نوچەنێت
ھێنانی عەرەبی ھاوردە بۆ كەركوك، درێژەی هەیە و بەپێی لێدوانێکی بەرپرسێکی پارتی تائێستا سەد هەزار عەرەب، هاوردەکراون.
دیاری حوسێن، جێگری بەرپرسی ئەنجوومەنی سەرکردایەتی کەرکوک-گەرمیانی پارتی دیموکراتی کوردستان، بە میدیای فەرمی حزبەکەی راگەیاندووە، ھاوردەكردنی ھاووڵاتیانی عەرەب لە ناوچە جیاوازەكانی عێراق بۆ كەركوك و دەورووبەری بەردەوامە. بەپێی دوایین زانیاری تا ئێستا سەد ھەزار عەرەب ھاوردەی كەركوك كراون و لە نێو سەنتەری شار و دەورووبەریدا جێگیر كراون.
دیاری حوسێن هەروەها گوتویەتی، ئەو عەرەبانەی دێنە كەركوك، لەلایەن ئیدارەی كەركوكەوە ئاسانكارییان بۆ دەكرێت و لە ڕووی یاساییەوە دەرفەتیان پێ دەدرێت بۆ ئەوەی لە كەركوك نیشتەجێ بكرێن. ڕۆژانە خەڵکی دەرەوەی کەرکوک دەهێنرێت لەم شارە نیشتەجێ دەکرێت. ئەمەش بەمەبەستی گۆڕینی دیمۆگرافیای کەرکوکە.
