سەرۆكایەتی هەرێم، ئامادەیی بۆ هاوكاری كردنی مەسیحییەكانی موسڵ راگەیاند

سەرۆكایەتی هەرێم، ئامادەیی بۆ هاوكاری كردنی مەسیحییەكانی موسڵ راگەیاند

نوچە: هەولێر

سەرۆكایەتی هەرێمی كوردستان ئیدانی دەركردنی مەسیحییەكانی موسڵی كرد و ئامادەیی هەرێمیشی راگەیاند، بۆ پێشوازی و هاوكاری كردنیان.
دكتۆر ئومێد سەباح وتەبێژی سەرۆكایەتی هەرێمی كوردستان، لە لێدوانێكدا، داوای لە كۆمەڵگەی نێودەوڵەتیش كرد، كە هەرچی زووە هاوكاری پێشكەش بە حكومەتی هەرێمی كوردستان بكەن، تا بە پەلە هاوكاری پێشكەش لێقەوماوان بكەن.
ده‌قی‌ لێدوانه‌كه‌:

لێدوانی گوتەبێژی فەرمیی سەرۆكایەتی هەرێمی كوردستان لەبارەی دەركردنی خوشك و برایانی مەسیحی لە موسڵ

لە دوا هەوڵی گرووپە تیرۆریستییەكاندا كە دەستیان بەسەر شاری موسڵدا گرتووە، بەشێوەیەكی دوور لە دابونەریتی پێكەوەژیان و بنەما و یاساكانی مافی مرۆڤ و ئایین، هەڕەشەی دەركردن و كوشتنیان لە خوشك و برایانی مەسیحی كردووە و ناچاریان كردوون ماڵ و شوێنەكانیان بەجێ بێڵن و بەرەو كوردستان بەڕێ بكەون.

ئێمە لە سەرۆكایەتی هەرێمی كوردستان ئەم كارە تیرۆریستییە نامرۆڤانەیە بەتوندی ئیدانە دەكەین و هاوسۆزی و هاوخەمیی خۆیشمان بۆ ئەو خوشك و برایانە دەردەبڕین و، ئامادەیی هەرێمی كوردستان بۆ پێشوازی و یارمەتیدان و پاراستنیان رادەگەیەنین.

داوا لە كۆمەڵگەی نێودەوڵەتیش دەكەین هەرچی زووترە هاوكاریی پێشكەش بەحكوومەتی هەرێمی كوردستان بكەن تا بەشێوەیەكی بەپەلە و شایستە بتوانین هاوكاریی لێقەوماوان بكەین و لە خەم و ئازارەكانیان كەم بكەینەوە.

ئومێد سەباح
گوتەبێژی فەرمیی سەرۆكایەتی هەرێمی كوردستان
19/7/2014