نەوزاد عەلی-سلێمانی
بڕیاردەری لیژنەی دارایی پەرلەمانی کوردستان ڕایدەگەیەنێت، لیژنەی دارایی پەرلەمان یەکەم کۆبوونەوەی خۆی لەسەر پڕۆژەیاسای چاکسازی ئەنجامداوە و هەفتەی داهاتوویش لەگەڵ حکوومەت کۆدەبینەوە.
ڕۆژی دووشەممە ١٦-١٢-٢٠١٩، پەرلەمانی كوردستان خوێندنەوەی یەكەمی بۆ پڕۆژە یاسای چاكسازی كرد و بە دەنگی ٨٨ پەرلەمانتار سیفەتی بەپەلەی پێدرا بۆئەوەی پێش هاتنی پشووی پەرلەمانی کوردستان دەنگی لەسەر بدرێت و ببێتە یاسا.
لە لێدوانێکی تایبەت بە نوچە، محەمەد سەعدەدین، بڕیار دەری لیژنەی دارایی پەرلەمانی کوردستان، سەبارەت بە پڕۆژەیاسای چاکسازی، ڕایگەیاند “لیژنەی دارایی و کاروباری ئابووری لەپەرلەمانی کوردستان، دەستیان کردووە بە کۆبوونەوەکانی لەسەر ماددەکانی پڕۆژەیاسای چاکسازی، ڕۆژی چوار شەممەش ١٨-١٢-٢٠١٩ لیژنەکەمان یەکەم کۆبوونەوەی خۆی ئەنجامداوە و کۆبوونەوەکان بەردەوام دەبن تا ڕاپۆرت ئامادەدەکرێت”.
بڕیاردەرەکەی لیژنەی دارایی پەرلەمانی کوردستان، گوتیشی “هەر سەبارەت بە پرسی پڕۆژەیاسای چاکسازی، بڕیارە هەفتەی داهاتوو لیژنەی دارایی پەرلەمان لەگەڵ هەریەک لە وەزیرانی دارایی و پێشمەرگەی حکوومەتی هەرێمی کوردستان و سکرتێری ئەنجوومەنی وەزیرانی هەرێم کۆببێتەوە”.
محەمەد سەعدەدین ئاماژە بەوە دەکات، لیژنەکەیان بەچڕی کار لەسەر پڕۆژەیاسای چاکسازی دەکات و زۆربەی ماددەکانی گفتوگۆیان لەسەر کراوە و لە ئایندەیەکی نزیکدا ڕاپۆرتی کۆتایی لەسەر پڕۆژەیاساکە ئامادەدەکەین. دەشڵێت “جگە لە ئەندامانی لیژنەی دارایی پەرلەمان، ئەو پەرلەمانتارانەشی، کە ئارەزوویان لێبوو بەشداری کۆبوونەوەکە بکەن، بەشداریان کردووە”.
