نوچەنێت.هه‌ولێر:
وەزیری دەرەوەی قەتەر لە كۆبونەوەی لەگەڵ سەرۆكی هەرێمی كوردستان رایگەیاند، لەگەڵ ئەوەی كوردستان لەشەڕ دایە و قەیرانی ئابووریشی هەیە بەڵام بووەتە پەناگەی سەدان هەزار ئاوارە كە لە نەتەوە و پەیڕەوانی ئایینیی جیاواز پێكهاتوون.
ماڵپەڕی سەرۆکایەتی هه‌رێم بڵاوی کردەوە”ئەمرۆ دووشەممە 20ـی 7ـی 2015 لە سەلاحەدین مەسعود بارزانی سەرۆكی هەرێمی كوردستان پێشوازی لە د. خالد بن محەمەد ئەلعەتیە وەزیری دەرەوەی قەتەر و شاندێكی یاوەری كرد“.
بەپێی هەواڵی ماڵپەڕەكە”لە دیدارەكەدا وەزیری دەرەوەی قەتەر سڵاوی ئەمیری قەتەری بە بارزانی گەیاند و هەروەها ستاییشی پێشكەوتن و بووژانەوەی هەرێمی كوردستان و ئازایەتیی پێشمەرگەی كرد لە ڕووبەڕووبوونەوەی تیرۆریستان و ڕۆڵی بارزانیشی لە سەركردایەتیكردنی شەڕی تیرۆر و پێشڤەچوونی كوردستان بەرز نرخاند. هەروەها سوپاسی بارزانی و گەلی كوردستانیشی كرد كە لەگەڵ ئەوەی كوردستان لەشەڕ دایە و قەیرانی ئابووریشی هەیە بەڵام بووەتە پەناگەی سەدانهەزار ئاوارە كە لە نەتەوە و پەیڕەوانی ئایینیی جیاواز پێكهاتوون“.
لەبەرانبەریشدا”بارزانی بەخێرهاتنی شاندی میوانی كرد و ڕۆشنایی خستە سەر بارودۆخی ئاوارەكان و جەختی لەوە كردەوە كە كوردستان یارمەتیدانی ئاوارە و لێقەوماوان بە ئەركێكی مرۆڤی و نیشتیمانی خۆی دەزانێت و ئەوەی لە دەستی هاتووە بۆ باشتركردنی ژیانی ئاوارەكان كردوویەتی بەڵام ژمارەی ئاوارە و پەنابەران یەكجار زۆر و لە دەرەوەی تواناكانی هەرێمی كوردستانە“.
ماڵپەڕی سەرۆکایەتی ئەوەی خستۆتەڕوو کە”لە بەشێكی دیكەی قسەكانیدا بارزانی ئاماژەی بە دەركەوتن و گەشەی تیرۆریستان لە عێراق و مەترسییەكانی تیرۆر دا و ڕایگەیاند ئەو تاوان و دڕندەییەی تیرۆریستان لە دژی خەڵك و پێكهاتەكان ئەنجامیان داوە لە مێژوودا وێنەی نەبووە. ئەوەیشی خستەڕوو كە تیرۆریستان سوودیان لە ململانێی تاییفی و بارودۆخی نالەباری سیاسی وەرگرت و گەشەیان كرد“.
ماڵپەڕەكە رونیشیكردوەتەوە”سەرۆكی هەرێمی كوردستان ئەوەیشی دووپات كردەوە كە ڕووبەڕووبوونەوەی تیرۆر پێویستی بە هەوڵی هەمە لایەنە هەیە و لە تەك شەڕی سەربازی پێویستە لەڕووی سیاسی و فكری و ئابووریشەوە شەڕی تیرۆریستان بكرێت. هەروەها ئەوەیشی بە وەزیری دەرەوەی قەتەر ڕاگەیاند كە لە ڕووبەڕووبوونەوەی تیرۆریستاندا بارودۆخی عێراق و سووریا بەیەكەوە بەستراوە و پێویستە لە عێراق و سووریا تیرۆر لەناو ببردرێت“.
پەیوەندییەكانی نێوان هەرێمی كوردستان و وڵاتی قەتەر تەوەرێكی دیكەی ئەم دانیشتنە بوو.
