نوچەنێت.رووداو:
پارتی دیموکراتی کوردستان پرۆژەیەکی لەبەردەستەو دەیەوێت لەگەڵ لایەنە سیاسییەکانی دیکە قسەی لەسەر بکات، پرۆژەیەک کە ناوەڕۆکەکەی بریتییە لە دروستکردنی ئەنجوومەنێکی باڵای لایەنە سیاسییەکان بۆ گفتوگۆکردن لەگەڵ لایەنە سیاسییەکانی دیکەی عێراق و ئیدارەدانی گفتوگۆکانی نێوان هەولێر و بەغدا. وەک ئەندامێکی مەکتەبی سیاسی پارتی دەڵێت، قۆناغەکە وا دەخوازێت هەموو لایەنەکان بەرپرسیارێتییەکە بگرنە ئەستۆ و بەتەنها بۆ لایەنێکی جێنەهێڵن.
پرۆژەکەی پارتی دوو لایەنەیە، لایەنێکی دروستکردنی لیژنەیەکی باڵایە لە نوێنەرانی کورد لە بەغدا و حکومەتی هەرێمی کوردستان، بۆ ئەوەی لەگەڵ هاوتاکانی خۆیان لە بەغدا گفتوگۆ بکەن، لایەنێكی دیکەش بریتییە لە دروستکردنی ئەنجوومەنێکی باڵای سیاسی، کە سەرجەم حیزبەکان تێیدا بەشداربن و گفتوگۆی سیاسی لەگەڵ لایەنە سیاسییەکانی عێراق بکەن.
یەکێتیی نیشتمانیی کوردستانیش لەگەڵ ئەوەیە کورد بۆ کۆتاییهێنان بەو کێشانەی ١٢ ساڵە لەگەڵ بەغدا هەیەتی گفتوگۆکانی چڕبکاتەوە.
کیشەکانی نێوان هەولێر و بەغدا ئێستا لە کێشەی تەکنیکیدا بچووککراونەتەوە، بەڵام ئەوانەی لە سیاسەت دەزانن دەڵێن، ئەوە هەمووی بیانووە بەغدا بە هەولێری دەگرێت، ئەسڵی بابەت ئەوەیە ، ناکۆکی سیاسی کورد لەگەڵ دەسەڵاتدارانی بەغدا کە چەند دەیەیەکە بەردەوامە ، بەو ئاسانییە کۆتایی نایەت.
