نوچەنێت
ئەمڕۆ حەیدەر عەبادی سەرۆکی ئەنجوومەنی وەزیرانی عێراق کۆمەڵێک بڕیاری دەرکرد بە مەبەستی چاکسازی سیاسی لە حکوومەتی عێراق و سەرجەم بڕیارەکانیش کاردانەوەی جیا جیای لێ کەوتەوە و لە نوێترین کاردانەوەشدا سەرۆکایەتی هەرێمی کوردستان پشتگیری ئەنجامدانی چاکسازییان ڕاگەیاند.
لە ڕاگەیەندراوەکەدا هاتووە “سەرۆكایەتیی هەرێمی كوردستان پشتگیری هەموو هەنگاوێك دەكات كە بە ئاراستەی چاكسازی و نەهێشتنی كەموكوڕییەكان لە دامودەزگاكانی دەوڵەت دەنرێت”.
دەقی ڕاگەیاندراوەکەی سەرۆکایەتی هەرێمی کوردستان:
سەبارەت بە داواكاریی سەرۆك وەزیرانی عێراق و بڕیاری ئەنجوومەنی وەزیرانی عێراقی فیدڕاڵ بۆ دەستپێكردنی پڕۆسەی چاكسازی لە دامودەزگا كارگێڕی و میرییەكان، سەرۆكایەتیی هەرێمی كوردستان پشتگیری هەموو هەنگاوێك دەكات كە بە ئاراستەی چاكسازی و نەهێشتنی كەموكوڕییەكان لە دامودەزگاكانی دەوڵەت دەنرێت.
بۆ ئەوەی پڕۆسەی چاكسازی سەركەوتوو بێت پێویستە ئەم پڕۆسەیە ڕەچاوی ئیستحقاقات و بەشداریی هەرێمی كوردستان و لە هەمانكاتیشدا ڕەچاوی نوێنەرایەتیی پێكهاتە ئایینی و نەتەوەییەكانی عێراقیش بكات و كاریگەریی لەسەریان نەبێت. هەروەها لە چوارچێوەی دەستوور و سیاقی ئیداریشدا ئەنجام بدرێت.
گوتەبێژی فەرمیی سەرۆكایەتیی هەرێمی كوردستان
9ـی 8ـی 2015
