نوچەنێت
سوپای ئیسرائیل هێرشێکی ئاسمانی فراوانی کردە سەر دوو شاری سوریا و دەنگی چەندین تەقینەوە بیستراوە.
بەپێی زانیارییە میدیاییەکان، درەنگانی شەوی یەکشەممە ٣٠-٦-٢٠١٩، فڕۆکە جەنگییەکانی ئیسرائیل هاوکات چەندین بنکەیان لە گوندەوارەکانی باشووری دیمەشق و گوندەوارەکانی پارێزگای حیمس، کردووەتە ئامانج.
بەگوێرەی میدیای فەرمی حکومەتی سوریا، ژمارەیەک موشەکی ئیسرائیل سەنتەری تویژینەوە زانستییەکانی لە ناوچەی جەمڕایا لە رۆژئاوای دیمەشقی کردووەتە ئامانج و بەو هۆیەوە تەقینەوەیەکی گەورە روویداوە.
سەرچاوەیەکی سەربازیی رژێمی سوریا بە ئاژانسی سپۆتنیک ـی راگەیاندووە، کە فڕۆکە جەنگییەکانی ئیسرائیل لە ئاسمانی لوبنانەوە بنکە سەربازییەکانی رژێمی سوریایان لە هەردوو شاری حمس و دیمەشق کردووەتە ئامانج.
بەهۆی هێرشە مووشەکییەکانەوە، دەنگی چەندین تەقینەوە لە دیمەش و حمس بیستراوە و میدیاکان باس لەوە دەکەن، کە چوار کەس گیانیان لەدەست داوە و ٢١ کەسی دیکەش بریندار بوون.
