نوچەنێت- سی ئێن ئێن
ئاشتۆن كارتەر وەزیری بەرگری ئەمریكا پێی وایە سوپای عێراقی لە شاری رومادی رۆژئاوای عێراق كە پێش هەفتەیەك كەوتە دەست داعش ئیرادەی شەڕ كردنی پیشان نەداوە .
لە چاوپێكەوتنێكیدا رۆژی یەكشەممە لەگەڵ كەناڵی سی ئێن ئێنی ئەمریكی ئەوەی نەشاردەوە كە ” عێراقیەكان كێشەی ئیرادەیان هەیە لە جەنگ لەگەڵ داعش و بەرگری كردن لەخۆیان” ، ئەوەشی وت ” ئەوان كێشەی ژمارەیان نەبوو ، بەڵكو ژمارەیان لە بەرامبەرەكەیان زیاتر بوو بەڵام لەگەڵ ئەوەشدا كشانەوە لە ناوچەكە”.
كارتەر وتیشی ” ئێمە دەتوانین ڕاهێنانییان پێ بكەین و پێداویستییان پێشكەش بكەین ، بەڵام ناتوانین ئیرادەی شەڕ كردنیان پێببەخشین”.
وەزیرە ئەمریكییەكە درێژەی پێداو وتی ” ئێمە راهێنان و پێداویستیمان پێشكەش كردن ، هیوادارم ئەوانیش ئیرادەی جەنگ كردنییان هەبێت، چونكە ناتوانن داعش تێكبشكێنن ئەگەر لەگەڵی نەجەنگن”.
ئاشتۆن كارتەر پێی وایە هێرشە ئاسمانییەكان رۆڵیكی كاریگەرییان هەیە ، بەڵام ناتوانن شوێنی ئیرادەی سوپای عێراق بۆ شەڕكردن بگرێتەوە”.
پێش چەند رۆژێك چەكدارانی داعش توانییان رومادی گەورە شاری پارێزگای ئەنبار كۆنترۆڵ بكەن.
