نوچە: تایبەت
بڕیارە شاندێکی پەرلەمانی کوردستان بچێتە بەغدا و لەبارەی بودجە و نەوت و ماددەی١٤٠ لەگەڵ پەرلەمانی عێراق کۆ ببنەوە.
بەپێ زانیارییەکان، شاندەکەی پەرلەمان پێکدێت لە ھەر یەک لە سەرۆک لیژنەکانی دارایی و ئابووریی و وزە و سامانە سروشتییەکان و لیژنەی ناوچە کوردستانییەکانی دەرەوەی ئیدارەی ھەرێمی کوردستان.
لەلیدوانیکی تایبەت بە نوچە، محمەد سەعدەدین، بڕیاردەری لیژنەی دارایی پەرلەمانی کوردستان بە سەردانی شاندەکەی بۆ بەغدا پشتڕاست کردەوە و راگەیاند: سبەی ئێوارە (چوارشەممە ٢٥- ٩- ٢٠١٩)، شاندێک لە پەرلەمان بە سەرۆکایەتی جێگری سەرۆکی پەرلەمانی کوردستان دەچێتە بەغدا”.
محمەد سەعدەدین گوتیشی “شاندەکە ڕۆژی پێنجشەممە٢٦-٥-٢٠١٩، دەچێتە پەرلەمانی عێراق و گفتوگۆکانیان لەبارەی سێ کێشەی سەرەکی نێوان ھەولێر و بەغدا گفتوگۆ دەکەن”. گوتیشی “پڕۆژە بودجەی٢٠٢٠ عێراق و کێشەی نەوت و کێشەی ناوچە کوردستانییەکانی دەرەوەی ئیدارەی ھەرێمی کوردستان و گفتوگۆ لەگەڵ لیژنە تایبەتمەندەکانی پەرلەمانی عێراق لە بەرنامەی کاریان دایە”.
