نوچه
ئەمڕۆ سەرۆکی هەرێمی کوردستان، میوانداری سەرۆککۆماری عێراق، سەرۆکوەزیرانی هەرێمی کوردستان، سەرۆکی پەرلەمانی کوردستان و هه‌روه‌ها سەرۆک و سکرتێری پارتە کوردستانییەکان دەکات.
به‌گوێره‌ی زانیارییه‌كان، ئەمڕۆ (سێشه‌ممه ٥-١١-٢٠١٩)، دوو کۆبوونەوە دەکرێت. کۆبوونەوەی یەکەم كاتژمێر ١٠ی پێشنیوه‌ڕۆ دەستپێدەکات و لەنێوان هەرسێ سەرۆکایەتییەکەی هەرێمی کوردستان دەبێت: نێچیرڤان بارزانی سەرۆکی هەرێمی کوردستان، مەسروور بارزانی سەرۆکی حکومەت و رێواز فایەق سەرۆکی پەرلەمانی کوردستان، لەو کۆبوونەوەیەدا ئامادەکاریی و گفتوگۆ دەکرێ بۆ کۆبوونەوەی دواتر لەگەڵ بەرهەم ساڵح سەرۆککۆماری عێراق و کەسی یەکەمی حیزبەکانی هەرێمی کوردستان، کە كاتژمێرێك دواتر دەستپێدەکات.
هه‌روه‌ها ئامانجی کۆبوونەوەکەی سەرۆکی هەرێمی کوردستان لەگەڵ لایەنە سیاسییەکان، ئەوەیە کۆدەنگی و هەڵویستێکی یەکگرتووی کۆنکرێتیی دروست بێ بەرامبەر هەر گۆڕانکارییەک لە عێراقدا روودەدات، کورد هێزێکی پتەوی یەکگرتوو بێ و دەنگی دانیشتووانی کوردستان یەک بێت بۆ رەتکردنەوەی هەر مادەیەکی دەستور کە لە هەموارکردنەوەدا بیەوێت مافی خەڵک و قەوارەی فیدراڵی کوردستان کەمبکاتەوە.
هەر ئەمڕۆش، نێچیرڤان بارزانی سەرۆکی هەرێمی کوردستان و بەرهەم ساڵح، سەرۆککۆماری عێراق لە دیداری مێری قسە دەکەن. کۆتاییهێنان بە جەنگ، بردنەوەی ئاشتی لە رۆژهەڵاتی ناوەڕاستدا، ناونیشانی دیداری مێریە کە بۆ ماوەی دوو رۆژ لە هەولێر بەردەوام دەبێت.
