نوچە: تایبەت
سەرۆكی دەزگای لووتكە بۆ كاروباری ئاوارە و پەنابەران رایدەگەیەنێت، ژمارەیەك كۆچبەری كوردی دانیشتووی قەزای ڕانیەی لەلایەن پۆلیسی توركیاوە لە سنووری نێوان توركیا و یۆنان دەستگیركران.
لە لێدوانێکی تایبەت بە نوچەنێت، ئاری جەلال، سەرۆكی دەزگای لووتكە بۆ كاروباری ئاوارە و پەنابەران، بە لەبارەی دەستگیرکردنی ژمارەیەک کۆچبەر لە تورکیا راگەیاند: ئێوارەی رۆژی دووشەممە ١٥-٧-٢٠١٩، نوێنەری دەزگای لووتكە بۆ كاروباری ئاوارە و پەنابەران لە وڵاتی توركیا ئاگاداری كردینەوە، كە ١٧ كۆچبەری كوردی دانیشتووی قەزای ڕانیە، لە كاتێكدا ویستوویانە سنوورەكانی توركیا تێپەڕێنن و خۆیان بگەیەننە وڵاتی یۆنان، لەلایەن پۆلیسی توركیاوە دەستگیر كراون.
ئاری جەلال دەشڵێت، سێ لە گەنجەكان لەكاتی دەستگیركردنیاندا توانیویانە خۆیان دەرباز بكەن و لەدەست هێزەكانی پۆلیس هەڵبێنبەر.
سەرۆكی دەزگای لووتكە گوتیشی “بڕیارە ئەمڕۆ (١٦-٧-٢٠١٩) نوێنەری دەزگاكەمان سەردانی ئەو ١٤ كۆچبەرە بكات و كارئاسانی و هاوكاری پێویستیان پێشكەش بكات، تاكوو هەرچی زووە مامەڵە یاساییەكانیان بۆ تەواو بكرێت و ڕەوانەی هەرێمی كوردستان بكرێنەوە”.
