شوان شەفیق : ڕووتبوونەوەی من و ئەستێرە 
بەدایکم دەڵێم بەرگەکانم بسووتێنێت
پێخەفەکەم فڕێ بدات
ژوورەکەم چۆڵ بکات
راهاتووم لە ئامێزی نەهامەتیدا بنووم
لە خەونمدا
یەکەم کارم
هەڵگرتنی پەیژەی بەختبوو
دەرۆیشتم پلە بە پلە بە بەد بەختیدا سەردەکەوتم
نەوەستام تا گەیشتمە ئاسمان
پەردەی شەرمیم لە شەوی گواستنەوەیدا دڕان
پەلی ئەستێرەیەکم گرت و گەڕامەوە
کەوتینە ڕێ بەبێ وەستان
بۆ شەقام و کۆڵانەکان
بۆ لای بادە و مەیخانەکان
تا پشوویەك بدەین
بوتڵێك شەراب بخۆینەوە
تا هێندە مەست بین
هاودەمەکانی دوێنێ نەناسینەوە
بێزارییەك یەخەی گرتووین
پەلکێشی مەلەکردنی کردووین
مەلەکردن لە ئاودا نا
لە سرووشتدا ئارام دەبینەوە
با تەڕ بین پاکبینەوە
شەستە باران بمان شواتەوە
پاشان دەچینە دارستانێك
توێکڵی درەختەکان فڕێ دەدەین
لقەکان بێ گەڵا دەکەین
دەم بۆ میوەکان دەبەین
چێژ لە تامیان وەردەگرین
دەخوازین توکێڵی هەموویان لێبکەینەوە
ئینجا ژیان دەست پێبکەینەوە
کە بە ڕووتی هاتبین بۆ قوماش بئاڵێنین لە گیانمانەوە
