ههرێم لیژنهیهكی باڵا لهبارهی نهوتی داعش پێكدێنێتنوچە.نیت ووشە
نێچیرڤان بارزانی دەربارەی پرسی بەشداریی هەرێمی كوردستان لە حكوومەتی عیراقدا ڕایگەیاند “دەمانەوێ بەشداریی هەرێم لە حكوومەتی عێراقدا بە شێوەیەك بێت كە هەموو ئەو حیزبانەی لە حكوومەتی هەرێمی كوردستاندا بەشدارن، بەشداری لە حكوومەتی عێراقدا بكەن”، جەختیشی كردەوە “بۆ هەرێمی كوردستان بابەتی پۆستەكان زۆر گرینگ نییە، ئەوەی گرینگە یەكڕیزی و یەكهەڵوێستیی لایەنەكانی هەرێمی كوردستانە.” ئەوەشی گوت كە “ئەو داوایەمان لە عەبادی كردووە و چاوەڕێی وەڵام دەكەین.”
نێچیرڤان بارزانی سەرۆكوەزیرانی هەرێمی كوردستان ئەو قسانەی لە كۆبوونەوەی ئەمڕۆ چوارشەممەی ئەنجوومەنی وەزیراندا كرد و لە سەرەتای كۆبوونەوەكەدا، سەرۆكوەزیران باسی لە پرسی بەشداریی هەرێمی كوردستان لە حكوومەتی عیراقدا كرد و ڕایگەیاند “دەمانەوێ بەشداریی هەرێمی كوردستان لە حكوومەتی عێراقدا بە شێوەیەك بێت كە هەموو ئەو حیزبانەی لە حكوومەتی هەرێمی كوردستاندا بەشدارن، بەشداری لە حكوومەتی عیراقدا بكەن. بۆ هەرێمی كوردستان بابەتی پۆستەكان زۆر گرینگ نییە، ئەوەی گرینگە یەكڕیزی و یەكهەڵوێستیی لایەنەكانی هەرێمی كوردستانە.” ئەوەشی گوت كە “ئەو داوایەمان لە بەڕێز (عەبادی) كردووە و چاوەڕێی وەڵام دەكەین”، هەروەها ئاشكرای كرد كۆبوونەوەیەكی لایەنە سیاسییەكان لەسەر ئەم پرسە ئەنجام دەدرێت، دووپاتیشی كردەوە كە ئەولەویەتی حكوومەتی هەرێمی كوردستان ئەوەیە كێشەی نەوت و هەموو كێشەكان لەگەڵ حكوومەتی عیراق، لە ڕێگەی دیالۆگ و لێكگەیشتنەوە چارەسەر بكرێن.
سەرۆكوەزیران، تیشكی خستە سەر سەردانی چەند ڕۆژی ڕابردووی خۆی و شاندی حكوومیی یاوەری بۆ پارێزگای دهۆك و ڕوونی كردەوە “ڕەوشێكی مرۆییی زۆر خراپ لە سنووری پارێزگای دهۆك هەیە، بۆیە دەبێ حكوومەتی عێراق و كۆمەڵگەی نێودەوڵەتیش هاوكاری بكەن، تا ڕێگە لە گەورەتربوونی كارەساتە مرۆییەكە بگیرێت.” ڕوونیشی كردەوە ئەولەوییەتی یەكەمی حكوومەت لە وێ ئەوەیە پرۆسەی خوێندن لە پارێزگای دهۆك دەست پێبكات و ئەو ئاوارانەی لە قوتابخانەكاندا حەوێنراونەتەوه كە ژمارەیان (430) قوتابخانەیە، بگوازرێنەوە كەمپەكان و خوێندكاران بگەڕێنەوە سەر خوێندن.
هەروەها ئاماژەی بەوە دا كە “ڕاستە كارەساتەكە لە دهۆك زۆر گەورەیە و هەموو دامودەزگاكانی پارێزگای دهۆك، ئەوەی لە توانایاندا بووە كردوویانە، بەڵام لە خانەقینیش نزیكەی حەفتاهەزار ئاوارە ههن و لەگەڵ بەردەوامیی شەڕی دژی تیرۆرستان، دەبێ پێشبینیی هاتنی زیاتری خەڵكی ئاوارە بۆ هەرێمی كوردستان بكەین، بۆیە دەبێ هەم عیراق و هەم كۆمەڵگەی نێودەوڵەتیش هاوكاریی زیاتر پێشكەش بكەن.”
سەرۆكوەزیران داكۆكی لەوە كردەوە كە لە بارودۆخی لەمجۆرەدا حكوومەتی ناوەندی دەبێ هەست بە بەرپرسیاری بكات، خۆی بە خاوەنی بابەتەكە بزانێت و هەموو ئەو ئەركانەی دەكەوێتە ئەستۆی، جێبەجێ بكات. ئەوەشی گوت “ڕاستە حكوومەتی عیراق هەندێ هاوكاری ناردووە، بەڵام ئەو هاوكارییە بە هیچ شێوەیەك لە ئاستی گەورەیی كارەساتەكەدا نیە، بۆیە داوامان كردووە بەڕێز سەركۆمار، سەرۆك وەزیران و سەرۆكی پەرلەمانی عیراق؛ بێن سەردانی پارێزگای دهۆك بكەن و لە نزیكەوە ئاگاداری بارودۆخەكە ببن.”
لای خۆیەوە جێگری سەرۆكوەزیران(قوباد تاڵەبانی) باسی لەوە كرد كە وێڕای ئەو كارەساتە مرۆییەی لە سنووری پارێزگای دهۆك هەیە و ئەو گوشارە زۆرەی كەوتووەتە سەر دامودەستگاكانی پارێزگاكە، بەر لەو قەیرانەش پارێزگای دهۆك كێشەی كەمیی میلاكاتی هەیە و داوای كرد كە هەموو وەزیرەكان بچن خۆیان سەردانی پارێزگاكە بكەن، بۆ ئەوەی لە نزیكەوە ئاگاداری ڕەوشەكە ببن و چی لە توانادا بێت، هاوكاری بكرێت.
پاشان هەر یەك لە وەزیرەكان پوختەیەكیان دەربارەی ئەو ئەركانە پێشكەش كرد، كە دەبێ لە لایەن دامودەزگای وەزارەتەكانیانەوە لە سنووری پارێزگای دهۆك ئەنجام بدرێن و چەندین داواكاری و پێداویستییان خستە ڕوو، بۆ ئەوەی بتوانن وەك پێویست لە كەمكردنەوە و بەڕێوەبردنی قەیرانی مرۆیی لە سنووری پارێزگای دهۆكدا، هاوكار بن. داكۆكیش لەوە كرایەوە كە هەر لە ئێستاوە هەموو ئامادەكارییەك بكرێت و هەموو ڕێكارە پێویستەكان بگیرێنە بەر، بۆ ئەوەی لە وەرزی سەرما و سۆڵەدا كە بەڕێوەیە، قەیرانی مرۆییی ئاوارە و پەنابەران، قورستر نەبێت. هەروەها سوپاسی هەموو دامودەستگاكانی حكوومەت لە هەرێمی كوردستان و لە سنووری پارێزگای دهۆك بە گشتی و، بە تایبەتیش زانایان و مامۆستایانی ئایینی كرا، كە ڕۆڵێكی گرنگیان لە چۆنیەتیی مامەڵەكردن لەگەڵ بارودۆخی ئەمڕۆی كوردستاندا؛ گێڕاوە.
لە كۆبوونەوەكەدا، سەردانی وەزیری سامانە سرووشتییەكان بۆ كۆماری ئیسلامیی ئێران و گفتوگۆكانی لەگەڵ بەرپرسانی ئێرانی بۆ پتەوكردنی بازرگانی و هاوكاری و هەماهەنگیی هەولێر و تاران لە بواری وزە و نەوتدا، هەروەها سەردانی وەزیری ئەوقاف و كاروباری ئایینی لەگەڵ شاندێكی یاوەری بۆ وڵاتانی ئەورووپا و، دیدار و كۆبوونەوەكانی لەگەڵ ناوەندە سیاسی و ئایینییەكان و بەشدارییان لە چەند چالاكییەكی جیادا، لەگەڵ بەشداریكردنی وەزیری كشتوكاڵ و سەرچاوەكانی ئاو لە كۆنفرانسێكی نێودەڵەتیی تایبەت بە ئاودا لە ئیستانبووڵ و، داكۆكیكردنی بۆ بەكارهێنانی ئاو وەك هۆكارێك بۆ ئاشتی و لەبەچاوگرتنی پێداویستییەكانی هەرێمی كوردستان لە ئاو بەرز هەڵسەنگێنرا. داكۆكیش لەوە كرایەوە كە سەركەوتنی هاوكاری و هەماهەنگیی بواری نەوت و وزە لە نێوان هەرێمی كوردستان و كۆماری ئیسلامیدا، بە سوودی هەرێمی كوردستان دەشكێتەوە.
لە كۆبوونەوەكەدا، بڕیاردان لەسەر بابەتی جێبەجێكردنی بڕیارەكان و فەرمانی هەرێمیی تایبەت بە پارێزگابوونی هەڵەبجە و دەستنیشانكردنی میكانیزمی دانانی پارێزگار و جێگرەكانی و پەیكەری كارگێڕیی پارێزگاكه، گفتوگۆی لەسەر كرا و، بڕیار درا لیژنەیەك لە ئەنجوومەنی وەزیران لە هەر یەك لە وەزیرانی ناوخۆ، دارایی، كاروباری شەهیدان و كاروباری پەرلەمان پێك بێت، بە ئەوەی لەگەڵ پەرلەمان و لایەنە سیاسییە كوردستانییەكان، ئەم پرسە و دەستنیشانكردنی پارێزگارێك بۆ هەڵەبجە تاوتوو بكەن و، بگەنە بڕیاری كۆتایی.
لە كۆبوونەوەكەدا باس لە ئەگەری قاچاخیكردن بەو نەوت كرا كە لە سنووری ناوچەكانی ژێر دەسەڵاتی تیرۆریستانی داعشەوە دەردەچێت و، بڕیار درا لیژنەیەكی باڵای تایبەت بە ئەندامیەتیی وەزیرانی پێشمەرگە، ناوخۆ، سامانە سرووشتییەكان و سەرۆكی دەستگای ئاساییشی هەرێمی كوردستان پێك بێت، بۆ ئەوەی زۆر بە وردی، چاودێری و بەدواداچوون بۆ ئەم بابەتە بكرێت و، هەموو ڕێكارێكی توند و پێویست و بەپەلە بۆ ڕێگەگرتن لە هەر ئەگەرێكی ئەو قاچاخیكردنە بگریتە بەر و، بە توندی ڕووبەڕووی ببنەوە.
