بەرپرسێكی پارتی بۆ نەجمەدین كەریم: تووشی هەڵە و وەهم بووە، هیوادارین بێتەوە سەرخۆیی
نوچە: هەولێر
بەرپرسێكی پارتی بە (نوچە)ی راگەیاند، ماددەی سەد و چل بە ئەمری واقیع جێبەجێ بووە، رەخنەیش لەو لێدوانەی پارێزگاری كەركووك دەگرێت، كە باس لە جێبەجێ نەبوونی ئەو ماددەیە دەكات و پێیدەڵێت “تووشی هەڵە و وەهم بووە، هیوادارین بێتەوە سەرخۆی”.
محەمەد كەمال بەرپرسی لقی سێی پارتی دیموكراتی كوردستان لە كەركووك، كە هاوكات ئەنجامی ئەنجومەنی پارێزگای كەركووكیشە، بە نوچەنێتی راگەیاند، ماددەی سەد و چل بە ئەمری واقیع جێبەجێ بووە و زۆربەی لیستەكانی تری ئەنجومەنی پارێزگای كەركووكیش لەگەڵ گەڕاندنەوەی ئەو ناوچانەن بۆ سەر هەرێمی كوردستان، بەڵام وەك ئەو وتی “هەندێك داواكارییان هەیە، ئەوانیش لە كاتی خۆیدا جێبەجێ دەبن”.
ئەو بەرپرسەی پارتی رەخنە لە لێدوانەكانی دكتۆر نەجمەدین كەریم پارێزگاری كەركووك دەگرێت، كە باس لە جێبەجێ نەبوونی ئەو ماددەیە دەكەن و بە رەخنەی شەخسی ناوی دەبات، دەڵێت “ئەوەی لەگەڵ جێبەجێ بوونی ئەم ماددەیەدا نەبێت، شەخسن، واتە گوزارشت لە بۆچوونی خۆیان دەكەن، ئەو شەخسانەیش تووشی هەڵە و وەهم بوون و دەبێت بە هۆش خۆیان بێنەوە و بزانن لە دونیا چ باسە”، بەرپرسەكەی پارتی زیاتر روو لە خەڵكی كەركووكیش دەكات و پێیاندەڵێت “حەقوایە خەڵكی ئێمەیش لە كەركووك بە ئاگا بێنەوە و بزانن كێ خزمەتی شارەكەیان دەكات، كێ هەوڵ دەدات شارەكەیان بگەڕێنێتەوە سەر هەرێمی كوردستان و ئەمن و ئاسایشی بۆ بگێڕێتەوە و وەك سێ شارەكەی تر خزمەتی بكات و كێیش دژ بە خواستی میللەتەكەمانە”.
نوچە: وەك لە راگەیاندنەكان باس دەكرێت، پارێزگاری كەركووك لەگەڵ مانەوەی نوری مالیكیدایە لە پۆستەكەیدا و پێشیوایە هێشتا ماددەی سەد و چل جێبەجێ نەكراوە، هەڵوێستی ئێوە وەك پارتی لەو بارەیەوە چییە؟
محەمەد كەمال: ئێمە تەنها لە خۆمان و جەماوەرەكەمان بەرپرسین، ئێستا سوپای مالیكی پاشەكشەی كردووە و نەماوە، هێزی پێشمەرگە شوێنەكانی خۆی گرتۆتەوە و چۆتە جێی ئەو سوپا كە لەوێ نەماون، بۆیە ئێستا ئەو شوێنانە كەوتوونەتە ژێر دەسەڵاتی هەرێمی كوردستانەوە، ئێمە پێمانوایە ماددەی سەد و چل بە ئەمری واقیع جێبەجێ بووە، ئەوەیشی لەگەڵ جێبەجێ بوونی ئەم ماددەیەدا نەبێت، شەخسن، واتە گوزارشت لە بۆچوونی خۆیان دەكەن، ئەو شەخسانەیش تووشی هەڵە و وەهم بوون و دەبێت بە هۆش خۆیان بێنەوە و بزانن لە دونیا چ باسە.
ئەمڕۆ عێراق لایەكی داعش داگیری كردووە و دەوڵەتی ئیسلامی تێدا درووست كردووە، بۆیە حەقە ئەو شەخسانە بە ئاگا بێنەوە و بزانن ئەگەر پێشمەرگە لە ناوچە كوردستانییەكانی دەرەوەی ئیدارەی هەرێم نەبونایە، داعش دەهاتنە ناوچەكە و داعش كەركووكی دەگرت، بۆیە حەقوایە خەڵكی ئێمەیش لە كەركووك بە ئاگا بێنەوە و بزانن كێ خزمەتی شارەكەیان دەكات، كێ هەوڵ دەدات شارەكەیان بگێڕێتەوە سەر هەرێمی كوردستان و ئەمن و ئاسایشی بۆ بگێڕێتەوە و وەك سێ شارەكەی تر خزمەتی بكات و كێیش دژ بە خواستی میللەتەكەمانە.
نوچە: بەڵام ئەگەر كەسی یەكەمی ئیدارەی شارێك ئەو هەڵوێستانەی هەبێت، ئایا ناتوانێت لەمپەر لەبەردەم كاری حیزبەكان و هەرێمی كوردستان درووست بكات، لە هەر هەنگاوێك كە لە داهاتوودا بینێن؟
محەمەد كەمال: نەخێر ناتوانێت كێشە درووست بكات، چونكە ئەو لایەنەیش كە ئەو برایە ئەندامێكی باڵایە تێیدا، لەگەڵ لایەنە كوردستانییەكان تێكڕا بە یەك دەنگ لەگەڵ ئەوەن كە كەركووك گەڕاوەتەوە سەر هەرێمی كوردستان و بەشێكی دانەبڕاوە لە هەرێمی كوردستان، وە ئەسڵەن كەركووك پێویستی بە ماددەی سەد و چل و ریفراندۆم نەبوو، بەڵام سەركردایەتی كورد كە ئەمریكا لە نێواندا بوو، بۆ ئەوەی كێشە درووست نەبێت، رازی بوو لەسەر ئەوەی بە گوێرەی یاسا و دەستوور و دیكۆمێنت، ئەو ناوچانە یەكلایی ببنەوە، چونكە كەركووك گومانی لەسەر نیە كە شارێكی كوردستانییە، هەموو دیكۆمێنتەكانی دونیا شاهێدی دەدەن كە كوردستانییە، ئەگەر سەیری مێژوویش بكەین كەركووك بەشێك نەبووە لە دەوڵەتی عێراقی كە لە ساڵی 1921 دامەزرا، چونكە سنووری دەوڵەتی عێراقی لە ساڵی 1921 هەتا بەرزاییەكانی حەمرین بووە، بۆیە ئەو برادەرە و ئەوانەیش كە وا بیر دەكەنەوە، بە بۆچوونی من نە لە مێژوو دەزانن و نە لە سیاسەتیش.
نوچە: تۆ تەئكید لەوە دەكەیتەوە كە پارێزگار لە داهاتوودا ناتوانێت كێشە بۆ گەڕاندنەوەی كەركووك درووست بكات؟
محەمەد كەمال: ناتوانێت هیچ كێشەیەك درووست بكات، چونكە ئێمە ئەنجومەنێكمان هەیە و لەو ئەنجومەنە ئێمە لە لیستی برایەتی 26 ئەندامین، هەموومان لەگەڵ ئەوەین كە كەركووك بگەڕێتەوە سەر هەرێمی كوردستان، هەروەها ئێستا لیستەكانی تریش گەیشتوونەتە قەناعەت، كە ئەو پاشاگەردانییەی لە بەشەكانی تری عێراق هەیە، نایانەوێت خۆیانی تێكەڵ بكەن، بۆیە پێیان باشە كەركووك لە چوارچێوەی هەرێمی كوردستان بێت، رەنگە هەندێك داواكارییان هەبێت، ئەویش چارەسەر دەبێت لە كات و ساتی خۆیدا.
