نوچە: تایبەت
سەرۆكی یەكێتی مامۆستایانی كوردستان زانیاری نوێ لەبارەی هەوڵەكان بۆ رێككەوتن لەگەڵ كۆمپانیایەك بۆ پێدانی ئۆتۆمبیل بە مامۆستایان ئاشكرادەكات و ئەوەش دەڵێت: “تائێستا رێككەوتنی كۆتایی نەكراوە”.
بڕیاروایە یەکێتی مامۆستایان بە رێککەوتن لەگەڵ کۆمپانیایەکی ئۆتۆمبیل، بەشێوەی قیست ئۆتۆمبێل بۆ مامۆستایان دابین بکەن، بەڵام هێشتا دیار نییە چ کاتێک رێککەوتنەکەیان لەگەڵ کۆمپانیاکە دەگاتە ئەنجام.
لە لێدوانێکی تایبەت بە نوچە، مامۆستا عەبدلواحید محەمەد، سەرۆكی یەكێتی مامۆستایانی كوردستان، لەبارەی پێدانی ئۆتۆمبیل بە مامۆستایان راگەیاند: هەوڵەكان بۆ رێككەوتن لەگەڵ كۆمپانیایەك تاوەكو بەشێوەی ساڵانی 2012-2013 ئۆتۆمبێلی قیست بۆ مامۆستایان دەستەبەر بكرێت بەردەوامەو تائێستا نەگەیشتوینەتە رێككەوتنی كۆتایی.
مامۆستا عەبدلواحید محەمەد گوتیشی “ئەم كارە پێویستی بە رەزامەندی وەزارەتی پەروەردە و وەزارەتی داراییەوە هەیە، بەوهۆیەوە تائێستا رێككەوتنی لەسەر نەكراوە، بەڵام هەوڵەكان لەوبارەیەوە بەردەوامە”.
