نوچەنێت
نوێنەری حكوومەتی هەرێمی كوردستان لە فەرەنسا رایدەگەیەنێت: گەورەترین هەرێمی فەرەنسا دەیەوێت رێككەوتننامەیەكی هاوكاری و دۆستایەتی لەگەڵ هەرێمی كوردستاندا واژۆ بكات، بەم زوانە شاندێكیان سەردانی كوردستان دەكات.
د. عەلی دۆڵەمەڕی، بە ماڵپەڕی فەرمی پارتی دیموكراتی كوردستانی ڕاگەیاندووە”وەكو نوێنەری حكوومەتی هەرێم و بە ئامادەبوونی ئەندامانی ئەنجوومەنی هەرێمەكان، كە پێكهاتوون لە سەرۆكی گرووپە سیاسییەكان، لەگەڵ سەرۆكی هەرێمی ئیل دو فرانس، كە گەورەترین هەرێمە لە وڵاتی فەرەنسا، بەڕێز (ڤالێری پێكرێس) كۆبووینەوە” .
نوێنەری حکوومەتی هەرێمی کوردستان دەڵێت”لەو كۆبوونەوەیەدا سەرۆكی هەرێمی ئیل دو فرانس، هاوكاری و یارمەتیدانی خۆیانی دووپات كردەوە بۆ گەلی كورد، بۆ ئەم مەبەستەش پڕۆژەیەكی هاوبەش لە نێوان هەردوو هەرێم خرایەڕوو و لە ئایندەیەكی نزیكیشدا بڕیارە شاندێكیان سەردانی هەرێمی كوردستان بكات” .
عەلی دۆڵەمەڕی هەروەها گوتی “هەرێمی ئیل دو فرانس دەیانەوێت رێككەوتننامەیەكی هاوكاری و دۆستایەتی لەگەڵ هەرێمی كوردستان واژۆ بكەن بۆ هاوكاریكردنی هەرێمی كوردستان، هەروەها دەخوازن هاوكاری ئاوارەكان و هەردوو قوتابخانەی فەڕەنسی و كۆلیژی زمان بن بە دابینكردنی كتێب، جگە لەوە چەند پڕۆژەیەكی تریشیان لە بەردەستە بۆ حكوومەتی هەرێم كە حكومەت پێویستی پێی هەبێت”.
