نەوزاد عەلی-سلێمانی
سەرۆکی کۆمەڵەی قوربانیانی کیمیابارانی هەڵەبجە ڕایدەگەیەنێت، شاندێکی کۆمەڵەکەیان بەفەرمی بانگێشتی کۆنفرانسی قەدەغەکردنی چەکی کیمیایی لە هۆڵەندا کراوە.
ساڵانە ڕێکخراوی قەدەغەکردنی چەکی کیمیایی لە وڵاتی هۆڵەندا، کۆنفرانسی تایبەت بە قەدەخەکردنی چەکی کیمیایی دەبەستێت، ڕێکخراوەکە ئەو وڵاتانە بانگهێشتی کۆنفراسەکە دەکات، کە بەشێک لە گەلەکەیان بەچەکی قەدەغەکراو کۆمەڵکوژی کراون، هەرچەندە هەرێمی کوردستان وڵاتێکی سەربەخۆ نییە، بەڵام ساڵانە بەفەرمی بانگشتی ئەم کۆنفرانسە دەکرێت.
لە لێدوانێکی تایبەت بە نوچە، لوقمان عەبدولقادر، سەرۆکی کۆمەڵەی قوربانیانی کیمیا بارانی هەڵەبجە، لە بارەی بەشداری ڕێکخراوەکەیان لە کۆنفراسی هۆڵەندا، ڕایگەیاند”ئەمساڵیش بەفەرمی کۆمەڵەکەمان بانگهێشتکراوە بۆ کۆنفرانسی ڕێکخراوی قەدەخەکردنی چەکی کیمیایی لە هۆڵەندا، شاندەکەی ئێمە ئێستا گەیشتوونەتە هۆڵەندا و بڕیارە ڕۆژی دووشەممە ٢٥-١١-٢٠١٩، بەشدای کۆنفراسەکە بکەین”.
سەرۆکی کۆمەڵەی قوربانیانی کیمیابارانی هەڵەبجە، گوتی”کۆمەڵەکەمان چالاکی دەبێت، وتاری کۆمەڵەکەش لەو کۆنفرانسەدا دەخوێندرێتەوە، هەموو ئەو بەڵگە و دیکۆمێنتانەشی لەسەر کیمیابارانی هەڵەبجە کۆکراونەتەوە لە کۆنفراسەکەدا دەخرێنەڕوو”.
لوقمان عەبدولقادر ئاماژە بەوەشدەکات، کۆمەڵەکەیان بە فەرمی بووتە ئەندامی ڕێکخراوی قەدەغەکردنی چەکی کیمیاوی، ساڵانە بەفەرمی بانگهێشتی کۆنفراسەکەیان دەکەن.
