نوچە
بەبۆنەی جەژنی چلەی هاوینی کوردانی ئێزدی، سەرۆکی هەرێمی کوردستان لە پەیامێکدا پیرۆزبایی لە کوردانی ئێزدی دەکات.
لە پەیامەکەیدا، نێچیرڤان بارزانی، سەرۆکی هەرێمی کوردستان رایگەیاندووە، هیوادارم ئەم جەژنە ببێتە هۆی هاتنەکایەی رەوشێکی باشتر بۆ خوشک و برا ئێزدییەکانمان و هەموویان بتوانن بگەڕێنەوە زێدی خۆیان.
جەژنی چلەی هاوین یەکێک لە جەژنە سەرەکییەکانی کوردانی ئێزدی و ساڵانە بە رێوڕەسمی جیاواز لە پەرستگای لالش بەڕێوەدەچێت. ئێزدیان بە مەبەستی بەشداریکردن لەو جەژنەدا، لەناوخۆ و دەرەوەی وڵات سەردانی باشووری کوردستان دەکەن کە بەبۆنەی تێپەڕبوونی وەرزی هاوین بەڕێوەدەچێت.
دەقی پیرۆزباییەکەی سەرۆکی هەرێمی کوردستان:
سەرۆکێ هەرێما کوردستانێ جه‌ژنا چلێ هاڤێنێ ل ئێزدییان پیرۆز دكه‌ت
جه‌ژنا چلێ هاڤینێ یا ئێزدییان، ب گەرمى ل ڕێزداران میرێ ئێزدییان و جڤاتا ڕووحانى و هه‌موو خوشك و برایێن ئێزدی یێن كوردستانێ و جیهانێ پیرۆز دکەم. هیڤیدارم ئه‌ڤ جه‌ژنه ب خێر و شادى بۆ هەموو ئێزدییان و كوردستانێ بگشتی ڤه‌گه‌ڕیت.
د دەمەکێدا جەژنا چلێ هاڤینێ پیرۆز دکەین، ئەم ب ڕێز و شکۆدارى ژى قوربانى یێن كاره‌ساتێن کو هاتنە سەرێ ئێزدییان ببیر تینین و دروود و سلاڤان بۆ گیانێ وان دهنێرین. هیڤیدارین جه‌ژن و بیرهاتنێن بهێن د ڕەوشەکا باشتردا ڤەگەڕن و هەموو خوشك و برایێن مه یێن ئێزدی ل وار و جهێن خۆیێن ئاڤه‌دانكری ڤەگەڕیابن، وندا و ڕه‌ڤاندى ژی ئازاد بووبن.
جاره‌كا دی جه‌ژنا چلێ هاڤینێ ل هه‌موو خوشك برایێن ئێزدی پیرۆز بیت، هه‌ر ساڵ ب خێر و خۆشى.
نێچیرڤان بارزانى
سەرۆکێ هەرێما کوردستانێ
٣٠-٧-٢٠١٩
