نوچەنێت.هه‌ولێر:
سەرۆکى پێشووی پەرلەمانى کوردستان ڕەخنەی لە خولى ئێستاى پەرلەمان گرت و وتی، پێشینەیەکى ترسناکییان لەم خولەدا تۆمار کرد و پێکهێنانى لیژنە ٢١ کەسییەکەى دەستوور پێچەوانەى یاسا و عورفى پەرلەمانە.
کەمال کەرکوکى، سەرۆکى پێشووی پەرلەمانى کوردستان بە NRT ی ڕایگەیاندوە”لەم خولەى ئێستاى پەرلەمانى کوردستاندا پێشینەکى ترسناک تۆمارکرا کاتێک پرۆژەى دەستووریان هەڵپەسارد و هەوڵیاندا پرۆژەیەکى تر بنوسن”.
کەرکوکى کە ئەندامى مەکتەبى سیاسى پارتی دیموکراتى کوردستانیشە ڕاشیگەیاند”وەک تێبینى کردووە لەناو پەرلەماندا پرۆژە یاسا هەیە دەنگى لەسەر دەدرێت و دواتر دەگەڕێتەوە”.
وتیشى”پێکهێنانى لیژنە ٢١ کەسییەکەى دەستوور پێچەوانەى یاسا و عورفى پەرلەمانە و دژى بەرژوەندى گەلى کوردستانە”.
کەمال کەرکوکى ئاماژەى بەوەشکرد”پێویست بوو پرۆژەى دەستوور بخرایەتە ڕاپرسییەوە چونکە پێشتر پەرلەمان پەسەندى کردووە و سەرۆکى هەرێمیش ئیمزاى لەسەر کردووە، نەک ئێستا بە بەرى حزبەکان لێى دەبڕن”.
