نوچەنێت.هه‌ولێر:
وتەبێژى یەکگرتووى ئیسلامى دەڵێت،درێژکردنەوەى ماوەى ویلایەتی سەرۆکى هەرێم لەبەرژەوەندى هەموو لایەکە هەتا دەستوور پەسەند دەکرێت.
هیوا میرزا سابیر وتەبێژى مەکتەبى سیاسى یەکگرتووى ئیسلامى کوردستان بە NRT ی ڕایگەیاندوە”ئێمە ڕاى خۆمان پێشتریش ڕاگەیاندووە، کە لەگەڵ سیستمى پەرلەمانیداین و ئەم کێشانە لەڕێگاى دەستوورەوە چارەسەرى بکەین و سازانى نیشتیمانى لەسەر کێشەکان بکرێت”.
وتیشى”دەبوو سەرۆکى هەرێم بەرلەوەى بڕیارى ئەوە دەربکات کە لە ٢٠ى ئابدا هەڵبژاردن بکرێت، پێویست بوو پرس و ڕاوێژى بەلایەنە سیاسیەکان بکردایە ئەو کاتە بڕیارەکە بەهێزتر دەبوو”.
هیوا میرزا راشیگەیاند”پێویستە دەسەڵاتەکانى سەرۆکى هەرێم ڕوون و ئاشکرا بێت و ماوە و خولى سەرۆکایەتیەکەى دیاریکراو بێت”.
دەربارەى ڕاى یەکگرتوو لەبارەى درێژکردنەوەى ماوەى سەرۆکایەتى هەرێم، وتەبێژى مەکتەبى سیاسى یەکگرتووى ئیسلامى کوردستان ئاشكرای كرد كە”بەمەرجى ئەوەى هەموو لایەک پێک بێن و سازانى نیشتیمانى لەسەر بکرێت هەتا دەستوور پەسەند دەکرێت، ماوەى سەرۆکایەتى هەرێم درێژ بکەینەوە لەبەرژەوەندى هەرێمى کوردستانە”.
