نوچە: ئاژانسەکان
زیندانێکی نهێنی حەشدی شەعبی، کە خۆپیشاندەرانی رفێندراوەکانی تێدا زیندانی کراوە ئاشکرا دەکرێت.
رووانگەی ئەورۆناوەڕاست بۆ مافەکانی مرۆڤ و سەنتەری عێراقی بۆ بە بەڵگەکردنی تاوانەکان لە بەیاننامەیەکی هاوبەشدا رایانگەیاندووە، زیندانە نهێنییەکە کەوتووەتە ناو باخچەیەکی سەر رێگای خێرای دۆرە – بەغدا.
ئەو دوو رێکخراوە لە بەدواداچوونەکانیاندا، کە پشتیان بە زانیارییەکانی کەسێکی ئازادکراو لەو زیندانە بەستووە، گەیشتوونەتە ئەو راستییەی، کە زیندانەکە نهێنییە و لەلایەن هەواڵگری حەشدی شەعبییەوە بەڕێوەدەبرێت.
لەو زیندانەدا، چەکدارانی حەشدی شەعبی زیاتر لە ٣٠٠ خۆپیشاندەری رفێندراویان زیندانی کردووە، کە ژنیشیان تێدایە و لە بارودۆخێکی مرۆیی زۆر خراپدا دەژین.
خۆپیشاندانەکان لە رۆژی ٢-١٠-٢٠١٩ـەوە لە بەغدا و زۆربەی شارەکانی عێراق دژی گەندەڵی و نەبوونی خزمەتگوزاری، دەستیان پێ کرد. دوای سەرهەڵدانی خۆپیشاندانەکان، چەکدارانی ئەو میلیشیایە بەردەوام چالاکوان و رێکخەرانی خۆپیشاندانەکان دەڕفێنن و دەکوژن.
هەروەها بەهۆی خۆپیشاندانەکان و کەوتنەوەی توندوتیژی تێیاندا، نزیکەی ٤٥٠ هاوڵاتی گیانیان لەدەستداوە و زیاتر لە ١٧ هەزاری دیکەش بریندار بوون.
