نوچەنێت
سەرۆکی حکومەتی هەرێمی کوردستان، چەند بڕیارێکی نوێی لە چوارچێوەی خۆپاراستن و دەرهاویشتەی بڵاوبوونەوەی پەتای کۆڕؤنا لە هەرێمی کوردستان کرد.
ئەمڕۆ سێشەممە ١٠-٣-٢٠٢٠، مەسرور بارزانی، سەرۆکی حکوومەتی هەرێمی کوردستان بە ئامادەبوونی قوباد تاڵەبانی، جێگری سەرۆکی حکومەت، سەرپەرشتیی کۆبوونەوەیەکی تایبەت بە لێکەوتە ئابورییەکانی پەتای کۆرۆنا و دۆخی ئابوریی هەرێمی کوردستان کرد.
سەرۆکی حکومەت، داوای لە هاوڵاتیان کرد کە پابەندی رێنماییەکان بن و خۆپارێزی بکەن، هاوکات ئاماژەی بەوەکرد، کە تەشەنەکردنی پەتای کۆرۆنا لە جیهان، تەنیا کێشەیەکی تەندروستی نییە، بەڵکو دەرهاویشتەی نەرێنیشی لە سەر ئابوریی جیهان لێکەوتووەتەوە کە عێراق و هەرێمی کوردستانیش دەگرێتەوە. بەتایبەتی بە هۆی دابەزینی خێرا و زۆری نرخەکانی نەوت لە بازاڕەکانی جیهان.
لەم کۆبوونەوەیەدا کۆمەڵێک بڕیار بۆ تێپەڕاندنی ئەم دۆخە درا:
١. رێوشوێنی پێویست بۆ کەمکردنەوەی خەرجییە ناپێویستەکانی دامودەزگاکانی حکومەت، بە پێی رێنماییەکان و لە چوارچێوەی یاسای چاکسازی و کارنامەی کابینەی نۆیەم بگیرێتەبەر.
٢. لە گەڵ حکومەتی فیدراڵی لە بەغدا، هەماهەنگی بکرێت و دانوستانەکان چڕبکرێنەوە بۆ تێپەڕاندنی ئەو دۆخە داراییە سەختەی رووبەڕووی عێراق و هەرێمی کوردستان بووەتەوە.
