شلێر سەعید: هەولێر
ئەندامێكی ئەنجومەنی نوێنەرانی عێراق لە هاوپەیمانی فەتح رایدەگەیەنێت، دەبێت بە زووترین كات سەرۆک كۆمار كەسێك كاندید بكات. دەشڵێت ” داوامان كردووە لە حكومەت، كە ژیانی خۆپیشاندەران بپارێزن”.
لە لێدوانێكی تایبەت بە نوچە، ئەحمەد كنانی، ئەندامی ئەنجومەنی نوێنەرانی عێراق، لە هاوپەیمانی فەتح رایگەیاند: بۆ باشكردنی بارودۆخی عێراق، پێویستە لەسەر سەرۆك كۆمار بە زووترین كات كەسایەتیەك كاندید بكات، هیچ بانویەك نیە بۆ دواخستنیشی.
ئەحمەد كنانی دەشڵێت، هەر كەسێك بەبژێر بكەن لە ئەنجومەنی نوێنەران، دەنگی لەسەردەدرێت و ئێمە لە ئەنجومەنی نوێنەران بەكاری خۆمان هەستاوین و پێویستە لەسەر گەورە بەرپرسانی باڵای سیاسی، كەسێك كاندید بكەن بۆ سەرۆك وەزیرانی عێراق، كە جێ ڕەزامەندی هەموو لایەنێك بێت.
سەبارەت بە توندوتیژی بەرانبەر بە خۆپیشاندەران و بێ هەڵوێستی ئەنجومەنی نوێنەران، كنانی گوتی ”ئەنجومەنی نوێنەران هەڵوێستی هەبووە و بەیاننامەمان دەركردووە و بێدەنگ نەبووین. هەروەها داوامان كردووە لە حكومەت، كە ژیانی خۆپیشاندەران بپارێزن و توندوتیژی بەرانبەریان نەكرێت، بەڵام هەیە دەیانەوێ کارتەکان تێكەڵ بكەن و بارودۆخەكە ئاڵۆز بكەن و تێكدەرن.
