نوچەنێت.هه‌ولێر:
سەرۆکی پەرلەمانی کوردستان،رایگەیاند، مەسیحییەکان پێکهاتەیەکی ڕەسەنی ئەم وڵاتەن و هیواشی خواست بەزوترین کات ناوچەکانیان ئازاد بکرێت و بچنەوە شوێنەکانی خۆیان.
د.یوسف محەمەد سادق، سەرۆکی پەرلەمانی کوردستان پێشوازیکرد لە یونادم یوسف کەنا، سکرتێری گشتی بزوتنەوەی دیموکراتی ئاشوری و فراکسیۆنی ئاشوریی لە پەرلەمانی کوردستان.
لە کۆبوونەوەیەکدا، گفتوگۆ لەبارەی بارودۆخی مەسیحییەکانی کوردستان و ئەو ئاوارە مەسیحییانەی کە لە ناوچەکانی موسڵەوە هاتوونەتە هەرێمی کوردستان، سەرۆکی پەرلەمان هیوای خواست بەزووترین کات ناوچەکانیان ئازاد بکرێت و بچنەوە شوێنەکانی خۆیان، نەک ناچار بکرێن وڵات جێب‌هێڵن، چونکە بە درێژایی مێژوو ئەم وڵاتە پێکهاتەی ئاینی و مەزهەبی جیاوازی تێدا ژیاوە، نابێت ئەو هەمەڕەنگییە کاڵ بکرێتەوە.
وتیشی”هەرێمی کوردستان پێکهاتەیەکی هەمەجۆرو هەمەڕەنگی هەیە،هەمو پێکهاتەکان ماف و ئەرکیان لە هەرێمی کوردستاندا هەیە و دەمانەوێت ئەو هەمەڕەنگییە لە ئاین و پێکهاتە جیاوازەکان ناسنامەی کوردستان بێت، مەسیحییەکان پێکهاتەیەکی ڕەسەنی ئەم وڵاتەن”.
سکرتێری گشتی بزوتنەوەی دیموکراتی ئاشوری، سوپاسی سەرۆکی پەرلەمانی کوردستانی کرد و داوای لێکرد پەرلەمانی کوردستان، هاوکارییان بێت لە چارەسەرکردنی کێشە و گرفتەکانیان، بەتایبەتیش کێشەی زەوییە داگیرکراوەکانیان.
