شلێرسەعید:نوچە
ئەمڕۆش كۆبوونەوەیەكی دیکەی ئەنجوومەنی وەزیران بۆ دەستكاریكردنی موچە و دەرماڵەكان ئەنجامدرا و رۆژی دووشەممەش هەر سێ سەرۆكایەتییەكەی هەرێمی كوردستان بڕیاری كۆتایی لەبارەی موچەوە دەدەن.
بۆ دەستكاریكردنی موچە و دەرماڵەكان پشت بە یاسای چاكسازی دەبەسترێت. یاسای چاكسازییش لە 19 ماددە پێكهاتووە و لە 2020/01/16 لە پەرلەمان دەرچووە و لە 2020/02/03 لەلایەن سەرۆكی هەرێمی كوردستانەوە واژۆی لەسەر كراوە.
لە لێدوانێكی تایبەتدا دەربارەی كەمكردنەوەی موچە هیڤیدار ئهحمهد، لە فراكسیۆنی پارتی ئەندامی لیژنهی دارایی و كاروباری ئابووری لە پەرلەلەمانی كوردستان، بە نوچەی ڕاگەیاند: دەربارەی ئەو كۆبوونەوانەی ئەنجومەنی وەزیران ئاگادار نیم و نازانم بڕیاری چی دەدەن، سەبارەت بە كەمكردنەوەی موچە، بەڵام ئەوەی ئێستا حكومەت دەیكات كەمكردنەوەی لە %50ی موچەی پلە باڵاكان لە دەروەی یاسای چاكسازیە، بەهۆی ئەو قەیرانەی دروستبووە حكومەتی ناچاركردووە بەم بڕیارانە.
هیڤیدار ئهحمهد گوتیشی، بە هەموو پلە باڵاو و پلە تایبەت و هەموو ئەوانەی لەدەوام دان یان خانەنشین كراون، مانگانە لە هەرێمی كوردستان 14 ملیار دینار وەردەگرن نیوەی ببڕدرێت 7 ملیار دینار دەمێنتەوە.
ئەو ئەندامەی لیژنەی دارایی ئاماژەی بەوەشكرد، حكومەتی هەرێم بۆ هەرمانگێك موچە، پێویستی بە هەشت سەد و 95 ملیار دینارە، واتە 880 ملیار دیناری فەرمانبەران وەریدەگرن، 14 ملیاریش پلە باڵا و تایبەت و خانەنشینان وەری دەگرن.
هێڤیدار دەشڵێت، بەم بڕینی موچە شتێكی وا بۆ حكومەت ناگەڕێتەوە، بەڵام لێرە دادوەری دەگەڕێتەوە بۆ موچەخۆران، چونكە حكومەت پێوایە نابێت ئەو جیاوازیە هەبێت لە نێوان فەرمانبەرێك و پلە باڵایەك.
بڕیارە لە سەرەتای مانگی حەوتەوە، یاساكە بچێتە بواری جێبەجێكردنەوە، بەڵام تا ئێستا لەسەر چۆنیەتی جێبەجێكردنی یاساكە، بەتاییبەت ئەو ماددەیەی پەیوەندی بە دەستكاریكردنی دەرماڵەوە هەیە، بۆچوونی جیاواز هەیە.
