موحسین کەریم: ناسیۆنالیزم، نەتەوە‌و بیری نەتەوەیی!.لە پەراوێزی هێرشی نوچەنێت‌و نوسەرانی ناسیۆنالیست بۆسەر کۆمۆنیزمی کرێکاری”1″

ناسیۆنالیزم، نەتەوە‌و بیری نەتەوەیی!.

لە پەراوێزی هێرشی نوچەنێت‌و نوسەرانی ناسیۆنالیست بۆسەر کۆمۆنیزمی کرێکاری

……………………………

پاوس

نوچەنێت سەرسامی خۆی بەتێگەشتنی ئەم هاوڕێ کۆمۆنیستانە رایدەگەیەنێت، کە بەم شێوەیە دەیانەوێ نوچەنێت بکەنە بەرەی دژی خۆیان، خۆ ئەگەر ئەوەشیان بوێت دەبێت بزانن ئێمەش ئەو تاقەتەمان هەیە، بەڵام تا ئێستاش نامانەوێت وەک خۆی وەڵامیان بدەینەو ە کە ئێمە تەنها کاری رۆژنامەوانیمان کردووە، ئەم بەڕێزە قوفڵی هەواڵێکی ئێمە بە نمونەی پشتیوانی ئێمە باس دەکات، ئەوەی کە نوسیومانە لەم کاتەدا هەوڵی ئاسایکردنەوەی دۆخەکە هەیە، بەڵام ئەوان کە مۆڵەتیان وەرگرتووەتەوە بەردەوام لێدوانی توند دەدەن، ئەوەش بێگومان بۆ کەمتێگەشتنی خۆیان لە کاری راگەیاندن دەگەڕێتەوە، باسی ئەوە دەکات پەیوەندیمان بەزۆر کەسەوە کردووە بەڵام خۆیان لەوە لا دەدەن چەند پەیوەندیمان بە کەسەکانی خۆیان کردووە هەڵاتوون لەو باسە، بەهیواین ناچاری پەرچەکردارمان نەکەن و واز لە تۆمەت هۆنینەوە بهێنن. ئێمە رێزمان بۆ خۆیان و حزبەکەیان هەیەو حەزبەوە ناکەین وەک ئەوان بچینە سەنگەرێکی دژ.

نوچەنێت

……………………………..

درێژەی بابەت

موحسین کەریم

بەشی یەکەم

ماڵپەڕی نوچەنێت لەسەر پڕۆفایلی شەماڵ عەلی لەسەر فەیس بووك لە بەشی کۆمێنتەکاندا”نهێنی”یەكی دۆزیەوەتەوە! ئەگەر ئەم بارودۆخەی ئێستا نەبوایە، رەنگە شەماڵ عەلی دە ئەوەندە شتی ئاشکراشی هەبوایە، نوچەنێت زەحمەتی خۆی نەدەدا چاوێکی پێدا بخشێنێ!.

دیارە شەماڵ عەلی خۆی لە وتارێکی بەپێزدا لە چەندین لایەنەوە وەڵامی نوچەنێت‌و هەندێك لەو نوسەرانەی داوەتەوەو هاوکات لەو فرسەتەدا زۆر مەسەلەی گرنگی شیکردۆتەوە. هەروەکو هاورێ‌یانێکی دیکەش بەشێوەی وتارو کۆمێنت سەرنجی دروستیان لەسەر شیوازی رەخنەی ئەو نوسەرانەو شێوازی مامەڵەی نوچەنێت لەگەڵ کۆمێنتەکەی شەماڵ عەلی‌و چاوپێکەوتنێکی خەسرەو سایەدا بڵاوکردۆتەوە. بۆیە بابەتەکەی من کەمتر وەلامدانەوەی نوچەنێت‌و ئەو نوسەرانە دەبێ، بەڵکو زیاتر رووی لە لێکدانەوەی هەندێ مەسەلە دەبێ کەلەو نوسینانەدا وروژێنراون.

ئەگەر سەرەتا لەوێوە دەست پێبکەم کە بۆچی ماڵپەڕی ناوبراو لەسەر پێگەی شەخسی شەماڵ عەلی کۆمێنتێکی وەرگرتوەو پاشان داوای لە چەندین کەس کردوە وەڵامی بدەنەوە، من ئەم وتەیەی خۆیان دەهێنمەوە کە دەری دەخات ئامانجی هێرشەکە حیزبی کۆمۆنیستی کرێکاری کوردستانە لەرێگای شەماڵ عەلی‌یەوە.‌” جێی باسە ئەگەرچی ئێستا لەکوردستان هەوڵی هێورکردنەوەی باردۆخە دەدرێت و حزبی کۆمۆنیستیش جارێکی تر مۆڵەتی کارکردنی پێدراوەتەوە لەلایەن حکومەتی هەرێمی کوردستانەوە، شەماڵ عەلی کە ئەندامی کۆمیتەی ناوەندی حزبی کۆمۆنیستە، بەردەوام لە پرۆفیلی تایبەتی خۆیەوە بەزمانێکی توند هێرش دەباتە سەر حزبەکانی دەسەڵات.” سایتی نوچەنێت.

کەواتە برادەرانی نوچەنێت هەرئەوە نەبوە کە کۆمێنتێکی شەماڵ عەلی‌یان دیوە جێگای رەخنەی ئەوان بوە. رەنگە لەوبارەدا ئەوانیش بە کۆمێنتێك وەڵامیان بدایەتەوە یان ئەوپەڕی وتارێکیان لەسەر بنوسیایە. بەڵام بەڕێخستنی کەمپینێك کە تائێستا نزیکەی ٧-٨ کەس بەدژی شەماڵ عەلی‌و حیزبی کۆمۆنیست وتاریان نوسیوەو مەعلوم نیە داوایان لەچەندی تریش کردوەو چەندی دیکەش دەنوسێ، ئیتر گومانێك بۆئەوە ناهێڵێتەوە کە برادەرانی نوچەنێت لەوە ناڕەحەتن کە شەماڵ عەلی و بێگومان حیزبی کۆمۆنیستی کرێکاری “بەزمانێکی توند هێرش دەکەنە سەر حکومەت”! ئەگەر برادەرانی نوچەنێت لە سەنگەری دەسەڵاتەوە دژی حیزبی کۆمۆنیستی کرێکاری رانەوەستاون بۆچی لەسەر رەخنەی ئەم حیزبە لە دەسەڵات تەنگاوبوون‌، هەموو هەوڵێك دەدەن تا کەسایەتیەکانی حیزب بخەنە ناوتەڵەیەکی راگەیاندنەوەو هەرایەکی لێ سازبکەن!؟ بۆچی ئەم گەلەکۆمەکیەی نوسەرانی ناسیۆنالیستی کوردیان لە دژی شەماڵ عەلی لەسەر کۆمێنتێك بەرێخستوە!؟ بۆچی ناونانی پارتی‌و یەکێتی بە میلیشیا و بە مافیا کە ئەوە قسەی تەنها ئێمە نیە بەڵکو قسەی زۆربەی خەڵکی کوردستانە، بەجنێو لەقەڵەم دەدات، بەڵام ئەم جنیوانەی نوسەرانی خۆیان:”کۆمەنیست وەک کرم و مێش و مێشولە هەوڵی تێکروخانی سەنگەری کوردایەتیان داوە-سەردار پشدەری، ره‌نگه‌که‌م حزبی سیاسی کوردی هه‌بێت هاوتای کۆمۆنیستی کارگه‌ری … هێنده ‌هه‌رزه‌و گه‌وجانه‌ لێدوان بدات-کەژاڵ نوری، بەهۆی چەند کوردێکی گەوجاوی وەک جەنابتەوە- حمەرەشید هەرەس…” بەمەعریفەو نەجابەتی سیاسی دابنێت!؟ تەنانەت هەندێ لە نوسەرە عالیجەنابەکانیان دەیانەوێ بە کەوچکێك دەرمان لەناومان بەرن یان لێوی ئەوە دەکرۆژن کە ناتوانن وەکو رژێمە دڕندەکانی ئێران‌و تورکیا بەپەتی سێدارەوە هەڵمانواسن! هەڵبەت ئەوەش بڵێم کە بەشێك لەو نوسەرانەی لەدژی حیزبی ئێمەو کۆمۆنیزم وتاریان نوسیوە یان رەخنەیان گرتووە لەسنوری رەخنەو ململانێی سیاسی‌و فکری لایان نەداوە.

بەڵام لێرەوە دەچمە سەر مەبەستی سەرەکی نوسینەکەم.

لەو نوسینانەدا هەندێ مەسەلەی وەکو نەتەوە، هەستی نەتەوایەتی، ناسیۆنالیزم‌و کورادیەتی، دەوڵەتی نەتەوەیی ئاماژەی پێکراوە کە ناراست‌و سەرلێتێکدرەن‌و پێویست دەکات لە روانگەیەکی زانستی‌و کۆمەڵایەتیەوە لێکیان بدەینەوە نەك بەپێی لێکدانەوەی خۆسەری(ئیختیاری) نوسەرانی ناسیۆنالیزمی کورد کە دەیانەوێ کوردایەتی وەکو بیروباوەڕی سەرجەم خەڵکی کوردو بگرە کوردستانیش نیشان بدەن‌و ئیمتیازی سیاسی بدەن بە بزوتنەوەی ناسیۆنالیزمی کوردی یان کوردایەتی! ئەوەش بڵێم کە دوو کەس لەوانەی وەڵامیان داوەتەوە هەوڵیانداوە لە روانگەی تیۆری‌و شیکردنەوەی تیۆریەوە بێنە ناو کێشمەکێش و ئەرگیومێنت(جدال)ەکە لەگەڵ کۆمۆنیزمی کرێکاریدا.

کەژاڵ نوری یەکێکە لەوانەی کە ئەگەرچی نەیتوانیوە رقی خۆی لە کۆمۆنیزمی کرێکاری دانەبەزێنێتە ناو موهاتەرات‌و سوکایەتی پێکردنەوە، بەڵام بۆئەوەی توانای مەعریفی خۆی بەرامبەر بەئێمە نیشان بدات‌و بەرگێکی تیۆری‌و زانستی بکاتە بەر بەرگریکردنەکەی لە کوردایەتی، اقتباس(quotation) ێک لە ‌ئارنست گیڵنه‌ر، شارەزایەکی بواری ئەنترۆپۆلۆجیا( زانستی مرۆڤایەتی) دەهێنێتەوە. کەژاڵ دەڵێ: “به‌مجۆره ‌بۆمان ئاشکرا ده‌بێت که ‌ناسیۆنالیزم به‌رهه‌می نه‌ته‌وه ‌نیە، ‌به‌ڵکو به‌پێچه‌وانه‌وه‌ نه‌ته‌وه ‌‌به‌رهه‌می ناسیۆنالیزمه‌”. هەروەها دەڵێ:” نه‌ته‌وه‌و ناسیۆنالیزم به‌رهه‌می قۆناغی پیشه‌سازین”. من لەگەڵ ئەم لێکدانەوەیەی ئارنست گێڵنەرو کەژاڵ خاندا سەد لەسەد هاوڕام. ( هێڵەکانی تەئکید هی منن).

‌ئەگەر ئەمە سادەتر بکەینەوە ماناکەی ئەوەیە کە ناسیۆنالیزم نەتەوەی دروست کردوە؛ واتە بەرلەوەی نەتەوە هەبێت دەبێ ناسیۆنالیزم هەبێ. کەواتە نەتەوە دیاردەیەکی مێژووکردە، نەك دیاردەیەکی ئەبەدی‌و سروشتکرد! بەدیاریکراویش نەتەوە بەرهەمی قۆناغێکی دیاریکراوی مێژووە کە قۆناغی پیشەسازی، واتە سەرمایەداریە. ناسیۆنالیزمیش وەکو ئارنست گڵینەر دەڵێ:” لەبنەڕەتدا کۆمەڵە پرەنسیپێکی سیاسی‌یە.”

کەواتە ئەگەر لێکدانەوەکەی گێلنەر قبوڵ بکەین لەسەر ناسیۆنالیزم، ئەوا ئەوە قبوڵ دەکەین کە ناسیۆنالیزم نەتەوەی دروستکردوەو ناسیۆنالیزمیش کۆمەڵێك پرەنسیپی سیاسیە کە وەڵام بە گەشەی سەرمایەداری دەداتەوە، چونکە گومان لەوەدا نیە کە پیشەسازی گەورەو مانیفاکتۆری بەرهەمی سەرمایەداری‌یە کە لەسەر لاشەی بەرهەمی سروشتی‌ دەرەبەگایەتی‌و پەیوەندیە ئابوری‌و کۆمەڵایەتیەکانی دەرەبەگایەتی دامەزرا. لێرەوە رۆشن دەبێتەوە کە ناسیۆنالیزم لەسەرەتای سەرهەڵدانیدا لەبنەڕەتدا وەڵامدانەوە بوو بە پێداویستیە سیاسیەکانی گەشەی سەرمایەداری‌و باڵادەستبوونی سیاسی بۆرژوازی لە فۆرمێکی دیاریکراودا، کە دواتر بە پێکهێنانی دەوڵەتی نەتەوەیی گەیشت. مارکس باسی دەوڵەتی نەتەوەیی دەکات وەکو چوارچیوەیەك بۆ دابینکردنی بازاری ناوخۆ بۆ بۆرژوازی. لێرەوە بەوە دەگەین کە دروستبوونی دەوڵەتی نەتەوەییش لە مێژوودا پێداویستیەکی سیاسی-ئابوری بۆرژوازی بووە.

بەمجۆرە ئەو پێوانەو بنەمایانەی کە نەتەوەو دەوڵەتی نەتەوەیی لەسەر دروستکراوە لە بنەڕەتدا پێداویستیەکانی گەشەی سەرمایەداری‌و پێکهاتنی بازاری ناوخۆ بوە بۆ بۆرژوازی لە هەناوی کۆمەڵگای پارچەپارچەو دابەشبووی دەرەبەگایەتیەوە، نەك بە پێچەوانەوە نەتەوەو دەوڵەتی نەتەوەیی دوو دیاردەی سەربەخۆ‌و پێشتر مەوجودبن لە بۆرژوازی! سەرەتا بۆرژوازی وەکو چینێك گەشەیکردوە‌و بەرەو ئەوە چوە کە کۆنترۆڵی بەرهەمهێنان‌و بازار لە ناوچەی دیاریکراودا بەدەستەوە بگرێ. لێرەوە پێداویستی یەکگرتووکردنی بازار لەچوارچێوەیەکی گەورەترو بەرینردا کە هەندێ مەسەلەی هاوبەشی تێدا هەبێ، زەرورەتی پەیداکردوە. بۆیە نەتەوە، نیشتمان‌و دەوڵەتی نەتەوەیی بەپێی پێداویستیەکانی گەشەی سەرمایەو دامەزراندنی دەسەلاتی سیاسی-ئابوری بۆرژوایی شێوازی جۆراوجۆری بەخۆوە وەرگرتوە.

بەشێکی زۆری ئەو نەتەوانەی لە دەورانی یەکەمی نەتەوەسازی‌و دەوڵەتسازی بۆرژوازیدا دروستبوون، لەسەر بنەمای زمانی هاوبەش و رەگەزی هاوبەش نەبوە، بەڵکو چەندین زمان‌و رەگەز(قوم)ی جیاواز لەچوارچیوەی یەك نەتەوە(نیشتمان)دا کۆکراونەتەوەو دەوڵەتی نەتەوەیییان پێکهێناوە. تەنانەت نەتەوە لەلایەن خودی شارەزایان‌و بیرمەندانی ناسیۆنالیزمەوە پێناسەی جۆراوجۆری بۆکراوە. ئەگەرچی ئارنست گێڵنەر فاکتەری زمان وەکو مەسەلەیەکی گرنگ لە پێناسەی ناسیۆنالیزمدا بۆ نەتەوە باس لێدەکات‌و دەڵێ:”رەنگە لە هەمووشت گرنگتر، پێداویستیەکانی سەرمایەداری، بەدیاریکراوی پێداویستی ئاموزشدانەوە(retraining)، ئەوەی پێویست کردبێت کە کرێکارەکان زمانێكی هاوبەشیان بێت.”، بەڵام پاوڵ گێلبەرت، کە ئەویش پسپۆڕێكی مەسەلەی ناسیۆنالیزمە، بەپێچەوانەی گێڵنەرەوە ئاماژە بەچەندین جۆره ناسیۆنالیزم دەکات کە هەریەکایان لەسەر پێناسەیەکی جیاواز بۆ نەتەوە هەڵساون. لە لێکدانەوەکەی ئەودا ئەوجۆرەی ناسیۆنالیزم کە زمانی هاوبەش وەکو پێناسەی نەتەوە دەناسێنێ تەنها یەکێکە لە(٧) جۆری جیاوازی ناسیۆنالیزم!*

بۆنمونە ئەگەر فاكته‌ری زمان وەکو پێناسەی نەتەوە وەربگرین ئەوا لەوبارەدا ” پێناسەی نەتەوەبوونی خەڵكی ولاته‌ “پایه‌دارو ‌میژوویی”ه‌ چه‌ند زمانیه‌كانی وه‌ك سویسرا، به‌لجیكا، ولاته‌ یه‌كگرتووه‌كانی ئه‌مریكای ئه‌مرو، كه‌نه‌دا، فه‌ره‌نسا، ئیسپانیا، بەریتانیاو، به‌شی زوری ولاتانی کیشورەی ئه‌فریقیاو ئاسیا ده‌چێتە ژیر پرسیاره‌وه‌.”- (مەنسوری حیکمەت، نەتەوە، ناسیۆنالیزم‌و بەرنامەی کۆمۆنیزمی کرێکاری). کە ئەم ووڵاتانە دەوڵەتی نەتەوەیی بۆرژوایی خۆیان دەمێکەیە پێکهێناوە.

کەواتە بەسادەیی لیرەوە ئەوەمان بۆ رووندەبێتەوە کە ناسیۆنالیزمیش خۆی وەکو بزوتنەوەیەکی فکری-سیاسی_کۆمەڵایەتی بۆرژوازی شێوازی جۆراوجۆری بەخۆوەگرتوە. ناسیۆنالیزمێك کە لەرۆژاوا بەشوێن دروستکردنی دەوڵەتی نەتەوەیی- سەرمایەداریەوە بووە، زمانی هاوبەش‌و رەگەز(ئەتنیك)ی هاوبەش بنەمای پێناسەی نەتەوەی نەبوەو لەسەر ئەو بنچینەیە نەتەوەو دەوڵەتی نەتەوەیی خۆی دروست نەکردوە. بێگومان ئەو رەوتەی ناسیۆنالیزم کە رەگەزو زمانی نەکردۆتە بنەمای پێناسەی نەتەوەو دەولەت، ناسیۆنالیزمی لیبراڵی‌یە کە لە زۆربەی وولاتانی ئەوروپادا مەوجودە. بەڵام لەریزبەندی جۆرەکانی ناسیۆنالیزمدا، ناسیۆنالیزمی کورد یان ئەوەی پێی دەڵین کوردایەتی، ئەوجۆرەیە لەناسیۆنالیزم کە بەناسیۆنالیزمی قەومی ناسراوە.

وەکو باسمانکرد ناسیۆنالیزم بزوتنەوەیەکی بۆرژواییە کە بەشوێن بەئاکام گەیاندنی بەرژەوەندیە ئابوری‌و سیاسیەکانی بۆرژوازیەوەیە. ئەوبەشەی بۆرژوازی کە بەبۆرژوازی کورد ناسراوە بۆ بەرگریکردن لە بەرژەوەندیە ئابوریەکانی چوارچیوەیەکی هاوبەش کە دەتوانێ ئامانجەکانی خۆی تێدا بەدیبێنێ زمانی هاوبەش‌و رەگەزی هاوبەشە؛ واتە ئەوەی پێی دەڵێن زمانی کوردی‌و رەگەزی کورد. بەمپێ‌یە ئەو ناوچانەی کوردی تێدا دەژی بۆئەو دەبێتە ئەو چوارچێوە جوگرافی-سیاسیەیە کە دەتوانێ سەروەری ئابوری خۆی تێدا دەستەبەربکات. بەلام ئایا تاچ رادەیەك رەوتی گەشەی سەرمایەو دابینبونی بەرژەوەندیە ئابوریەکان‌و بەدوای ئەویشدا سیاسیەکانی بۆرژوازی کورد، گرێی خواردوە بە دامەزراندنی دەولەتی نەتەوەیی-بۆرژوازی کوردەوە، ئەوە مەسەلەیە بۆ خودی ناسیۆنالیزمی کوردیش شتێکی رەها نیە.

لە هەلومەرجی ئێستای جیهان‌و ناوچەکەدا کە رەوتی گەشەی سەرمایەداری هەرچی زیاتر خۆی لە کاڵبونەوەی سنورە نەتەوەییەکاندا نمایشا دەکات‌، دوای ئەوەشی کە چەند دەوڵەتی نەتەوەیی بۆرژوایی پێکهاتوون کەناوچە کوردنشینەکان کەوتونەتە ناو قەلەمڕەوی ئەوانەوەو بارودۆخێکی سەرمایەداریان لەوناوچانەشدا زاڵکردوە، ئەم بارودۆخەش زەمینە ئابوری-کۆمەڵایەتیەکانی گەشەی بۆرژوازی کوردیشی، ئەگەرچی رەنگە لە بارێکی ناوهاوسەنگدا، دابینکردوە. بۆیە لەمبارەدا ئەوەندەی بۆرژوازی کورد بەشوێن ئەوەوەیە کە هەلومەرجێكی هاوسەنگ بۆ وەبەرهێنانی سەرمایەکەی دابین بکات لەناو هەمان چوارچێوەی جوگرافیای سیاسی ئێستادا، کەمتر بەشوێن پێکهێنانی چوارچێوەیەکی جوگرافی سیاسی دیکەوەیە بەناوی دەوڵەتی نەتەوەیی(کوردی)ەوە. هەرئەمەش ئەو مەسەلەیە لێکدەداتەوە کە بۆچی بزوتنەوەی ناسیۆنالیزمی کوردو حیزبە ئەسڵیەکانی لە هەموو مێژوی خۆیاندا مەسەلەی دەوڵەتی نەتەوەیییان لە ئەجندای سیاسی خۆیاندا دانەناوەو لەچوارچێوەی دەوڵەتە نەتەوەیە بۆرژواییە مەوجودەکانی ناوچەکەدا کێشەیان لەسەر دابەشکردنی دەسەڵاتی سیاسی کردوە. ئێستا ئەو دەسکەوتە سیاسی‌و ئابوریەی بۆرژوازی کورد لە کوردستانی عێراقدا بەدەستی هێناوەو هەوڵ دەدات بەشێوازی دەستوری جێگیری بکات، نمونەیی ترین ئەلگۆی بۆرژوازی کوردو بزوتنەوە سیاسیەکەیەتی لەناوچەکەدا بۆبەشداری لە دەسەڵاتی ئابوری‌و سیاسی لەگەڵ بەشەکانی دیکەی بۆرژوازیدا.

بەمپێ‌یە ئەوەی بڕیاردەدات کە ناسیۆنالیزم بۆ دابینکردنی هەلومەرجی سیاسی‌‌و فرسەتی وەبەرهێنانی یەکسان بۆ سەرمایە کام فۆرمی دەسەڵات دابمەزرێنێ، ئایا دەوڵەتی سەربەخۆی نەتەوەیی( قەومی، نیشتمانی یان هەرجۆرێکی دیکە) دادەمەزرێنێ یان لەچوارچێوەی دەوڵەتێکی سەرمایەداری مەوجوددا دەمێنێتەوە، ئەوە بەرژەوەندیەکانی ئەوبەشەی بۆرژوازی دیاریدەکات کە ئەو ناسیۆنالیزمە نوێنەرایەتی دەکات. لەهەموو دەمێکدا بەرژەوەندیە واقعییەکانی بۆرژوازی حوکم بەسەر فۆرمی دەسەڵاتە سیاسیەکەدا دەدات. من لەجێگایەکی دیکەدا وتومە پرسی دەوڵەتی نەتەوەیی وەکو مافێکی نەتەوە پڕوپاگەندەیەکی چەواشەکارانەی سیاسەتمەدارانی بۆرژوازی کوردە کە هەرکاتێك پێویستیان پێی بێت دەیخەنەرێ، دەنا لە دنیای واقیعدا بەرژەوەندیە ئابوری‌و سیاسیەکانی ئەوان بڕیاردەدات کە کام فۆرمی سیاسی قبوڵبکەن. ئێستا لانی کەم لە کوردستانی عێراقدا بۆرژوازی کورد بەرژەوەندیەکانی خۆی لەچوارچێوەی فیدراڵیزمی قەومیدا بەدیهێناوە. ئەوە لە لێنەزانی تاڵەبانیەوە نیە کە وەکو یەکێك لە سەرکردە سیاسیە هەرە موعتەبەرەکانی بۆرژوازی کورد دەڵێ “دەوڵەتی کوردی خەونی شاعیرانە”!

بێگومان بەشێك لە رۆشنبیرانی ناسیۆنالیستی کورد یەکێتی‌و پارتی، وەکو دوو پارتی سەرەکی ناسیۆنالیزمی کورد، بە خیانەتکار لەناسیۆنالیزم‌و کوردایەتی پێناسە دەکەن. ئەم توێژە لە رۆشنبیرانی ناسیۆنالیست بە حوکمی جێگاورێگای کۆمەڵایەتییان وەکو توێژی وردەبۆرژوازی‌ کورد، ناتوانن ناوەرۆکی چینایەتی ناسیۆنالیزم‌و کوردایەتی‌و بزوتنەوەکەی تێبگەن. ئەوان دەسەڵاتی نەتەوەیی بە بەهەشتی ئازادی‌و خۆشگوزەرانی‌و خۆشبەختی‌و ئاشتی کۆمەڵایەتی بۆ “تاکی کورد” دەزانن، بۆیە ئەم دەسەڵاتەی یەکێتی‌و پارتی کە خەڵکی کرێکارو زەحمەتکێشی کوردستان، واتە هەمان هاوزمان‌و هاو رەگەزو هاوخوێنەکان، وەکو دەسەڵاتێکی چەوسێنەرو دژ بە ژیان‌و گوزەران‌و ئایندەیان تەماشای دەکەن، لای ئەوان دەسەڵاتی کوردایەتی‌ نیەو پارتی‌و یەکێتیش دوو حیزبی کوردایەتی‌ نین‌. ئەوان پێ‌یانوایە ئەحزابی ناسیۆنالیستی دەبێ کار بۆ دروستکردنی دەوڵەتی کوردی بکات تا بەهەشتە خەیاڵیەکەی ئەوان بێتەدی!

جێی خۆیەتی ئاماژەیەکیش بە هەست‌و بیری نەتەوەیی بکەین‌ وەکو ئەوەی کە رۆشنبیرانی ناسیۆنالیستی کورد دەیانەوێ بیکەن بە بەرگی هەموو “تاکێکی کوردا”دا.

بۆرژوازی بۆئەوەی بتوانێ کە سەرجەم ئەندامانی نەتەوەی جێمەبەستی بەدوای خۆیدا کێشبکات، دەبێ بەرژەوەندیە سیاسی‌و ئابوریەکانی خۆی لەچوارچێوەی بەهاو ئەفکارو پرەنسیپە سیاسیە ناسیۆنالیستیەکاندا بکاتە ئەفکارو جیهنابینی ئەوان. بۆرژوازی بۆئەم مەبەستە دەبێ هەستی نەتەوەیی دروست بکات تا بتوانێ کاتێك پیویستی کرد بیوروژێنێ! زۆرجار مەسەلەی دەوڵەتی نەتەوەیی نەخشی ئەو وروژاندن‌و ئەو پرۆسەی دەمەزەردکردنەوەی بیرو بۆچونە ناسیۆنالیسیتیەکان دەبینێ لەناو جەماوەری خەڵکدا. ئێمە لەسەرەوە باسمان لەوەکرد کە نەتەوە خۆی دروستکراوی ناسیۆنالیزمە. وتیشمان کە ناسیۆنالیزم پرەنسیپ‌و بزوتنەوەی سیاسی بۆرژوازیە. کەوابێت بیری نەتەوەیی‌و هەستی نەتەوەیی ناکرێ شتێك بێت لە دەرەوەی ناسیۆنالیزم‌و پرەنسیپە سیاسی‌و فکری‌و جیهان بینیەکانی بۆرژوازی. بۆرژوازی لەرێگای ناسیۆنالیزمەوە پرەنسیپەکانی خۆی دەکاتە بیری نەتەوەیی‌و هەوڵ دەدات گشتگیری بکات بەسەر ئەندامانی نەتەوەدا. گومانیش لەوەدا نیە کە بەشی هەرەزۆری تاکەکانی نەتەوە کرێکارو زەحمەتکێشن کە بڕیارە بۆرژوازی خۆماڵی لەسەر وەبەرهێنانی هێزی کاری ئەوان سەرمایەکەی خۆی فراوان بکاتەوە و گەشەی بەردەوامی سەرمایەکەی دابین بکات. بۆیە بۆرژوازی دەبێ هەوڵی جدی بدات‌و راستیەکەی بەشێكی گەورەی سەرکەوتنەکەشی لەوەدایە کە ئەوەی پێی دەوترێ ئینتمای نەتەوەیی( کە لەراستیدا قبوڵکردنی دەسەڵاتی فکری‌و سیاسی‌و ئابوری بۆرژوازی خۆیی‌یە) بە کرێکارانی هاونەتەوەی خۆی قبوڵ بکات‌و بیری نەتەوەیی( واتە پرەسیپە سیاسی‌- ئابوری‌و کۆمەڵایەتیەکانی خۆی) بکاتە بیری هەموو تاکەکانی هاونەتەوەی! بۆرژوای کورد بەهاوکاری ووردەبۆرژوازی‌و رۆشنبیرانی ناسیۆنالیست بەردەوام هەوڵی ئەوەی داوەو هەوڵی ئەوە دەدات کە ئەم  ئینتما نەتەوەییە لەناو کرێکارو زەحمەتکێشی کورددا بەزیندویی بهێڵێتەوە.

ماویەتی:

لە بەشی داهاتودا هەوڵ دەدەم وەلام بەچەند مەسەلەی دیکە بدەمەوە لەوانە: ئایا کوردایەتی وەکو بزوتنەوەیەکی ناسیۆنالیستی بۆرژوازی هیچ جێگایەکی هەیە لە رەوتی بەرەوپێشبردنی کۆمەڵگادا!؟ ئایا بەهەمانشێوەی ناسیۆنالیزمی دەورانی سەرهەڵدان‌و جێگیربوونی سەرمایەداری،یاخود وەکو ناسیۆنالیزمی ووڵاتانی داگیرکراو لەدەورانی ئیستیعماریدا لە رەوتی گەشەی ئابوری‌و کۆمەڵایەتیدا نەخشی پۆزەتیڤی هەیەو ناوەرۆکێکی رادیکاڵی هەیە؟ ئایا بەپێچەوانەی ئەو ناسیۆنالیزمەی کە دەوڵەتی خۆی دروستکردوەو ئێستا لەبەرامبەر چینی کرێکارو زەحمەتکێشی”نەتەوەکەی خۆی”دا وەستاوەتەوەو سەرکوتیان دەکات، ناسیۆنالیزمی کورد بزوتنەوەی لابردنی ستەمی نەتەوەیی نیە‌، ئەگەر وایە ئایا نابێ کرێکارانی سۆشیالیست‌و کۆمۆنیستەکانی کوردستان تێڕوانینێکی پۆزەتیڤیان لەسەر هەبێ؟ بەمپێ‌یەش ئایا دەوڵەتی نەتەوەیی کورد کە کۆتایی بە ستەمی نەتەوەیی دێنێ لەسەر خەڵکی کوردزمان جێگای پشتیوانی ئەوان نابێ!….

* ١-(نۆمینالیست)؛ واتە ئەوەی کە نەتەوە بە هەرچەند گروپێکی خەڵك دەزانێ کە خۆیان سەر بەنەتەوەیەك دەزانن‌. ٢-( ناچراڵیست)؛ واتە ئەوانەی کە رایان وایە نەتەوە بریتی‌یە لەو گروپەی خەڵك کە بەشێوەیەکی سروشتی لەشوێنێکدا کۆبونەتەوە. ٣- (ڤۆڵێنتاریست)؛ واتە ئەوانەی نەتەوە بەو گروپەی خەڵك دادەنێن کە بەشیوەیەکی ئارەزومەندانە پێکەوە کۆبونەتەوە. ئەو جۆرانەی دیکەی ناسیۆنالیزم کە هەریەکەیان نەتەوە بەیەكێك لەوانە پێناسە دەکەن؛ ٤-سەرزەمینی هاوبەش، ٥-زمانی هاوبەش، ٦-بەهای هاوبەش،٧- میژوی هاوبەش‌و ئامانجی هاوبەش.

بۆ خوێندنەوەی بەشی دووەمی ئەم بابەتە کلیک بکە….