپە ئیسلامییە توندڕۆكان و بەكارهێنانی ناوێكی ترە بۆ كردە تیرۆرستیەكانی گروپە توندڕۆكانی دەرەوەی گروپە ئیسلامیەكان، ئەمە هەڵەیەكی كوشندەیە، دروستكردنی بەرەی تیرۆرو بەرانبەری تیرۆرە، لەهەمان كات وروژاندنی رقی ئیسلامە، لەهەمبەر رۆژئاواو پێدانی سۆزیانە بەگروپە توندڕۆكان، ئاخر ئەوە چی هەڵەیەكە، هەر كردەیەكی كوشتن كرا، ئەگەر گروپی ئیسلامی لەپشتی بوو بەتیرۆر ناو ببرێت، گەر بڕوایەكی تر بوو بە نەخۆشی و سەرشێتی و رق بزانرێت؟، چما لەپێناسە جیهانییەكانی تیرۆردا ئەوە هاتووە، كە كوشتن ئەگەر ئیسلام بیكات تیرۆرەو لەدەرەوەی ئەو تیرۆر نیە؟.
من وادەبینم ئەو كردەوە خوێناوی و تیرۆرستیەی نەورویج، گۆڕانكاری گەورە دەخولقێنێت، زۆر لەخەڵك و دەزگا رەسمییەكانی ئەوروپاشی هێنایە سەر هەمان تێگەشتنی “بیتێ هەمەرگرێن”، كە دەبێت پێناسەو خوێندنەوەی نوێیان بۆ بەرەكانی تیرۆر هەبێت و فرەوانتر لەو هۆكارو بڕوایانە بڕوانن، كە شیمانەی دروسكردنی توندڕەوییان لێ دەكرێت، ئەو فرەوانبینینەش وەكو ئەرك زیاتر دەكەوێتە ئەستۆی ئەو دەزگایانەی كە ئەركی رووبەڕووبونەوەی توندوتیژی و كاری نایاساییان هەیە، واتە دەزگا ئەمنییەكان، وەك ئەوەی یەكێك لەكارە گرنگەكانی هەر دەزگایەكی ئەمنی شیكارییە، بۆ ئەو هەڕەشانەی لەسەر كۆمەڵگەن، بەڵام ئەو كارە تیرۆرستیەی نەرویج دەریخست كە شیكاری دەزگاكانی رۆژئاوا لەرابردوو فرەوانبین نەبوون، لەهۆكارەكانی دروستبونی تیرۆردا، بۆیە ئەم كارەتیرۆرستیەی نەرویج زیاتری بەهۆشی هێنانەوە، هەر لەو سۆنگەیەشەوە دەزگای موخابەراتی سوید سێ هەڕەشە دیار دەكات، لەسەر سیستەمی دیموكراتی سوید، كە بریتین لە تۆندڕەوە ڕاست و چەپەكان و هەروەها تۆندڕەوە ئیسلامییەكان. لەو سەروبەندەشدا دەستپێشخەرییەكیان راگەیاند، كە هەرگیز چاوەڕوانكراو نەبوو ئەویش دروستكردنی یەكەیەكی تازەیە لە ٥٠ شارەزا بۆ شیکردنەوەو لێكۆلێنەوە لە هەڕەشەی راستڕەوەکان لەسەر کۆمەڵگەی ئەسكەندیناڤیا دوای هەینی خوێنی ئۆسلۆ یان(هەڕەشەی دژ بە ئیسلام) لەئەسكەندیناڤیا و بۆ هاوكاریكردنی وڵاتانی باكوری ئەوروپا.
بڕوانە كارەساتی نەرویج چۆن ئاراستەكانی گۆڕی؟ دوێنێ ئەوەی ناوی تیرۆر بوو دەدرا پەنای گروپی ئیسلامی توندڕێ مەترسی تیرۆر لەوان دەبینێرا ئەمڕۆ لێكۆڵینەوە لەمەترسییەكانی سەر ئیسلام دەكرێت، كە بەڕای من ئەوە یەكێك لەو گۆڕانكارییە گەورانەیە كە لەتێڕوانین و پێشبینییەكانی دەزگا ئەمنیەكان سەریهەڵداوە.
بۆیە دەتوانین لێرەوە بڵێین، ئەو رووداوە چاوەڕواننەكراوە تیرۆرسیتیەی لەنەرویج روویدا، لەدوای خۆیدا پەلكێشی سیاسی و میدیای رۆژئاوا دەكات، بۆ خوێندنەوەو وردبینی زیاتر لەپێناسەكردنی تیرۆر و پیادەكردنی سیاسەتێكی دروستتر، وەك ئەوەی سەرۆك وەزیرانی نەرویج گوتی “نەرویجێكی پێش و پاش ٢٢/٧ دێتە كایەوە، بەڵام كام نەرویج دەبێت؟ ئێمە هەڵی دەبژێرین”.
تاوان و تۆڵەكردنەوە
پێشتر باسی ئەوەم كرد، كە رەنگە بەشێك لەهەوادارانی بڕواو ئایدیا داخراوەكان، كرانەوەو ئازادی لەهەر كۆمەڵگەیەكدا، بەهەڕەشە بزانن و توش بەكاردانەوەی توندو نامرۆڤانەیان بكات، وەك ئەوەی لەنەرویج روویدا، بەڵام ئەوە هەرگیز ناكرێتە پێناسەو ئەنجام و بەرهەمی كرانەوە، بەڵكو دەكرێت بڵێین، ئازادی و سەربەستی تاك و كرانەوەی كۆمەڵگە، هاوشانی سیستەمێكی بەرزی شارستانی، تاكێكی هۆشیارو مرۆڤدۆست بەرهەمدەهێنێت، كە بەردەوام جێی شانازی كۆمەڵگەی مرۆڤایەتی بێت، رووداوەكەی نەرویج و ئەو كردە تیرۆرستیە وەك بكەرەكەی دانی پێداناوە دژایەتی كرانەوەی ئەو وڵاتە بوو بەڕووی مرۆڤایەتی و قبوڵكردنی ئازادی دینی و بیری جیاواز، بەڵام لەهەمانكاتدا خەڵكی هۆشیاری ئەو وڵاتە بەرهەمێكی تری كرانەوەی وڵاتەكەیان بەدنیا پێشان دەدەن، كە لەمانیفێستێكی زەریا ئاسادا نزیكەی ١٥٠٠٠٠ كەس لە ئێوارەی ٢٥/٧دا لەئۆسلۆی پایتەخت، بە ئاڵای نەرویج ماتەمینی رادەگەیەنن و پەیامێكی ئاشكرای رێكخراوی لاوانی سۆسیال دیموكراتی ئەو وڵاتەش ((نا بۆ رق و نابۆ تۆڵەسەندنەوە))، رادەگەیەنرێت، یێنس ستۆڵتنبەرگ، سەرۆك وەزیری نۆروێژ لەوتاری خۆیدا جیا لەتەئكید كردنەوە لەكرانەوەی زیاتر لەوڵاتەكەی، وتەی كچێكی نەرویژی بۆ كەناڵی سی ئێن ئێن دەكاتە نمونەو دەڵێت “كەس وەكو كچێكی نەرویژی كە سی ئێن ئێن دیداری لەگەڵدا كرد جوانی نەگوتووە، “بیربكەرەوە ئەگەر كەسێك توانیبێتی ئەوەندە رقی خۆی پیشان بدات. ئەی هەموومان پێكەوە دەتوانین چەند خۆشەویستی پیشان بدەین؟”.
پەیام و خواستی خۆشەویستی كچێك بۆ ئینسانیەت دوای رووداوەكە دەبێتە رای سەرۆكی وڵات، لەوێوە نەرویجیەكان دوای ئەو غەدر و خوێن رشتنە بەناهەقەی هاونیشتیمانیان، بە دنیایان وت، كە بەرهەمی كرانەوەو فەراهەمكردنی ئازادی تاك و خۆشەوستی و دوور كەوتنەوەیە لەرق.
خۆشەویستی مرۆڤ و تەئكید كردنەوە لەكرانەوە بڕیاری خەڵك و سیاسییەكانی وڵاتێك بوو بۆ تۆڵەسەندنەوە، ئەوان دەیانەوێ تۆڵە بە مرۆڤدۆستی بكەنەوە، تۆڵە بەخۆشویستن و بەكرانەوەی زیاتر بكەنەوە، ئەمە بەرهەمی عەقڵی كۆمەڵگەی كراوەیە، بەرانبەر بە بەرهەمی عەقڵی داخراو، ئەمە پەیامی كۆمەڵگەیەكە كە تاوانێكی بێوێنەی دوای جەنگی جیهانی دووەم دەرهەق كراوە، پەیامی خەڵكی ئەو شارەیە كە نۆبڵی ئاشتی دەبەخشێتە ئاشتیخوازانی دنیا و لەبەرانبەردا خەڵكەكەی بەكۆمەڵ دەكوژن و ئارامییەكەی دەهەژێنن.
سۆزی جیهان بۆ نەرویج
بروسكە هاوسۆزیەكان و بەشداری دەربڕین لەم ماتەمینە گەورەیەدا، لە هەموو جیهانەوە ڕوو لەئۆسلۆ دەكەن، ئەوەی هاوسۆزی كوردستان لەهاوسۆزی جیهان بۆ نەرویج جیا دەكاتەوە، تێگەشتنی خەڵكی كوردە لەو ئازارەو لەو ناهەقیە بەرانبەر بەخەڵكی بێ تاوان، ئەوەی ئێمە دەكاتە هاوسۆزێكی جدی ئەم خەمەی نەرویج، لێكچونی رۆژی هەینی نەرویج و مێژووی رابردووی ئێمەیە، لێكچوونە لەنێوان ئەو كاتانەی كورد داوای ئاشتی دەكرد و ئاشتیخوازی و ئارامی دیموكراسی بۆ وڵاتە داگیركەرەكانی دەخواست، ئەوان لەتۆڵەی ئەو خواستەدا كوشتن و لەناو بردنی كوردیان دەكردە وەڵام، كورد هاوخەمی ئازارەكانی ئەوان دەبوو، ئەوان خەمی جەرگسوتانی دایكانی كوردیان دەكردە وەڵام، مەیلی مرۆڤدۆستی ئێمە پاراستنی گیانی سەربازە هێرشبەرەكانی ئەوان بوو بۆ وڵاتەكەمان و تۆڵەی ئەوان كوشتنی بەكۆمەڵی خەڵكی ئێمە بوو، نەرویج كرانەوەو فەراهەمكردنی كەشی ئازاد بۆ تاكەكانی فەراهەم دەكات، عەقڵ داخراوەكانی كوشتن لەخوێن هەڵكێشانی وڵاتیان كردە پاداشت، ئەمە لەیەك چوونی خەمەكانی ئەو رۆژەی نەرویج و خەمە بەردەوامەكانی مێژووی كورد بووە، بۆیە سەرۆكی هەرێمی كوردستانیش لەكۆتایی پرسەنامەیەك بە سەرۆك وەزیرانی نۆروێژ دەڵێت “هاوخەمیی خۆمان بۆ گەلی نۆروێژ رادەگەیەنین و پێمانوایە ئەو دیموكراسی و پێكەوەژیانەی وڵاتەكەتان بنیاتی ناوە، هەمیشە خۆڕاگر دەبێ لەبەردهم هەر مەترسی و هەڕەشەیەكدا، دواجاریش هەر مەیلی ژیاندۆستی براوەیە، لەبەرامبەر تیرۆر و رقلێبوونەوەدا”.
لایەنێكی تر ئێمە دەبەستێتەوە بەهاوخەمیمان بۆ نەرویج جیا لەیەكچونی كۆستی ئەو رۆژەی ئەوان و كۆستی مێژووی دایكانی كوردە، ئەوەیە كە وەكو كورد لەناو نەرویجدا دۆستمان زۆرە، كە هاوشانی خەباتكارانی كورد لەخەمی پرسی كورددا بوون و هەوڵی جدییان بۆ ناساندنی ئەو پرسە هەبووە، یەكێك لەو دۆستە ئازیزانە خاتوو ڤینكا لارسنە، كە ماوەیەكی درێژە تێكەڵ بەپرسی كوردستان بووە، ئەو خانمە رۆژنامەوان و ئەكتیڤیستە لەساڵی ١٩٨٣وە دەناسم و دۆستێكی زۆر نزیكی كوردەو خەڵاتی دۆستی فەخری كوردی، نوێنەرایەتی حكومەتی هەرێمی كوردستانی لەباكوری ئەوروپا پێ بەخشراوە، ئەو خەڵاتەی كە ساڵانە لەگاڵای كوردی دەدرا بە دۆستی كوردی ساڵ، كوردی ساڵ. دۆستی فەخری و بەهاوكاری و پشتگیری ڕاستەوخۆی رێزدار نێچیرڤان بارزانی دابەش دەكراو یەكێك لەشاكارەكانی نوێنەرایەتی حكومەتی هەرێمی كوردستان بوو لەباكوری ئەوروپا، من دوای رووداوە تراژیدیەكەی نەرویج وێڕای لەناخەوە هەستكردنم بەهاوخەمی نەرویجیەكان و ناردنی پرسەنامەم بۆ دۆستانی كورد لەوێ، پرسەنامەیەكم بۆ ئەو خانمە نوسی، كە لەكۆتاییەكەیدا بۆم نوسیوە، ئەمرۆ (هەموومان نەرویجین!). ئەم وتەیە دەربڕی رووداوێكی تری مێژووییە، كاتێك سەرۆك رۆناڵد رەیگان سەرۆكی ئەمریكا بەبرینداری دەبرێتە ژووری نەشتەرگەری لەدكتۆرەكە دەپرسێت: تۆ دیموكراتی؟ یان كۆماریخواز؟ دۆكتۆری سەرپەرشتكار لەوەڵامیدا دەڵێت، جەنابی سەرۆك كۆمار (ئەمڕۆ هەموومان كۆمارین!) واتە بەرژەوەندی وڵات و نوێنەرانی هەڵبژاردەی خەڵك، لەسەرووی هەموو بەرژەوەندیەكی تردایە!، ئەم رستە سەنگینە دەربڕی هەزاران ئاماژەیە، بەڵام لەبنەڕەتدا تێگەیشتنە لەئەجێندای میللی و بەرپرسیاریەتی لەهەموو رووداوێك دا!.
ئێمەی كوردیش وا راهێنراوین نە لەسەختی و نە لەخۆشییەكاندا دۆستەكانمان لەیاد نەكەین، بۆیە لەو رۆژەدا وەك دۆستەكانی پرسی نەتەوەكەم لەنەرویج، منیش نەرویجی بووم، چۆن ئەوان هاوخەممان بوون و هاوكارمان بوون بۆ گەیاندنی پرسی نەتەوەكەمان، منیش لەو رۆژەدا هاوخەمیان بووم و تەواو لەیەك چوونم لەنێوان مێژووی پڕ قوربانی كورد و مێژووی پڕ لەغەدری كورد و بەناهەق كوشتنی كوردو ئەو رۆژەی نەرویجدا دەبینی، بەڵام رووداوی نەرویج چۆن پەندێكی تر لەپێناسەی تیرۆر و لەگرتنەبەری ڕێوشوێنی ڕێگری لەتیرۆر بەدنیا دەدات، دەبێت وانەیەكیش بە ئێمە بدات، یان سورترمان بكات لەسەر بڕوای رابردوومان، كە هەمووكات دووربین لەڕقی تۆڵەسەندنەوەو بەردەوام لەكاتە سەختەكانیشدا پەیاممان خۆشەویستی مرۆڤ بێت، سورتر بین لەسەر ئەو بڕواو پەیامەی لەشۆڕشەكانی كورد هەمانبوو، كە هیچ كات لەوەڵامی تیرۆردا كورد پەنای بۆ توندوتیژی نەبردووەو بەردەوام میللەتێكی لێبووردە بووە، بەهیوای ئەوەی چۆن لەو كارەساتەدا وێكچونی نەرویج و كوردستان دەبینرا، لەخۆشویستنی یەك و بڵاوكردنەوەی خۆشەویستیش لەجێی رق، لەناوخۆی وڵاتەكەمان هەمان پەیامی نەرویجیەكانمان هەبێت “نا بۆ رق و نا بۆ تۆڵەسەندنەوە”.
* نوێنەری پێشووی حكومەتی هەرێمی كوردستان لەباكوری ئەوروپا.
ئەم بابەتە لە ژمارە ٩٤ی گۆڤاری سڤیل چاپکراوە
دیمەنێک لە گاڵای کورد، نەوریج
