عەبدولواحید دوكانی:پەیوەندیم بەمەكتەبی راگەیاندنی یەكێتی نەماوەو پێشكەشی ئەوانەبێت كە لێ دەخۆن و پێ دەوڵەمەند بون
نوچەنێت:
رۆژنامەنوسێكی یەكێتی،ئاشكرای دەكات كە هیچ پەیوەندیم بەمەكتەبی راگەیاندنی یەكێتی نەماوە،دەشڵێت،مەکتەبی راگەیاندن پێشکەشی ئەو برادەرانە بێت کە وەکو مەصدەری مەعیشی ساڵەهایە لێی دەخۆن و پێی دەوڵەمەند بون.
عەبدولواحید دوكانی،كادیر و رۆژنامەنووسی یەكێتی لە ئەكاونتی تایبەتی خۆی لە تۆڕی كۆمەڵایەتی فەیسبوك پۆستێكی بەناونیشانی(پەیوەندیم بە مەکتەبی راگەیاندنی یەکێتیەوە پچڕاند)بڵاكردوتەوە و نوسیویەتی”دوای 19 ساڵ و 7 مانگ کارکردن بە دڵسۆزی و بە پاکی لە مەکتەبی ڕاگەیاندنی ی ن ک ، ئەمڕۆ هەموو پەیوەندیەکی ئۆرگانیم بەو مەکتەبەوە پچڕاند و کۆتایم بەکارکردن هێنا . وە خۆم بە کوڕی دڵسۆزی یەکێتی دەزانم و تەنها خودی سەرۆک مام جەلالیش بە خاوەنی راستەقینە دەزانم”.
ناوبراو راشیگەیاندوە”مەکتەبی راگەیاندنیش پێشکەشی ئەو برادەرانە بێت(بەشێکیان ) کە وەکو مەصدەری مەعیشی ساڵەهایە لێی دەخۆن و پێی دەوڵەمەند بون،خەمیش بۆ ئەو کادر و ئیعلامیە دڵسۆزانەش دەخۆم کە ساڵەهایە وەکو مۆم دەسوتێن و ماندوو دەبن و ئەوانەی تر لەبەر روناکی شەوقی ئەوان خەرمانەکانیان گەورەتر دەکەن”.
ئاشكراشی كردوە”جارێ تا ئایندەیەکی نادیاریش نیازیم نیە هیچ کارێکی تری رەسمی لە هیچ ئۆرگانێکی تر وەربگرمەوە”.
