نەوزاد عەلی-سلێمانی
ئەندامێکی پەرلەمانی کوردستان رایدەگەیەنێت، حکوومەتی هەرێم و عێراق، گەیشتوونەتە رێککەوتنێکی سەرەتایی، بەڵام خۆپیشاندانەکان هۆکاری دواکەوتنی بەردەوامی گفتوگۆکان بووە.
رۆژی هەینی (٢٥-١٠-٢٠١٩) خۆپیشاندان لە زۆربەی شارەکانی باشووری عێراق بەڕێوەچوو، بە هۆی درووستبوونی ئاڵۆزی لە خۆپیشاندانەکاندا، زیاتر لە ٤٠ كەس كوژراون و زیاتر لە دوو هه‌زار کەسی دیکەش برینداربوون، حکومەتی عێراق باری نا ئاسایی و قەدەغەکردنی هاتوچۆشی راگەیاند.
لە لێدوانێکی تایبەت بە نوچە، محەمەد سەعدەدین، سەرۆکی فراکسیۆنی پارتی گەشەپێدانی تورکمانی و بڕیارە دەری لیژنەی دارایی لە پەرلەمانی کوردستان، لە بارەی خۆپیشاندانەکانی عێراق، رایگەیاند “بەگوێرەی دەستووری عێراق خۆپیشاندان مافێکی دەستووری خەڵکە و شتێکی زۆر ئاساییە، بەڵام ئەو خۆپیشاندانانەی ئێستا لە عێراق ئەنجامدەدرێت، بەگشتی زیانیان بۆ خەڵکی عێراق هەیە و دەبێتە هۆی پەکخستنی کاری فەرمانگەکان و پڕۆژە ستراتیژییەکان، بەتایبەت پەسەندکردنی پڕۆژەیاسای بودجەی ساڵی ٢٠٢٠ی عێراق، کە زۆر گرنگە بۆ خەڵکی عێراق و هەرێمی کوردستانیش”.
بڕیار دەری لیژنەی دارایی لە پەرلەمانی کوردستان، دەڵێت “خۆپیشاندانەکان بەمشێوەی ئێستا کاریگەری نەرێنی دەبێت لە سەر عێراق و هەرێمی کوردستان، ئەم خۆپیشاندانانە لە ئەنجامدا بەزیانی خەڵکی عێراق دەشکێتەوە، لە بەرئەوەی ئاراستەی خۆپیشاندانەکان دەگوڕدرێت و لە ئامانجی سەرەکی خۆی لادەدات، لە جیاتی ئەوەی ببێتە هۆی بەدیهێنانی مافەکانی خەڵک، بەپێچەوانەوە دەبێتە هۆی ئەوەی ئەو ماف و ئیمتیازاتانەی، کە پێویستە پێداگری لەسەر بکەن دووبارە لەدەستی بدەنەوە”.
لە بارەی رێککەوتنی هەرێم و بەغدا، سەعدەدین گوتی “هەرێم و بەغدا، وەک ئیرادەیەکی سیاسیی دەیانەوێت بگەنە چارەسەری گونجاو بۆ کێشە هەڵواسراوەکانی نێوانیان، ئێستاش هەردوولا گەیشتوونەتە رێککەوتنێکی سەرەتایی، بەڵام خۆپیشاندانەکانی عێراق، هۆکارێکی سەرەکی بووە بۆ دواکەوتنی گفتوگۆکانی نێوان هه‌ردوولا”.
