نوچەنێت.هه‌ولێر:
لەكۆبوونەوەی نێوان سەرۆكایەتی پەرلەمان و كۆمەڵی ئیسلامی چەند پرسێك تاوتوێكراوەو ئەمیر كۆمەڵیش هەڵوێستی حیزبەكەی لەسەر دەستوورو سەرۆكایەتی هەرێم ئاشكراكرد.
بەمەبەستی گفتوگۆكردن لەسەر پڕۆژە یاسای دەستووری هەرێم و یاسای سەرۆكایەتی هەرێم و گەیشتن بەدەرئەنجامێكی دیاریكراو ئەمڕۆ دەستی سەرۆكایەتی پەرلەمانی كوردستان سەردانی مەكتەبی ئەمیری كۆمەڵی ئیسلامییان كردو لەگەڵ عەلی باپیر ئەمیری كۆمەڵ و بەرپرسانی ئەو حیزبە كۆبونەوە.
دوای كۆبوونەوەكەش لەكۆنگرەیەكی رۆژنامەوانیدا، یوسف محەمەد سەرۆكی پەرلەمان و عەلی باپیر ئەمیری كۆمەڵ ناوەڕۆكی كۆبوونەوەكەیان ئاشكراكرد.
لەكۆنگرە رۆژنامەوانییەكەدا عەلی باپیر لەبارەی هەڵوێستی حیزبەكەی لەسەر پرسی دەستوورو درێژكردنەوەی ویلایەتی مەسعود بارزانی، وتی:لەگەوو وەفدی سەرۆكایەتی پەرلەمان دەربارەی پرسی دەستور و سیستەمی حكومڕانی و پۆستی سەرۆكی هەرێم گفتوگۆمان كرد كە ئەو پرسانە باس و خواسی گەرم و گوڕیان لەسەرە و لەچەند مانگی داهاتوو وەكو واقیعێك رووبەڕویان دەبینەوە پێویستە لەئێستاوە زەمینە سازیان بۆ بكرێت.
ئەمیری كۆمەڵ وتیشی:ئێمە مەبدەئیەن رامان وایە ئەم هەرێمی كوردستانە پێویستە دەستورێكی هەبێت كە لەسەر بناغەی سازان و لێك تێگەیشتن ئامادەكرابێت و دەستورێك بێت زیاتر تەعبیر بكات لە خواست و ئاوات و هیوایەتەكانی خەڵی هەرێمی كوردستان و زیاتر حاكمیەتی خەڵك و دەسەڵات بەدەست خەڵكەوە بوونی تێدا بەرجەستە ببێت،پاشان هەموو ئەو بابەتانەی پەیوەندیان بەدەستورەوە هەیە وەكو سیستەمی حكومڕانی و مەسەلەی سەرۆكایەتی هەرێم و چۆنیەتی مامەڵەكردن لەگەڵ دەسەڵا تەكان دەبێت هەموو بەشێوەیەك بێت لەناو پەرلەمان لێك تێگەیشتنیان لەسەر بكرێت و پاشان بدرێنە راپرسی گشتی.
عەلی باپیر راشیگەیاند:دەبێت لەدەستوردا پرسی پۆستی سەرۆكی هەرێم چارەسەر بكرێت.
هاوكات هەر لەكۆنگرە رۆژنامەوانییەكەدا یوسف محەمەد وتی:كۆمەڵی ئیسلامی پشگیری ئەوەن كە ئەم پرسانە بەرێگەی یاسایی و دەستورییەكەی لەرێگەی دەنوستاندن لەپەرلەمانی كوردستان یەكلای بكرێنەوە و ئەوان چاوەڕی ئەوە دەكەن لێكتێگەیشتن لە نێوان لایەنەكان بێتەكایەوە
وتیشی:هەموان هەوڵدەین كە ئەو تەنگژانەی هەن بە شێوازێك چارەسەر بكرێن كە سیتەمی حكومڕانی لە هەرێمی كوردستان زیاتر بەرەوپێشەوە بچێت.
