نوچەنێت-ئاژانسەكان
عادل شەرشاب وەزیری گەشتیاری و كەلەپووری عێراقی داوا لە ئەمریكا دەكات ئەرشیفی جوولەكەكانی عێراقی رادەستبكەنەوە.
ئەمڕۆ و لە كۆنفرانسێكی رۆژنامەنوسیدا لە مۆزەخانەی نیشتیمانیی بەغدا، شەرشاب وتی “حەزدەكەم ئامادەبوونی باڵیۆزی ویلایەتە یەكگرتووەكان لێرە بقۆزمەوە بۆ ئەوەی داوای لێبكەم ئەرشیفی جوولەكە عێراقییەكانمان بۆ بگێڕنەوە، كە بە مەبەستی نوێكردنەوە و چاككردنەوەی نێردرایە ئەمركیا كەچی تا ئێستا نەنێردراوەتەوە”.
ساڵی 2003 و لەكاتی كۆنترۆڵكردنی بەغدا، ئەمریكییەكان ئەرشیفی جوولەكەكانیان لە تاڵانیی پاراست و ناردیان بۆ ئەمریكا كە لە ناویاندا كۆپییەكی كۆنی تەورات هەبوو، مانگی یەكی ئەمساڵ عێراق داوای لە یونسكۆ و ئینتەرپۆل كرد یارمەتی بدەن بۆ گێڕانەوەی تەوراتە عێراقییەكە.
ئەوەی عێراقی نیگەرانكردووە ئەوەیە دەوترێت توراتەكە بەشێوەیەكی نهێنی لە ئەمریكاوە گەیەنراوەتە ئیسرائیل و لەوێ بە رێوڕەسمێكی شكۆدار پێشوازی لێكراوە.
عێراق داوای روونكردنەوە لە ئەمریكا دەكات كە چۆن بەناوی نوێكردنەوە و چاكسازی ئەو ئەرشیفەیان برد و ئێستا رادەستی ئیرائیلیان كردووە، هەروەك سكاڕی لەلای یونسكۆ و ئینتەرپۆل كردووە و داوای لێكردوون ئەو ئەرشیفە بدەنەوە خاوەنە رەسەنەكەی كە عێراقە.
ئەو تەوراتە كۆنە گرنگییەكیزۆری بۆ عێراق هەیە، چونكە جگە لەوەی كەلەپوورێكی كۆنی عێراقییە، دەبێتە خاڵێكی گرنگ بۆ سەرنجڕاكێشانی گەشتیارانی بیانی.
