نوچەنێت.هه‌ولێر:
ئه‌نجومه‌نی ئاسایشی هه‌رێمی كوردستان،رایدەگەێنێت لە چوارچێوەی ئۆپەراسیۆنە هەواڵگرییەكانیان توانراوە گروپێكی تیرۆریستی داعش لەهەولێر دەستگیر بكرێت و سەرجەم پیلانەكانیان پوچەڵ بكرێتەوە.
ئەمڕۆ دووشەممە ئەنجوومەنی ئاسایشی هەرێمی کوردستان راگەیاندراوێکی بڵاوکردەوەو تێیدا هاتووە”لە چوارچێوەی ئۆپەراسیۆنە هەواڵگرییەكانی ئەنجومەنی ئاسایشی هەرێمی كوردستان، توانرا گروپێكی تیرۆریستی داعش دەستگیر بكرێت و سەرجەم پیلانەكانیان پوچەڵ بكرێتەوە.
ئەنجومەنی ئاسایش دەشڵێت”ئەم گروپە دەستگیركراوە پێكدێن لە شەش تیرۆریست و سەرجەمیان دانیشتوی هەولێرن، تیرۆریستان دانیان بەوەداناوە، لە رێگەی كەسانی توندڕۆ لە مزگەوتەكان بە بیری توندڕۆیی پەروەردەكراون و دواتر پەیوەندییان لەگەڵ گروپی تیرۆریستی داعش گرێداوە.
دەقی راگەیەنراوەكە:
راگەیاندراوێك لە ئەنجومەنی ئاسایشی هەرێمی كوردستانەوە
لە چوارچێوەی ئۆپەراسیۆنە هەواڵگرییەكانی ئەنجومەنی ئاسایشی هەرێمی كوردستان، توانرا گروپێكی تیرۆریستی داعش دەستگیر بكرێت و سەرجەم پیلانەكانیان پوچەڵ بكرێتەوە.
ئەم گروپە دەستگیركراوە پێكدێن لە شەش تیرۆریست و سەرجەمیان دانیشتوی هەولێرن، تیرۆریستان دانیان بەوەداناوە، لە رێگەی كەسانی توندڕۆ لە مزگەوتەكان بە بیری توندڕۆیی پەروەردەكراون و دواتر پەیوەندییان لەگەڵ گروپی تیرۆریستی داعش گرێداوە.
ئەم گروپە تیرۆریستییە لەلایەن داعشەوە داوایان لێكراوە كردەوەی تیرۆریستی لە شاری هەولێر ئەنجامبدەن، بۆ ئەم مەبەستە گروپەكە 18 بۆمبیان ئامادەكردووە و چەند شوێنێكی مەدەنییان دەستنیشانكردووە بۆ ئەنجامدانی كردەوەی تیرۆریستی و تێكدانی باری ئارامی كوردستان.
بە چاوكراوەیی دامودەزگاكانی سەر بە ئەنجومەنی ئاسایشی هەرێمی كوردستان، پێش ئەوەی ئەم گروپە پیلانە گڵاوەكانیان جێبەجێ بكەن، دەستگیركران و سەرجەم ماددەكانی تەقینەوەش دەستیان بەسەرداگیرا.
بەپێویستی دەزانین سوپاسی خەڵكی هەرێمی كوردستان بكەین كە بەردەوام هاوكار و پاڵپشتی دەزگا ئەمنیەكانن، كەسوكاری هەندێك لەو تیرۆریستانەش لەم ئۆپەراسیۆنەدا، هاوكاری دەزگا ئەمنییەكان بوون. لێرەشەوە داوا لە لایەنە پەروەردەیی و ئاینییەكان و خانەوادە بەڕێزەكان دەكەین، هەوڵی جددی و هەمەلایەن بدەن، لە پێناو هۆشیاركردنەوەی گەنجان و پاراستنیان لەو تەوژمە توندڕۆیی و تیرۆریستییەی كە ناوچەكەی گرتۆتەوە، بەتایبەتی ئەركی زانا و مامۆستایانی ئاینی ئیسلام لەم رووەوە بەگرنگ و پێویست دەزانین تاكو لە رووی هزرییەوە رووبەرووی فیكری توندڕۆیی ببنەوە، كە فكرێكی نامۆیە بە كۆمەڵگەی كوردستان.
ئەنجومەنی ئاسایشی هەرێمی كوردستان
18/5/2015
