نەوزاد عەلی-سلێمانی
ئەندامێکی ئەنجومەنی سەرکردایەتی گشتی یەکێتی ڕایدەگەیەنێت، سبەی ئەنجومەنی سەرکردایەتی یەکەم کۆبوونەوەی خۆی ئەنجام دەدات.
رۆژی٢١-١٢-٢٠١٩، چوارەمین كۆنگرەی یەكێتی لە سلێمانی بە ئامادەبوونی زیاتر لە ١٠٠٠ ئەندام بەستراو نزیكەی ٤٥٠ ئەندام خۆیان بۆ ئەندامی ئەنجوومەنی گشتیی سەركردایەتیی ئەو حیزبە کاندید کرد، دواتر ١٢١ كەس بۆ ئەندامی ئەنجوومەنی سەركردایەتیی گشتی یەكێتی هەڵبژێردران.
لە لێدوانێکی تایبەت بە نوچەنێت مستەفا چاوڕەش، ئەندامی ئەنجومەنی سەرکردایەتی گشتی یەکێتی کوردستان، سەبارەت بە کۆبوونەوەی سەرکردایەتی حزبەکەی، ڕایگەیاند”بڕیارە سبەی سێشەممە ١٤-١-٢٠٢٠ کاتژمێر ١١ی پێشنێوەڕۆ، ئەنجوومەنی سەرکردایەتی گشتی یەکێتی نیشتمانی کوردستان، یەکەم کۆبوونەوەی خۆی لە هۆڵی شەهید سازان تاهیر لە سلێمانی ئەنجامبدات”.
مستەفا چاوڕەش، دەڵێت”من وەک بە تەمەنترین کەسی ئەندامی ئەنجوومەنی سەرکردایەتی گشتی یەکێتی نیشتمانی، سەرپەرشتی کۆبوونەوەکەی بەیانی دەکەم”.
سەبارەت بەچارەسەرکردنی کێشەی ژمارەی ئەندامەکانی ئەنجومەنی سەرکردایەتی کە ژمارەیان ١٢٣ ئەندام بوو، چاوڕەش دەڵێت”ئەو لیژنەیەی کە پێکهێنرابوو بۆ چارەسەری کێشەکانی دوای کۆنگرە، ڕەنگە کێشەکەیان چارەسەرکرد بێت”.
