نوچەنێت
ئەنجوومەنی وەزیرانی هەرێمی کوردستان، بە سەرپەرشتی مەسروور بارزانی، سەرۆکی ئەنجوومەنی وەزیران و ئامادەبوونی قوباد تاڵەبانی، جێگری سەرۆکی ئەنجوومەن کۆبووەوە.
ئەمڕۆ چوارشەممە، ١٣-١١-٢٠١٩، ئەنجوومەنی وەزیران لەسەر چەند تەوەرێکی گرنگ کۆبووەوە.
لە کۆبونەوەکەدا دوای خوێندنەوەی ڕاپۆرتێک لەلایەن شۆڕش ئیسماعیل، وەزیری کاروباری پێشمەرگە، ئەنجوومەنی وەزیران بڕیاری دا، لێژنەیەک بە سەرۆکایەتی سەرۆکی ئەنجوومەنی وەزیران و ئەندامێتی جێگری سەرۆک وەزیران و وەزیرانی ناوخۆ و کاروباری پێشمەرگە و دارایی و ئابووری بۆ بەدواداچوونی بڕگەکانی ڕاپۆرتەکەی وەزارەتی پێشمەرگە، پێک بهێنرێت و دواتر بڕیاری پێویستی لەبارەوە بدرێت.
هەر لەم کۆبوونەوەیەدا، ئەنجوومەنی وەزیران گفتوگۆی دەربارەی پڕۆژەیاسای هەلبژاردنەکانی عێراق کرد و جەختی لەسەر پاراستنی دەسەڵات و مافە دەستوورییەکانی هەرێمی کوردستان کە بە هیچ شێوەیەک سازشیان لەسەر ناکرێت، کردەوە.
بارودۆخی کارمەندانی گرێبەست لەلایەن لیژنەیەکەوە هەڵدەسەنگێنرێت و دەرئەنجامی بەدواداچوونەکە دەخرێتە بەردەم ئەنجوومەنی وەزیران.
