نوچەنێت-بەغدا
دەستەی زانایانی مسوڵمانی عێراق (سوننە) داوای لە گەلانی جیهان و خاوەن بڕیاران و بەرپرسان و رێكخراوەكانی مافی مرۆڤ كردووە فریای سوننەكان بكەون و لە كوشتاری بە كۆمەڵ لەلایەن حكومەتی بەغدا و میلیشیا شیعەكان بیانپارێزن.
لە راگەیەنراوێكی دەستەكەدا كە ئەمڕۆ هەینی 3 ی نیسان بڵاوكراوەتەوە دەڵێ لە بەندیخانەی ناسریە 16 زیندانیی سوننە بە كارەبالێدان كوژراون.
كەس و كاری زیندانییە سوننەكان وتویانە كە ئەوان 6 مانگە نەیانتوانیوە ئەو بەندیكراوانە ببینن بە بەهانەی ئەوەی رێوشوێنی ئەمنیی توند پێویستە رێگاگرتن لە هەڵاتنی زیندانییەكان.
كاتێك دوای ئەو 6 مانگە دەچن رۆڵەكانیان ببینن، هەندێك لە زیندانییەكان دیار نەماون. بەرپرسانی بەندیخانەكە وتویانە هەركەسێك رۆڵەكەی لە زیندان نەماوە بابچێت لە پزیشكیی دادوەریی تەرمەكەی وەربگرێتەوە.
لەنێوان كوژراوەكان و زیندووەكانیشدا نیشانەی ئەشكەنجەدانی توند هەبوون، وەك شكاندنی ئێسقانی دەست و قاچ، بێئەوەی پیشانی پزیشكیش بدرێن بۆ چارەسەر.
دەستەكە دەڵێن فەرمانگەكانی پزیشكیی دادوەریش كاتێك بەڵگەنامەی مردن بۆ قوربانییەكان دەنووسن لایەنگری حكومەت دەكەن و ستەمەكانی دەشارنەوە، بەوەی نە ئاماژە بە هۆكاری مردنیان دەكەن، نە ئاماژە بە نیشانەكانی ئەشكەنجە دەكەن لەسەر جەستەیان.
