وردەکاری دیداری بارزانی و سیاسەتمەدارانی عیراق
نوچەنێت
ئەمڕۆ چوارشەممە 16ـی 7ـی 2014 مەسعود بارزانی سەرۆكی كوردستان، پێشوازی لە ژمارەیەك كەسایەتی و سیاسەتمەدار و پارلەمانتاری عێراقی كرد.
لە دیدارێكدا ئەوشاندە سوپاسی بارزانیان كرد، بۆ ڕەخساندنی ئەم دیدارە و وێڕای ئاماژەدان بە ڕۆڵی بارزانی لە خەبات دژی دیكتاتۆرییەت و بنیاتنانی عێراقی نوێ و پڕۆسەی دیموكراسی و دەستووریی عێراق، هیوایان خواست كە ئەو سەردانەیان ببێتە هۆی ڕەواندنەوەی ئەو گومانانەی كە بەهۆی شێواندنی ڕاستیەكان و شەڕی ڕاگەیاندن لەنێوان هەرێم و بەغدا هاتووەتە كایەوە.
هەر لەو دیدارەدا، شاندی سیاسەتمەداران و پەڕلەمانتارانی عێراق، نیگەرانیی خۆیان نیشاندا بەرانبەر بارودۆخی ئەمنی و سیاسیی عێراق و لە دروستبوونی ئەو هەڕەشە جددیەی كە ژیانی برایانەی پێكهاتەكانی عێراقی كردۆتە ئامانج.
بەپێی ماڵپەڕی سەرۆکایەتی کوردستان، لەو دیدارەدا ڕاشكاوانە قسە لەبارەی هۆكاری قەیرانی چەندساڵەی عێراق و ڕووداوەكانی موسڵ و كەمتەرخەمیی دەستەڵاتدارانی بەغدا و ئیدارەدانی هەڵەی كاروباری سیاسی و هەروەها پێویستیی گۆڕانكاری لە پڕۆسەی سیاسیی عێراقدا كرا، سەركۆنەی ئەم هەوڵانەیش كرا، كە كار لەسەر گومڕاكردن و بەلاڕێدابردنی ڕای گشتیی عێراق دەكەن كە بووەتە هۆی دروستبوونی درز لەنێو پێكهاتە ڕەسەنەكانی عێراق، بە پێویستیش زانرا، هەموو لایەك كار لەسەر دەرخستنی ڕاستییەكان و وەستانەوە لەدژی دەمارگیریی نەتەوەیی و تاییفەیی بكەن.
…
تێبینی: بەپێی دەستورو یاسا، باشوری کوردستان هەرێمە و دەبێت ناوی بارزانی وەک سەرۆکی هەرێم بێت، بەڵام نوچەنێت، بڕوای بە عێراقی بوونی کوردستان نییە، بۆیە ناوی کوردستان بەکار دەهێنێ، نەک هەرێمی کوردستان.
