نوچە: ئاژانسەکان
شەوی رابردوو چوار موشەك لە دەوروبەری فڕۆكەخانەی نێودەوڵەتی بەغدا كەوتنە خوارەوە و باڵیۆزخانەكانیش زەنگی ئاگاداركردنەوەیان لێدا.
بەگوێرەی زانیارییەکان، درەنگانی شەوی رابردوو (٩/٨-١٢-٢٠١٩) چوار موشەك لە دەورووبەری فڕۆكەخانەی نێودەوڵەتی بەغدا كەوتوونەتە خوارەوە، شەش كەس بریندار بوون، كە برینی دووانیان سەختە”.
ھاوكات دوای كەوتنەخوارەوەی ئەو موشەكانە، باڵیۆزخانەی ئەمەریكا و باڵیۆزخانەكانی دیكەی بەغدا، زەنگی ئاگاداركردنەوەیان لێداوە و كەوتوونەتە ئامادەباشی، بۆ ئەگەری كەوتنەخوارەوە و ئاراستەكردنی موشەكی دیكە، تائێستا نەزانراوە ئەو موشەكانە لە كوێوە ئاراستە كراون.
میدیاكانی عێراق بڵاویان كردووەتەوە “ئامانجی ئەو موشەكانە، ھێزەكانی ئەمریكا و باڵیۆزخانەی ئەمریكا بووە”.
لەلایەكی دیكەوە، شانەی راگەیاندنی جەنگی، پووچەڵكردنەوەی دوو موشەكی كاتیۆشای راگەیاند، لە فەرماندەی بەلەدی سەربازی سەر بە پارێزگای سەڵاحەدین، بەبێ ھیچ زیانێكی گیانی و ماددی.
