نەوزاد عەلی-سلێمانی
سەرۆکی لیژنەی کاروباری شەهیدان و جینۆسایدی پەرلەمانی کوردستان رایدەگەیەنێت، بڕیارە لەم هەفتەیەدا خوێندنەوەی دووەم بۆ پڕۆژەی رۆژى جینۆسایدى كوردانى ئێزیدى بکرێت.
ڕۆژی ٣-٨-٢٠١٤، داعش هێرشیکردە سەر شنگال و ناوچەکانی کوردانی ئێزیدی، کە لەو ڕۆژەدا زۆرترین کوردانی ئێزیدی تێدا کۆمەڵکوژی کرا و بەشێکی زۆریش لە ژن و منداڵ و کچی ئێزیدی لە لایەن چەکدارانی داعشەوە وەک کەنیزەک مامەڵەیان لەگەڵدا کرد.
لە لێدوانێکی تایبەت بە نوچەنێت، سەوسەن محەمەد میرخان، سەرۆکی لیژنه‌ى كاروبارى شه‌هیدان و جینۆساید و زیندانیانى سیاسى له په‌رله‌مانى كوردستان، لەبارەی پرۆژەى رۆژى جینۆسایدى كوردانى ئێزیدى ڕایگەیاند “دوێنێ ۲٨-٧-٢٠١٩ وەک لیژنەی یاسایی و لیژنەی کاروباری شەهیدانی پەرلەمانی کوردستان لەگەڵ وەزیری شەهیدانی هەرێم و د. ڤالا فەرید، وەزیری هەرێم بۆ کاروباری پەرلەمان، کۆبووینەوە و تیایدا تاوتوێی ئه‌و پرۆژه بڕیاره‌مان كردووه و بریارماندا له‌م هه‌فته‌یه‌دا خوێندنه‌وه‌ى دووه‌مى”.
سەبارەت بە پەسەندکردنی پڕۆژە یاساکەش، سەرۆکی لیژنەی یاسایی لە پەرلەمان گوتی “دوای ئەوەی پەرلەمان خوێندنەوەی دووەمی بۆ دەکات، رۆژی ٣-٨-٢٠١٩ پەرلەمانی کوردستان دەنگ لەسەر پڕۆژەبڕیارەکە دەدات و هەر ئەو ڕۆژەش دەکرێت ڕۆژی جینۆسایدی کوردانی ئێزیدی”.
سەوسەن محەمەد ئاماژە بەوەدەکات، پڕۆژەیاساکە لە پەرلەمان کۆدەنگی سەرجەم فراکسیۆنەکانی پەرلەمانی لەسەرە. دەشڵێت “لە پڕۆژە بڕیارەکەدا باس لەوە نەکراوە، کە ڕۆژی ٣-٨ بکرێتە پشوو، ئەوە دەبێت حکومەتی هەرێم بڕیاری لەسەر بدات، بەڵام ئەوە ڕۆژە وەک یادی کۆمەڵکوژی کوردانی ئێزیدی دیاری دەکرێت”.
