نوچە-ئاژانسەکان
بە گوێرەی ئاژانسەکانی جیهان و میدیاکانی لوبنان خەڵکی لوبنان وەک نیشانەی ناڕەزایی دەربڕین بەرامبەر بە ڕووداوی تەقینەوەکەی بەیروت و ناکارامەبوونی سیستمی سیاسی لە ئیدارەدانی وڵات، دوای نیوەڕۆی ئەمڕۆ ٨ی ئەگۆست هاتنە سەر شەقامەکان.
خۆپیشاندەران دەڵێن، کاتی ئەوە هاتووە لێپیچینەوە لە دەوڵەت بکرێت و ئەندامانی کابینە دەستلەکارکێشانەوەی خۆیان ڕابگەیەنێن.
پێگەی هەواڵی «النشره»ی لوبنان ڕایگەیاندووە، ژمارەیەکی بەرچاو لە گەنجەکان لە بەردەم بینای پەرلەمان کۆبوونەوەتە و هێرشیان کردۆتەوە سەر هێزەکانی پۆلیس.
کەناڵی هەواڵی «المیادین»ڕایگەیاند، ناوەندی شاری لوبنان بۆتە مەیدانی خۆپیشاندان و شەڕ و بەریەککەوتنی خەڵک و هێزە ئەمنییەکان.
کەنالی هەواڵی «الحدث»ی سعودیەش دەڵێت، ژمارەیەک لە خۆپیشاندەران لە ئەنجامی کاردانەوەی هێزە ئەمنییەکان بریندار بوونە.
کەناڵی سکای نیوزی عەرەبییش لەم بارەوە ڕایگەیاند، کە خۆپیشاندەران پەلاماری بینای پەرلەمانیان داوە و ژمارەیەک لە خۆپیشاندەران بریندار بوونە.
لە لایەکی دیکەوە، فەرماندەیی سوپای لوبنان، لە بەیانێکدا هۆشداری داوە لەبارەی هەر جۆرە ئاڵۆزییەک لە لایەن خۆپیشاندەرانەوە.
