حەسەن روحانی،سەرۆکۆماری ئێران هێنانە ئارای بیرۆکەی “هیلالی شیعی”بە هۆکاری ئاژاوەنانەوە لە ناوچەکە ناودەبات و جەخت لە سەر ئەوە دەکاتەوە کە هیلالی شیعی بوونی نییە.
بە پێی راپۆرتی ئیرنا،سەرۆکۆماری ئێران ئەمرۆ شەممە رایگەیاندووە :بە پێچەوانەی ئەو کەسانەی کە دەیانەوێ لە ناوچەکە دووبەرەکی و ئاژاوە ساز بکەن،ئێمە هیلالی شیعیمان نییە، بەڵکوو قەلەمرەوی ئیسلامیمان هەیە.
هیلالی شیعی دەستەواژەیەک بوو کە یەکەمجار لە لایەن مەلیک عەبدوڵا پاشای ئۆردۆنەوە بەکار هێنرا.هیلالی شیعی ئاماژەیەکە بۆ وڵاتانی لوبنان،سوریە،عێراق،ئێران و بەحرەین.بەرپرسانی کۆماری ئیسلامی بەدەوام نکۆڵییان لە وەها هیلالێک کردووە.
روحانی لە درێژەی قسەکانیدا گوتویەتی:ئێرانیئەمرۆ “نموونەیە” کە تیایدا وەک سەردەمی پیغەمبەری ئیسلام گەرچی حاکمییەت هی زۆرینەیە بەڵام هاوکاتیش کەمینەکان مافیان لە بەرچاو دەگیردرێ و برایەتی لە نیوان شیعە و سوننە بەرقەرارە.
ئەم لێدوانەی روحانی لە کاتێکدایە کە ماوەیەک لەمەوبەر،نوێژخانەیەکی سوننەکان لە تاران لە لایەن هێزە ئەمنیەکانی ئەم وڵاتەوە تێکڕووخێندرا.
