ژنكوژی….. بەشێك لە مێژووی
خەباتی سیاسی ئیسلامییەكانی كوردستان
راپۆرتی: رێبوار رەزا چوچانی
هەڵدانەوەی مێژووی حیزبە جیهادییە ئیسلامییەكانی كوردستان، سەرەتایەكە بۆ دەركەوتنی بەشێك لەو كارە نهێنییانەی كە پێی هەستاون، لەو مێژووەشدا، كوشتنی ژن بەبیانووی جۆراوجۆر یەكێك بووە لەو كارانەی كە لەزۆربەی قۆناغەكاندا دووبارە بۆتەوە.
هەڵدانەوەی مێژووی حیزبە ئیسلامییەكانی كوردستان، بەتایبەت حیزبە جیهادییەكان، ئەگەرچی كارێكی ئاسان نییە، بەڵام گرنگییەكەی لەوەدایە، كە ئەو هێزانە لەگەڵ ئەوەی كاریگەرییان لەسەر رووداوە سیاسییەكان هەبووە، بەڵام ویستوویانە لەرێگەی بەكارهێنانی توندوتیژییەوە هەوڵی كۆنترۆڵكردنی هەموو بوارەكانی دیكەی ژیانیش بدەن، ئەو هێزانە ئەگەرچی لەرۆژگاری ئەمڕۆدا، وەك كۆمەڵێك هێزی میانڕەو خۆیان نیشان دەدەن، بەڵام مێژوویەكییان هەیە لەتوندوتیژی، كە لەسەرەتای دروستبوونیانەوە پەنایان بۆ بردووە، كادیرێكی لەشكری قورئان كە مێژووی ئەو لەشكرە دەگەڕێنێتەوە بۆ پێش دروستبوونی بزووتنەوەی ئیسلامی، دان بەوەدا دەنێت، كە لەو سەردەمەدا ئیسلامییەكان بەبیانووی جۆراوجۆر پەنایان بردۆتە بەر ژنكوژی، ئەو كایرە كە سەروەختێك یەكێك بووە لەبەرپرسەكانی بزووتنەوەی ئیسلامیش، دەڵێت “ئێستاش ئەو حیزبە ئیسلامییانە خەڵكیان تێدایە، ئەگەر پێیان بكرێت دەست دەكەنەوە بە ژنكوژی”.
كوشتنی مرۆڤ ئەگەرچی پەیوەندی بەتێكچوونی باری دەروونی و شێوەی پەروەردەكردنی مرۆڤەكانەوە هەیە، بەڵام بیروبۆچوونە سیاسی و ئایدیۆلۆژی و ئاینییەكانیش لەو رووەوە رۆڵی خۆیان هەیە، چونكە رادەی توندوتیژی لەناو بیركردنەوەكانی مرۆڤدا، رێگە خۆش دەكات بۆ كوشتن و سڕینەوەی بەرانبەر، دەركەوتنی فیكری توندوتیژی ئاینی لەهەرێمی كوردستانیش، دەگەڕێتەوە بۆ سەرەتای سەرهەڵدانی رەوتە جیهادییە ئیسلامییەكان، چونكە سەرهەڵدانی ئەو رەوتانە بەشێكن لەو مێژووەی كە هەرێمی كوردستان پێیدا تێپەڕی و ململانێ فیكرییەكانی بەرەو ئاراستەی توندوتیژی برد، بەجۆرێك هەڵدانەوەی ئەو مێژووە، وەك هەڵدانەوەی قەتماغی برینێكی بەسۆ وایە، كە ئازار بەخشە، هاوكات وەك دەستبردنیش وایە بۆ ئاگرێك، كە دوور نییە دەستت بسوتێنێت.
بڵاوبوونەوەی بیری ئیخوان موسلمین لەعێراق و لەكوردستانیش بە سەرەتای كاری رێكخراوەیی ئیسلامی دادەنرێت، لەكوردستان كوڕەكانی عەبدولعەزیز (مەلا عومەر عەبدولعەزیز، مەلا عوسمان عەبدولعەزیز، مەلا عەلی عەبدولعەزیز، مەلا سدیق عەبدولعەزیز)، بە كەسەكانی پشتەوەی پەرەسەندنی بیری ئیخوان موسلمین دادەنرێن، بەتایبەت (مەلا عوسمان عەبدولعەزیز)، لەدوای سەرهەڵدانی ئیخوانیشەوە، بیرۆكەی دامەزراندنی حیزبێكی جیهادی لەلایەن كۆمەڵێك مەلا گەڵاڵە بوو، كە سەرەتا بەدامەزراندنی بزووتنەوەی پەیوەندی ئیسلامی دەستیپێكرد، ئەو بزووتنەوەیە كۆمەڵێك مەلا بوون و لەئێران نیشتەجێ بوون، (شێخ محەمەد بەرزنجی) پێشەوای ئێستای كۆمەڵی ئیسلامی رابەرایەتی دەكردن، بەڵام دوای چوونی (شێخ عەبدوللەتیف واژەیی)، رابەری بزووتنەوەكە (شێخ محەمەد بەرزنجی) وازی لەرابەرایەتیكردن هێنا و ئەویش جێگەی گرتەوە، (شێخ عەبدوللەتیف واژەیی) مامۆستای زانكۆ بووە و ئیمام و خەتیبی مزگەوتی (عەلی كەمال) بووە لەسلێمانی، وەك سەرچاوە مێژووییەكان باسی دەكەن، لە(2/9/1986) لەكۆنگرەی دووەمی بزووتنەوەی پەیوەندی ئیسلامی، بە رابەر هەڵبژێردرا، دامەزراندنی بزووتنەوەی پەیوەندی ئیسلامی، دەگەڕێتەوە بۆ ساڵی (1978)، ئەو بزووتنەوەیە لەسەرەتادا رێكخراوێك بوو، كە تەنها كاری دەعوەیان دەكرد، بەڵام لەساڵی (1981)دا، لەشكری ئیسلامی لەلایەن (عەباس شەبەك) كە زیاتر بە (ئەبو ئوسامە) دەناسرا دامەزرا، لەشكری ئیسلام بەیەكەم لەشكری چەكداری ئیسلامی دادەنرێت لەهەرێمی كوردستاندا، بەپێی بەڵگەنامە مێژووییەكان، دامەزرێنەرانی ئەو لەشكرە بریتین لە (عەباس شەبەك، شێخ قادر سۆتكەیی، مەلا حسێن مارۆنی)، ئەو لەشكرە بارەگای سەرەكییان لەتاران بووە، چەكدارەكانیان موچە و كەلوپەلی سەربازییان بۆ دابین كراوە، بڵاوكراوەیەكیان هەبووە بەناوی (سلیب المؤمین) بۆیە وەك كادیرێكی لەشكری قورئان باسی دەكات، لەشكری ئیسلام دروستكراوی وڵاتانی ئێران و لیبیا بووە، ئەو كادیرە كە پێی باش نەبوو ناوی بهێنرێت، دەشڵێت “حیزبە عەلمانییەكانی كوردستان خەڵكی خۆیان خزاندە ناویانەوە، بەتایبەتی یەكێـتی خەڵكی زۆر ناردە ناویان، كەسی وایان تێدا بوو من دەیناسم، خەڵكی قەڵادزێ بوو، مەشروبخۆر و نوێژنەكەر بوو”، هەر بەپێی سەرچاوە مێژووییەكان، لەشكری ئیسلام لەسەر دەستی یەكێتی نیشتیمانی كوردستان كۆتاییان پێهاتووە، چونكە یەكێتی بە زۆری هێز، دەستیان بەسەر بارەگاكانیاندا گرتووە.
دروستبوونی لەشكری ئیسلام، دەبێتە هۆكار بۆ دروستبوونی لەشكری قورئان، كە باڵی سەربازی بزووتنەوەی پەیوەندی بوو، ئەو لەشكرە بەپێی سەرچاوە مێژووییەكان، لە(19/4/1985) دروستكرا، وەك بەرپرسێكی باڵای بزووتنەوەی ئیسلامی ئاماژەی پێدەدات، كامیلی حاجی عەلی رۆڵی سەرەكی هەبووە لەرێكخستنی بزووتنەوەی پەیوەندی ئیسلامی و هەروەها لەشكری قورئانیش. (عەباس محەمەد) كه ناسراوه به حاجی بیلال، راوێژكاری تایبەتی مەلا عەلی عەبدولعەزیز رابەری كۆچكردووی بزووتنەوەی ئیسلامی دەڵێت “حاجی كامیلی حاجی عەلی رۆڵی سەرەكی هەبووە، لەسەرەتا هەتا كۆتایی هەموو قۆناغەكانی بڕیوە، كە لەبواری تەنزیمیدا بووە، واتە رێكخەری ئیشوكارەكان بووە، حاجی كامیل كاری نهێنی دەكرد، وەك رێكخستنی پەیوەندییەكان چونكە لە رێی پشدەرەوە دەچووە ئێران، بۆیە لەو كاتەشدا جاشەكانی ئەو ناوچەیە، هاوكاری كادیرەكانی بزووتنەوەی پەیوەندی ئیسلامییان دەكرد، نوسراویان بۆ كەسەكانی بزووتنەوە دەكرد، بۆ ئەوەی بێنەوە بۆ ئەمدیوو”.
هەر بەپێی زانیارییەكانی ئەو راوێژكارە، كەسە دیارەكانی بزووتنەوەی پەیوەندی ئیسلامی لەناوچەی سلێمانی بریتی بوون لە (كامیل حاجی عەلی، ئەحمەدی عەبە دەلاك كە ناوە نهێنییەكەی حاجی مەهدی بوو، حاجی محەمەدی قەرەداغی، حەسەنی حەمە خالید كە زاوای نەوشیروان مستەفایە، بەڵام هەرزوو وازی لێهێناون، ئەوكات هەوڵدرا مەلا شێخ خالیدی مزگەوتی دارۆغا كە سۆفی بووە، رازی بكرێت ببێتە ئەمیری ئەو گروپە، بەڵام رازی نەبووە).
بەپێی ئەو زانیاریانەی دەست (سڤیل) كەوتوون، بەشێك لەچالاكییەكانی لەشكری قورئان، بریتی بووە لەكوشتنی ئەو ژنانەی كە تۆمەتی لەشفرۆشیان لەسەر بووە، یان تۆمەتبار بوون بەئەنجامدانی كاری سیخوڕی بۆ رژێمی بەعس، بەڵام ئەو راوێژكارەی رابەری كۆچكردووی بزووتنەوەی ئیسلامی، ئەوە رەت دەكاتەوە، كە كوشتنی ژنان لەو دەمەدا بووبێتە دیاردەیەك، دەڵێت “ئەوكات كۆمەڵەی رەنجدەرانی كوردستان زیاتر چاودێری ئەو ئافرەتانەی دەكرد و دەیكوشتن، كە دەزگا سیخوڕییەكان بەكاریان دەهێنان، لەدوای ساڵانی (1987) و (1988) بزووتنەوەی ئیسلامیش ئەو بەرنامەیان هەبوو و ئەو كارانەشیان دەكرد، بەڵام لەواقیعدا ئەوە نەبووە كە بوترێت فڵانی كچی فڵان دەبێت بكوژرێت”، هەروەها دەڵێت “لەدوای راپەڕینیش شت روویدا لەسلێمانی، بۆ نموونە خێزان هەبوو ئیبادە كران، بەتۆمەتی لەشفرۆشی و تێكەڵبوون لەگەڵ حكومەتی بەعس، كە ئەو كارانە هەندێكیان پەیوەندییان بەئیسلامییەكانەوە نەبوو”.
رەتكردنەوەی ژنكوژی لەلایەن بەرپرسانی ئیسلامی سیاسییەوە، بەهێشتنەوەی نهێنی ئەو كارانە دادەنرێت، كە بزووتنەوە چەكدارییە ئیسلامییەكان پەنایان بۆ بردووە، بەڵام ئەوكارانە بەشێكن لەمێژووەكەیان، كادیرە سەربازییەكەی لەشكری قورئان، دان بەوەدا دەنێت كە ئەو لەشكرە دەستیان هەبووە لەو ژنكوژییەدا، ئەو كادیرە كە سەروەختێكیش لەناو بزووتنەوەی ئیسلامیدا بەرپرسیارێتی هەبووە، دەڵێت “ئەوان ئافرەتیان كوشتووە، ئێستاش خەڵكی وا هەیە لەدەستی بێت وا دەكات، ئیتر نازانم بۆ دەیخەنە پاڵ چەپەكان، من ئەوكات و ئێستاش هەندێك شت هەیە پێم چاك نەبووە، بەڵام ئەوكات رەنگە بڕیاری شەخسی بووبێت و كەسێك لەخۆیەوە وای دەكرد، وای دەزانی بەكوشتنی ئافرەتێكی داوێنپیس، ئیتر دنیا هەمووی سەرەوبن دەبێت”، ئەو كادیرەی سەربازییەی لەشكری قورئان، پێی سەیرە كە بەرپرسە ئیسلامییەكان، هەوڵی گۆڕینی مێژووی خۆیان دەدەن، دەڵێت “ئەوە ئەتویلێكی باشە بۆ ئەوەی لەسەر خۆیان لای بەرن، بەڵام من دەزانم خەڵكی وا هەیە ئەو كات و ئێستاش بەدوای شتی وەهادا دەگەڕان، ئەو شتانەش زۆر بەنهێنی دەكران و بەنهێنیش ماونەتەوە، بەڵام ئەوان تەنها ئافرەتی داوێنپیسیان نەدەكوشت، بەڵكو ئەوانەش كە كاری سیخوڕییان دەكرد”.
دەستخستنە ناو ئازادییە شەخسییەكانی مۆرڤ، بەشێكە لەسروشتی پێكهاتەی هێزە ئیسلامییەكان، كە زۆرجار ئەو هێزانە هەوڵی كۆنتڕۆڵكردنی هەڵسوكەوتی مرۆڤیش دەدەن، ئەو كادیرەی لەشكری قورئان دەڵێت “لەسەرەتای راپەڕینیش كە هاتینەوە، خەڵكمان هەبوو دووكان بە دووكان دەگەڕا بۆ شكاندنی شریتی ڤیدیۆ و دەیانگرت لەخەڵك، بەڵام لەو كاتەدا شتی لەوە گەورەتر هەبوو بیكەین، ئەو شتە بچوكانەش زۆرجار شەڕ و ئاژاوەی بۆ دروست دەكردین”، رەتیشی دەكاتەوە، كە هیچ كاتێك لەشكری قورئان و بزووتنەوەی ئیسلامیش، ئەو چالاكیانەیان بەشێوەیەكی راستەوخۆ بە ناوی خۆیانەوە تۆمار كردبێت، دەڵێت “ئەوكاتیش كە لەبڵاوكراوەیەكدا بڵاو دەكرایەوە وەك چالاكی، لەشكری قورئان و بزووتنەوەش خۆیان لێنەدەكرد بە خاوەن، ئەمانە بە چالاكی حساب نەكراون و باسیشیان نەكردووە”، بەبڕوای ئەو، هیچ كاتێك چەپەكان نەیانتوانیوە بخزێنە ناو لەشكری قورئانەوە، تا بەهۆی ژنكوژییەوە ئەو هێزە ئیسلامییە لەكەدار بكەن، “چونكە پێشمەرگەكانی لەشكری قورئان، خەڵكی عەقایدی بوون و چەپەكان نەیاندەتوانی ئەو هەموو ئیلتیزامە ئاینییە جێبەجێ بكەن”.
بەپێی ئەو سەرچاوانەی لەبەردەست (سڤیل)دان، كەسە جیهادییە دیارەكانی لەشكری قورئان بریتی بوون لە (مەلا عەبدولقادری برایەتی، مەلا سەلمان، محەمەد هەولێری، مەلا وریا خۆشناو)، كە لەسنووری هەولێردا، بەبێ گەڕانەوە بۆ سەركردایەتی بزووتنەوەی پەیوەندی، كاریان كردووە و فەرمانیان لەكەس وەرنەگرتووە، بارەگای (هێزی شافیعی) لەشكری قورئان كە تایبەت بووە بە سنووری شاری هەولێر، لە گوندی مەلەكان بووە، بەڵام ئەو لەشكرە چەند هێزێكی دیكەشیان هەبووە، بەناوی (هێزی حەسەن بەننا، هێزی خالیدی كوڕی وەلید لەناوچەكانی سلێمانی و شارباژێڕ و پێنجوێن، هێزی حەمزە، هێزی سەلاحەدین بۆ ناوچەی هەورامان و هەڵەبجە و شارەزوور و گەرمیان، هێزی فاروق بۆ ناوچەكانی كەركووك و قەرەداغ، …هتد)، ئەو كادیرەی لەشكری قورئان، ئەوەش ئاشكرا دەكات، كە جگە لەو كەسە عەسكەرییانە، لەناو شاری هەولێریشدا شورایەكیان هەبووە، كە بریتی بوون لە (مەلا محەمەد كونهفلوسهیی بەرپرسی شورای ناوشاری هەولێر بوو، حاجی منەوەر، دكتۆر موخلیس، موشیر گەڵاڵی، كەسێكی توركمان).
بەڵام بەپێی زانیارییەكانی ئەو كادیرە سەربازییەی لەشكری قورئان، لەكاتی دروستبوونی لەشكری قورئان، دوو گروپی جیهادی دیكە لەناو شاری هەولێردا كاریان كردووە و پەیوەندییان بە لەشكری قورئانیشەوە نەبووە، وەك گروپەكەی (مەلا ئەمینی جیهاد) و گروپەكەی (محەمەد ئیحسان)، كادیرەكەی لەشكری قورئان دەڵێت “ئەوكات ئەو گەنجانەی لەدەوری مەلا ئەمین كۆبووبوونەوە، لەبزووتنەوەش زیاتر بوون، چونكە لەزۆربەی مزگەوتەكان دەرسیان هەبوو، ئەمجۆرە كارانەیان دەكرد و پرسیان بەكەسیش نەدەكرد”، بە وتەی ئەو، گروپەكەی (مەلا ئەمین)، گروپێكی سەلەفی بوون و ژمارەشیان لەلایەنگرانی ئەوان زیاتر بوون، بۆیە تێكەڵ بە لەشكری قورئان و دواتریش بزووتنەوەی ئیسلامی نەبوون، هەر بەپێی وتەی ئەو، گرووپی دووەم، گروپی (محەمەد ئیحسان)ـە، كە زیاتر لە(50) قوتابی هەبووە و لەنزیكی گەڕەكی تەیراوە بوون، ماوەیەكی زۆر بەشێوەیەكی سەربەخۆ كاریان كردووە، بەڵام دواتر چۆتە ناو بزووتنەوە و (مەكتەبی فورقان)ـیان بۆ دامەزراندووە، ئەو كادیرەی لەشكری قورئان دەڵێت “ئەو گرووپانە كاری ژنكوژییان دەكرد، چونكە لەشكری قورئان لە دەرەوە دامەزرا و ئەمانیش غیرەتییان جوڵا و دەیانویست بوونی خۆیان بسەلمێنن”، هەر بە وتەی ئەو كادیرە، لەدوای راپەڕین (مەلا ئەمین) بۆ ماوەیەك چۆتە ناو بزووتنەوی ئیسلامی، بەڵام دواتر كشاوەتەوە و كۆمەڵەی جیهادی دروست كردووە و دواتر (مەلا ئەمین) لەكردەوەیەكی نادیاردا كوژرا.
لەدوای راپەڕینە جەماوەرییەكەی شارۆچكەی هەڵەبجە لەمانگی مایسی ساڵی (1987) و هەڵهاتنی (مەلا عوسمان عەبدولعەزیز) و دامەزراندنی بزووتنەوەی ئیسلامی لەحوزەیرانی ساڵی (1987)، (شێخ عەبدوللەتیف واژەیی) واز لەرابەرایەتی بزووتنەوە دەهێنێت و (مەلا عوسمان) دەكرێتە رابەری گشتی بزووتنەوەی ئیسلامی، ئەو مەلایانەش كە بزووتنەوەی ئیسلامیان دروست كرد، بریتی بوون لە (مەلا عەلی بیارە، مەلا مەغدید كە خەڵكی ناوچەی پشدەر بوو، مەلا ئەحمەدی كانی توو، مەلا شێخ عەبدوللەتیف، مەلا شێخ محەمەد بەرزنجی، مەلا عومەر عەبدولعەزیز، مەلا عوسمان عەبدولعەزیز، مەلا ئەحمەدی كاكە مەحمود، مەلا عەلی عەبدولعەزیز)، بەڵام بەپێی زانیاری راوێژكارەكەی رابەری كۆچكردووی بزووتنەوەی ئیسلامی، ئەوكات (مەلا سدیق عەبدولعەزیز) كە بنەماڵەی (عەبدولعەزیز)ییەكانە، “لە خەتی دوو بوو و لەگەڵ ئیخواندا بوو، بەڵام كێشەیان هەبوو لەگەڵ سەلاحەدین موحەمەد بەهائەدین، چونكە ئەو كات پێیوابووە غەدرو خیانەتیان لەو كردووە، چونكە هەڵبژاردنیان كردووە و ئەو دەرنەچووە و لەجێگەی ئەو سەلاحەدین موحەمەد بەهائەدین دەرچووە، بۆیە كە چووە ئەو دیو و بارودۆخەكەی بینی، جیابووەوە لەئیخوان و لەكاتی راپەڕین بزووتنەوەی نەهزەی ئیسلامی راگەیاند”.
یەكەم سەركردایەتی بزووتنەوەی ئیسلامی، كە دامەزرا بریتی بوون لە(مەلا شێخ عەبدوللەتیف واژەیی، مەلا عەلی بیارە، مەلا عەلی عەبدولعەزیز، مەلا عەلی باپیر، مەلا عومەر عەبدولعەزیز، مەلا ئەحمەد كاكە مەحمود، مەلا مەحمود ئازادی، مەلا ئەبوبەكر سدیقی، مەلا ئەبو عەلی موسڵی، مەلا سەلمان، مەلا عەبدولقادر كۆكۆیی، مەلا محەمەد رازی، مەلا عەبدولقادری برایەتی)، بەپێی زانیاری ئەو راوێژكارە، هەرچەندە (مەلا عوسمان) یەكەم رابەری بزووتنەوە رازی نەبووە لەسەر كوشتنی ژنان، بەڵام ئەو بزووتنەوەیە بە شێوەی پچڕ پچڕ هەمان كاریان كردووە.
لەدوای راپەڕینیش كردەوەی ژنكوژی لەلایەن هێزە ئیسلامییەكانەوە پەرەی پێدراوە، كە ئەو كردەوانە سنووری شاری هەڵەبجەشی گرتبۆوە، بەڵام (عەباس محەمەد) پێیوایە ئەو تۆمەتە ناخرێتە ئەستۆی بزووتنەوە، چونكە وەك ئەو دەڵێت “لەهەموو شوێنێك دەسەڵات بەدەست هەر لایەنێكەوە بێت، ئەو لایەنە بەرپرسی یەكەمە، ئەوانەی هەڵەبجەش ئەگەر شتێكی وەها بووبێت، لەو كاتەشدا كە بزووتنەوەی ئیسلامی لەلوتكەی بەهێزیدا بووە، بزووتنەوە نەیدەتوانی بڵێت من لەسەداسەد دەسەڵاتدارم، چونكە لەو كاتەشدا خەڵكی بزووتنەوە بە نادیاری دەكوژران و هەڵەبجە حیزبی دیكەشی تێدا بووە”.
كردەوەی توندوتیژی دژ بە ژنان، لەلایەن هێزە ئیسلامییەكانەوە تا كۆتایی ساڵانی نەوەدیش هەر بەردەوام بوو، چونكە لەو دەیەیەی كۆتای سەدەی رابردوودا، چەندین ژن بەتایبەت چالاكوانەكانی ژنان و لایەنگرانی حیزبی كۆمۆنیست، بەهۆی هەڕەشەی ئیسلامییە جیهادییەكانەوە، بەرەو وڵاتانی رۆژئاوا رۆیشتوون و كوردستانیان بەجێهشتووە، هەر لەو دەیەیەدا لەشاری هەولێر، گرووپێكی ئیسلامی تێزابیان دەڕشت بە قاچی ئەو كچانەی جلی كورتیان لەبەر دەكرد، بەبڕوای د. چنار سەعد عەبدوڵڵا، ئەندامی سەركردایەتی پارتی دیموكراتی كوردستان، سەرهەڵدانی ئەو دیاردەیە دەگەڕێتەوە بۆ سەرهەڵدانی چالاكی گرووپە ئیسلامییە توندڕەوەكان، دەڵێت “ئەنجامدانی ئەو كارە كە بەشێك و جۆرێكە لەكرداری تیرۆریستی، نەك هەر مەترسی بووە لەسەر ئافرەت و ئازادییەكانی، بەڵكو مەترسی بوو بۆ سەر ئازادی گشت ئەندامانی كۆمەڵگا”، (د. چنار) كە پسپۆڕییەكەی لەبواری كۆمەڵناسیە، پێیوایە ئەو دۆخە ترس و دڵەڕاوكێی دروست كردبوو لای خانەوادەكان، بەبڕوا ئەو “ئیسلامییەكان ئەوكاتە مەبەستیان بوو لەكوردستانیش بارودۆخێكی وەكو ئەفغانستانی ژێر دەسەڵاتی تاڵیبان بخولقێنن”، هەروەها دەڵێت “ئەوان دەیانویست ئافرەت مافی كاركردن و خوێندن و بەشداریكردن لەگشت كایە سیاسی و كۆمەڵایەتی و رۆشنبیرییەكانی لێ زەوت بكرێت و سنوری كارەكانی لەناوماڵ تێپەڕ نەكات. بێگومان ئەو هەڕەشەیەش مەترسی تەنها لەسەر ئافرەت دروست ناكات، بەڵكو كۆمەڵگاش بەگشتی توشی دواكەوتن دەكات، لەبەر ئەوەی ئافرەتان بەشێكی سەرەكی ئەو كۆمەڵگایە پێكدەهێنن”.
تێبینی:
ئهم بهدواداچوونه رۆژنامهوانییه، كا زیاتر به دواداچوونێكه لهسهر مێژووی بهشێك له ئیسلامییه سیاسییهكانی ههرێمی كوردستان له ژماره (69)ی رۆژی یهكشهمه رێكهوتی (29/1/2011) له گۆڤاری سڤیل بڵاو كراوهتهوه.
