نوچە
باڵیۆزی ئەمریکا لە عێراق، پرسەکانی رێککەوتنی ستراتیژی نێوان وڵاتەکەی و عێراق، ئاشکرادەکات.
ئەمڕۆ (یەکشەممە 31-5-2020)، ماتیۆ تیلەر، باڵیۆزی ئەمریکا لە بەغدا، لە گرتەیەکی ڤیدیۆییدا رایگەیاند: تیمی دیپلۆماسی وڵاتەکەی لە بەغدا و هەولێر، گفتوگۆ لەبارەی هەموو لایەنەکانی رێککەوتنێکی ستراتیژی لەنێوان عێراق و ئەمریکا، دەکەن.
تیلەر لە گرتە ڤیدیۆییەکەدا، کە لە پەیجی باڵوێزخانە لە تۆڕی کۆمەڵایەتی فەیسبووک بڵاوکراوەتەوە دەڵێت، رێککەوتنی واشنتن و بەغدا، کە بڕیارە لە ناوەڕاستی مانگی 6ـی 2020 بکرێت، تەنیا لە رووی هاوکاری ئەمنی نابێ، بەڵکو هەموو لایەنە سیاسی، ئابووری، رۆشنبیری، پەروەردەیی و زانستییەکان دەگرێتەوە.
باڵوێزی ئەمریکا ئاماژەی بەوەش کردووە، کە بەشی ئابووریی باڵیۆزخانەکە سەرنج دەخاتە سەر هێنانی بازرگان و وەبەرهێنەرانی ئەمریکا بۆ عێراق، بە مەبەستی هاوکاریکردنی ئەو وڵاتە لە پرسی سەربەخۆبوونی وزە.
ماتیۆ تیلەر هەروەها راگەیاندووە، نووسینگەی پەنابەرانی باڵوێزخانەکەی هاوکاریی ملیۆنان ئاوارەی عێراقی کردووە بۆ ئەوەی بگەڕێنەوە سەر ماڵ و حاڵی خۆیان. جەختی لەوە کردووەتەوە، کە ”نەوەی داهاتووی عێراق سوود لە چالاکییە رۆشنبیرییەکانی ئەمریکا لە عێراق وەردەگرێت، کە بریتییە لە وەرگرتنیان لە زانکۆوە ئەمریکییەکان”.
