ڕێژیر ئیسماعیل : من و پاییز
هەر لەیەکەم دەرکەوتنی پاییز
ئێوارەیەک بەرامبەر
درەختێک ئەوەستم
کە شێوە و رەنگی گەلا ئەبینم
بە دلی خۆمی ئەچوێنم
هەست ئەکەم ئەو شنە بایەی
گەلاکان ئەوەرێنێ
لە تۆ ئەچێ
کە ئەیوەرێنێ دلەی مات و سیسم
لە پاییزدا
بەقەدەر وەرینی گشت گەلاکان
وشە لەناخی من ئەرژێ
کە پاییز دێ
چەشنی دار چلۆن گەلای
لێ ئەوەرێ
ئاوا کۆلێ وشەی زەرد و خەماوی
لە ناخی من لەدایک ئەبێ
پاییز هەموو
شتێکی تۆم بیرئەخاتەوە
کە گەلا زەرد دەبێ
قژی تۆم دێتەوە یاد
بۆنی دوای بارانی پاییزان
بۆنی زولفی تۆم دێنێتەوە بیر و
بەو یادانە من دەکا شاد
ئەی کچی پاییزی لە کوێی
دلم چەشنی گەلایێ زەرد بووە
قەینا
بەس جارێکی دیدەم پێت شادبێ
هاوشێوەی شنە بایێ
وەرە و بموەرێنە!!
