فازل میرانی بۆ نوچە: ئەركی یەكێتییە لە نەجمەدین كەریم ببپرسێت، چۆن قسەكانی عامری قبوڵ كردووە

فازل میرانی بۆ نوچە: ئەركی یەكێتییە لە نەجمەدین كەریم ببپرسێت، چۆن قسەكانی عامری قبوڵ كردووە

 

 

“ئەو حیزبانەی كێشەی بەنزین وەك كارتێكی سیاسی بەكار دەهێنن، لە بەرژەوەندی گشتی لایان داوە بەرەو بەرژەوەندی تایبەتی و حیزبی”

 

 

 

نوچە: هەولێر

 

فازل میرانی سكرتێری مەكتەبی سیاسی پارتی دیموكراتی كوردستان رایگەیاند، پرسی كەركووك پرسێكی نەتەوەییە و لێدوانی هەر وەزیر و پارێزگارێك كاریگەری لەسەر پرسەكە نابێت، دەربارەی لێدوانەكانی هادی عامریش وتی “ئەوە ئەركی یەكێتییە لە نەجمەدین كەریم بپرسێت چۆن قسەكانی عامری قبوڵ كردووە”.

فازل میرانی سكرتێری مەكتەبی سیاسی پارتی دیموكراتی كوردستان، بۆ نوچەنێت ئاماژەی بە پرسی كەركووك دا و وتی “پرسی كەركووك پرسێكە، كە بە وتەی ئەم وەزیر و ئەو وەزیر و ئەم پارێزگار و ئەو پارێزگار ناگۆڕدرێت، پرسی كەركووك پرسێكی نەتەوەیی كوردە و كەركووك كوردستانییە، بە بڕوای من كێشەی كەركووك چارەسەر بووە، راستە لە دەرەوەی ئیدارەی هەرێمە بەڵام ئەوەتا پارێزەگارەكەی كوردە و پێشمەرگەی لێیە، بەڵام ئەوەی گرنگە بۆ چارەنووسی ئەو شارە رەئی خەڵكەكەیە، وەك جەنابی سەرۆكیش فەرمووی، هەركاتێك ریفراندۆممان كرد و خەڵكی كەركووك هەر بڕیارێكیان دا، ئێمە رێز لە بڕیارەكانیان دەگرین”.

میرانی لەسەر لێدوانەكانی هادی عامری كە لە كاتی سەردانی پارێزگای كەركووكدا، هێزی پێشمەرگەی بە كارتۆنی وەسف كردبوو، رەخنە لە نەجمەدین كەریم پارێزگاری كەركووك گرت و وتی “نەجمەدین كەریم تەنها پارێزگاری كەركووك نیە، ئەندامی مەكتەبی سیاسی یەكێتی نیشتیمانی كوردستانیشە، ئەوە ئەركی برایانی یەكێتییە كە قسەی لەگەڵ بكەن، كە بۆ ئەوەی قبوڵ كردووە هادی عامری لە تەنیشتی ئەو قسانە بكات، هەرچەندە مرۆڤ ناتوانێت دەمی میوانی خۆی بگرێت، بەڵام هەق بوو لە دوای ئەو، ئەمیش قسەیەكی بكردایە، بەڵام بە رای من پرسی كەركووك بە قسە و تەسریح تەواو نابێت، پرسی كەركووك لای ئێمە پرسێكی ستراتیژییە و رەنگە لای خەڵكی تریش هەر پرسی ستراتیژی بێت”.

لە بەرانبەر ئەو وتەیەی نەجمەدین كەریم كە وتبووی “ریفراندۆم بەس نیە و ئەگەر (51%) دەنگ بە گەڕانەوەی كەركووك بدەن بۆ سەر هەرێمی كوردستان، مەرج نیە بگەڕێتەوە سەر هەرێم”، فازل میرانی وتی “نەجمەدین كەریم پارێزگاری كەركووكە مرۆڤێكی خوێندەوارە و خاوەن بڕوانامەی دكتۆرایە و خەڵكی كەركووكیشە، بۆیە من تەسەور ناكەم ئەو دەستبەرداری كوردایەتی كەركووك بهبێت، بۆ ئەو بابەتە دەستوور هەیە و دەستووری عێراق ئەو بابەتە چارەسەر دەكات، دەستووری هەرێمیش لە دوای دەستووری عێراق دەردەچێت، بۆیە لەو كاتەدا پەنا بۆ دەستوور و یاسا دەبەینەوە”.

میرانی دەربارەی پەیوەندی پارتی و یەكێتیش وتی “ئێمە و یەكێتی شەریكین، جاران دەیانوت شەریك و بران، ئێستا دەڵێن شەریكن، بە بڕوای من ئێستا ئێمە و یەكێتی شەریكین، بەڵام ئێمە هەوڵ دەدەین ببینە شەریك و برای یەكتریش”.

دەربارەی خۆپیشاندانەكانی خەڵكیش لەسەر بەنزین میرانی وتی “خەڵك ئازادە خۆپیشاندان بكات، بەڵام پەیامی من ئەوەیە، میللەتی ئێمە دەبێت ئەوەندە هوشیار بێت كە ئەمڕۆ هەرێمی كوردستان پەیوەندی لەگەڵ بەغدا باش نیە، لە مەترسی شەڕی داعش و تیرۆر دایە، رۆژانە پێشمەرگە لە پێناو كوردستان شەهید و بریندار دەبن، بۆیە لە جیاتی ئەوەی خەڵكی ئێمە و شەقامی كوردی خەمی ئەو شتانە بخوات، قەزییەكیان وروژاندووە بە ناوی قەزییەی بەنزین، بە بڕوای من ئەگەر خەڵكانێك لە دەرەوەی كوردستانەوە سەیری ئەو قەزییەیە بكەن، دەڵێن دیارە كورد قەزییە ستراتیژییەكانی واز لێهێناوە و چۆتە سەر قەزییە تایبەتییەكان، ئەگینا نرخی لیتری بەنزین بۆ تاكسییەكان هەر (500) دینارە و بۆ پاسەكان هەر (500) دینارە، كەواتە ئەوەی پەیوەندی بە خزمەتگوزاری گشتییەوە هەیە، رەچاو كراوە، لە هەموو وڵاتانی دونیایش كە شەڕ یان قەیران روویان تێدەكات، هاووڵاتیانیش بەشێك لەو قەیرانانەیان دەكەوێتە ئەستۆ، ئینجا لە زیاد كردنی باجەوە بێت هەتا هەتا تەبەروعات و هەتا دواكەوتنی موچەیش، بەڵام بە داخەوە خەڵكی ئێمە تا ئێستا خۆی لەگەڵ ئەو دۆخە نەگونجاندووە، كە ئەمەیش رەنگە پێویستی بە كات هەبێت”.

دەربارەی ئەو لایەنە سیاسییانەیش كە لە پشت خۆپیشاندانەكانەوەن وتی “ئەو حیزبانەیش كە ئەو كێشەیە وەك كارتێكی سیاسی بەكار دەهێنن، لە بەرژەوەندی گشتی لایان داوە بەرەو بەرژەوەندی تایبەتی و حیزبی، چونكە ئەو كێشەیەیان خستۆتە سەر لایەنێكی تر، كێشەی بەنزینیان ووژاندووە، كەچی كێشەی شەڕی داعشیان فەرامۆش كردووە”، وتیشی “باشترین شت لەم دۆخەدا ئەوەیە، كە كورد پەنا بۆ یەكڕیزی ببات، یەكڕیزی كورد زامنی هەر هەنگاوێكە كە لە دوای ئەم كێشانەوە بێت”.