نەوزاد عەلی-سلێمانی
سەرۆکی فراکسیۆنی یەکگرتووی ئیسلامی لە پەڕلەمانی عێراق ڕایدەگەیەنێت، مستەفاکازمی تا ئێستا بە فەرمی گفتوگۆی لەگەڵ لایەنە سیاسییەکانی کورد و سوننە نەکردووە.
دوای بڕیاری کشانەوەی، عەدنان زرفی، لە راسپاردنی بۆ سەرۆک وەزیرانی عێراق، ڕۆژی پێنجشەممە ٩-٤-٢٠٢٠، سەرۆک کۆماری عێراق، مستەفا کازمی بەفەرمی بۆ پۆستی سەرۆک وەزیرانی نوێی عێراق ڕاسپارد، ڕاسپاردنی بە کۆدەنگی لایەنە شیعەکان بووە و هەرێمی کوردستانیش بە فەرمی پاڵپشتی خۆی دەربڕی.
لە لێدوانێکی تایبەت بە نوچە، جەمال کۆچەر، سەرۆکی فراکسیۆنی یەکگرتوو، لە ئەنجوومەنی نوێنەرانی عێراق، لە بارەی گفتوگۆی پێکهێنانی حکومەت رایگەیاند: مستەفا کازمی، کاندیدی ڕاسپێردراو بۆ پێکهێنانی کابینەی نوێی حكومەتی عێراق، تا ئێستا بە فەرمی گفتوگۆی لەگەڵ لایەنە سیاسییەکانی کورد و سوننە نەکردووە، لەسەر پرسی پێکهێنانی حکومەت، ئەگەر گفتوگۆی نهێنیش لەگەڵ لایەنێک کرا بێت ئاگادار نیم”.
سەرۆکی فراکسیۆنی یەکگرتووی ئیسلامی، دەشڵێت “زوو تێپەڕاندنی کابینەکەی مستەفا کازمیش، دەکەوێتەوە سەر ئەوەی کابینەکەی چۆنە و مامەڵەی ئەو لەگەڵ لایەنە سیاسییەکان چۆن دەبێت، چونکە لە کاتی ڕاسپاردنی محەمەد تۆفیق عەلاویش، تا ڕۆژێک پێش کۆبوونەوەی پەرلەمان بۆ دەنگدان لەسەر کابینەکەی خەڵک و لایەنەکان نەیان دەزانی کەسێک چۆنە”.
