نوچە
رژێمی بەعس لە کاتی کارەساتی ئەنفاڵ تەنیا لە رۆژی 14-4-1988 زیاتر لە 20 هەزار كەس لە ناوچەی گەرمیان ئەنفال كرد، بەو هۆیەوە حكومەتی هەرێمی كوردستان 14-4ی هەموو ساڵێكی كردووەتە ساڵیادی قوربانیانی ئەنفال.
ئەمڕۆ سێشەممە 14-4-2020، لە 32هەمین ساڵیادی مەرگەساتی تاوانی ئەنفال، لە مۆنۆمێنتی ئەنفال لە قەزای چەمچەماڵ بە ئامادەبوونی عەبدوڵا حاجی مەحموود، وەزیری شەهیدان و ئەنفالكراوانی حكومەتی هەرێمی كوردستان تاجەگوڵینەی رێزلێنان لەسەر گڵکۆی ئەنفال كراوان دانرا.
ئەنجومەنی بەناو سەركردایەتی حزبی بەعس، كە هیشتا لە شەڕی عێراق – ئێران نەبووبووە لە 29-ی ئاداری ساڵی 1987 بڕیاری ئەنجامدانی ئەنفالی دا و ئەنفال بە هەشت قۆناغ ئەنجام درا و ترسناكترین و گەورەترین تاوانی ئەنفال، لە قۆناغی سێدا بوو، كە ناوچەی گەرمیانی گرتۆتەوە و بریتی بوو بوون لە ناوچەكانی، خورماتوو، كەلار، كفری، چەمچەماڵ، ناحیەكانی نەوجول، سەنگاو، قادركەرم و چەندین شوێن و ناوچەی دیكە.
رژێمی بەعس لەو ساڵەدا 500 گوند و چوار ناحیەی وێران كرد، كە یەكێك لە ناحیەكان (نەوجول)-ی سەر بە خورماتووە، كە تاكوو ئێستاش ئاوەدان نەكراوەتەوە و رژێمی بەعس لەو ناوچانەدا زیاتر لە 30 هەزار هاوڵاتی كوردی تەنیا لەبەر كوردبوونیان ئەنفال كرد. هەروەها تەنیا لەماوەی یەك رۆژدا لە 14/4/1988 نزیكەی 20 هەزار کەس، لە منداڵ و ژن و گەنج و پیر و پەككەوتەی لە ناوچەی گەلامیان ئەنفال كرد و پاشان گواسترانەوە بۆ ناحیەی قۆرەتوو و لەوێوە بێ سەروشوێن كران.
هەر بۆیە ڕێکەوتی 4-4-2007، ئهنجومهنی وهزیرانی هەرێمی کوردستان به سهرۆکایهتی نێچیرڤان بارزانی، سهرۆکی ئهنجومهنی وهزیرانی ئەوکات و عومهر فهتاح، جێگری سهرۆکی ئهنجومهن، لە کۆبوونهوهی ئاسایی ئەنجومەنی وەزیران، رهزامهندیی لهسهر پرۆژهی بریاری دانانی رۆژی 14-4-ی ههموو ساڵیک به رۆژی ئهنفالکراوهکان پەسەند کرا. ساڵانە كوردستانیان بە رێورەسمی تایبەت یادی قوربانیانی ئەو تاوانە دەكەنەوە، بەڵام ئەمساڵ بەهۆی بڵاوبونەوەی كۆرۆناوە نەتوانرا ئەو یادە بكرێتەوە.
