نوچە: ئاژانسەکان
دوانیوەڕۆی ئەمڕۆ رووداوێکی تەقەکردن لەنێو رێستۆرانتێکی هەولێر، کارمەندێکی کۆنسووڵخانەی تورکیا کوژرا و سەرۆکۆماری تورکیاش دەڵێت “لە پەیوەندیداین بۆ دۆزینەوەی تاوانباران بە زووترین کات”.
رەجەب تەیب ئەردۆغان، سەرۆککۆماری تورکیا، لە توویتێکدا رایگەیاند، ئیدانەی هێرشەکەی سەر کارمەندانمان لە هەولێر دەکەین و لەگەڵ حکومەتی عێراق و هەرێمی کوردستان لە پەیوەندیداین بۆ دۆزینەوەی تاوانباران بە زووترین کات.
هاوکات بەڕێوەبەرایەتی ئاسایشی هەولێر لە راگەیێندراوێکدا رایگەیاند “ئەمڕۆ (چوارشەممە ١-٧-٢٠١٩) لە رێستۆرانتێکی شاری هەولێر رووداوێکی تەقەکردن روویدا، کە بەداخەوە بووە هۆی گیانلەدەستدانی کارمەندێکی کۆنسووڵخانەی تورکیا و هاووڵاتیەک و برینداربوونی یەکێکی دیکەش”.
ئیبراهیم کاڵن، گوتەبێژی سەرۆکایەتیی کۆماری تورکیا لەو بارەیەوە رایگەیاند “سەرەخۆشیمان بۆ کەسوکاری ئەو کارمەندەی لە هێرشەکەی هەولێر گیانی لەدەستداوە. لێکۆڵینەوە دەستیپێکردووە و وەڵامی پێویستمان بۆ ئەو هێرشە دەبێت”.
بەپێی زانیارییەکان، تەقەکردنەکە نزیک کاتژمێر ٢ـی دوانیوەڕۆ روویداوە، کەسێک بە دوو دەمانچە تەقەی لە کارمەندانی کۆنسوڵخانەی تورکیا کردووە.
